Winsɔsʋg linɛ bɔɔd sʋŋir
35
1 O Zugsɔba, zan'asim banɛ wʋsa zan'as man la,ka zab nɛ banɛ wʋsa zabid nɛ man la.
2 Nɔkimi fʋ zaba la'ad nɛ fʋ gbanti'edʋg
ka duoe zabi sʋŋim.
3 Nɔkimi fʋ kpan nɛ fʋ duori
gu' banɛ kati dɔllim la.
Yɛlimim ye, “Manɛ an fʋ faangid.”
4 Kɛl ka banɛ mɔɔd ye ba kʋʋm la
di nyan ka nyan kpɛn' ba;
banɛ ieedi m san'auŋ la,
kɛl ka ba ya'am fɛndig ka ba tuligi lɛb.
5 Kɛl ka ba na nwɛnɛ udugi bɛ pɛbisim ni,
ka Zugsɔb maliak na da'ae ba mɔri gaad;
6 ba suor na lieb lik nɛ sisalig,
ka Zugsɔb maliak la kati ba.
7 Ban sadigim bɛnd mam baans zaalim-zaalim
ka tuud bʋmbɔk ye m li la,
8 san'auŋ na gbirigi paae ba,
baŋ kanɛ ka ba bɛnd la na gban'e ba mɛŋ,
ka ba na li bʋmbɔk kanɛ ka ba tu la ni ka nyɛ san'auŋ.
9 Ala ka m sʋnf na malis nɛ m Zugsɔb la
ka na mɔr ya'amlɛog nɛ o nɔŋilim la.
10 M na dʋ'ʋsi o yʋ'ʋr ka yɛl ye,
“Anɔ'ɔnɛ bɛ nwɛnɛ fʋ, O Zugsɔba?
Fʋ faaɛn nɔŋ dim ninkpi'ema nu'usin,
fʋ faaɛn nɔŋ dim nɛ fara dim faandib nu'usin.”
11 Kasɛtib banɛ pʋ mɔr zi'esim yi tuon na
m bu'osidim linɛ ka m zi' yɛla.
12 M maali ba sʋm ka ba lɛbisim bɛ'ɛd,
ka m yʋ'ʋn kpɛlimi m kɔn'ɔkɔn' nɛ pakir.
13 La'am nɛ wala ban daa bɛn'ɛd la
m daa mɔr sʋnsa'aŋ ka yɛ bɔto fuug,
ka sie m mɛŋi lɔ nɔɔr.
Amaa winsɔsʋg la daa pʋ di'e la,
14 m daa kumnɛ nɛ sʋnsa'aŋ
wʋʋ ba anɛ m zuanam bɛɛ m yidim,
ka sʋ'ʋnnɛ m zug nɛ sʋnsa'aŋ
wʋʋ m ma yɛla ka m kaasidnɛ.
15 Amaa man tu'ug la, ba la'as nɛ maan sumalisim;
ba la'asi giligimi bu'osidim linɛ ka m zi' li gbinnɛ.
Ba kɛɛndim nɛ ka pʋ basida.
16 Ba la'adim nɛ nwɛnɛ banɛ zi' Wina'am nɛ.
Ba ga'adi ba nyina man yɛla.
17 O Zugsɔba, bɔ ka li yuug ka fʋ pʋ maan si'ela?
Faanmi m nyɔvʋri yis banɛ zabid nɛ m la nu'usin,
faanmi m nyɔvʋri yis gbigim bama ni.
18 M na pʋ'ʋsif bareka nidib la la'asʋg zin'igin.
Nidib la wʋsa sʋʋgin, m na dʋ'ʋsi fʋ yʋ'ʋr.
19 Da kɛ ka m dataas banɛ an ziri dim la
maal sumalisim man nyaŋir yɛla.
Banɛ kisim zaalim-zaalim la,
da kɛ ka ba maal sumalisim m sʋnsa'aŋ yɛlaa.
20 Ba pʋ pian'ad nɛ sumbʋgʋsʋm,
amaa ba ma'adi ziin
nimbanɛ bɛ baanlimm teŋin la.
21 Ba mi'edim ka la'adim ye, “Ha! Haa!
Ti nyɛya nɛ ti mɛŋ nini!”
22 Zugsɔba, fʋ nyɛ nɛ'ɛŋa; da sin baanlimm nɛ.
Da lal nɛ ma, Zugsɔbaa.
23 Duom, zi'en ka zabi sʋŋim!
Zamim m yɛla, m Wina'am nɛ m Zugsɔba.
24 O m Zugsɔb nɛ m Wina'am fʋn an pʋpiel la zug,
tisimim bʋʋd;
da kɛ ka ba sʋnf ma'ae man yɛllɛ.
25 Da kɛ ka ba la' ye, “Hahaa, tinamɛ bɔɔdin si'eli nwa!”
Bɛɛ ba yɛl ye, “Ti yʋ'ʋn vɔl o naae.”
26 Kɛl ka banɛ maan sumalisim man yɛla la
di nyan ka ba ya'am fɛndig;
banɛ dʋ'ʋsidi ba mɛŋ ye ba gat mam la
na di nyan ka ba zug fak.
27 Banɛ mɛ bɛɛ m nya'aŋ ye m di bʋʋd la
na tansid nɛ sumalisim;
ba na yɛt ye, “Zugsɔb onɛ mɔr sumalisim nɛ o tʋmtʋm
bɛllim la yʋ'ʋr na paam zun'or.”
28 M zilim na pian'adi fʋ pʋpielim la yɛla
ka wɔ'ɔgif dabisir la wʋsa.