M na zun'e Zugsɔb la yʋ'ʋr o tʋʋm sʋŋ zug
34
1 M na zun'e Zugsɔb la yʋ'ʋr saŋa wʋsa;m nɔɔr na zun'od o saŋa wʋsa.
2 Zugsɔb la ni ma'aa ka man na nwɛ' nyɔ'ɔg;
kɛl ka banɛ namisid la wʋm ka mɔr sumalisim.
3 Kem na ka ti la'asi wɔ'ɔg Zugsɔb la;
kɛl ka ti la'as taaba dʋ'ʋs o yʋ'ʋr.
4 M sɔs Zugsɔb la ka o di'e m sɔsʋg;
o yisim dabiem wʋsa pʋʋgin.
5 Banɛ gɔsid Zugsɔb la na mɔr sumalisim;
ba kʋ di nyan baa bi'elaa.
6 Man onɛ an tadim nwa buol Zugsɔb la ka o wʋm;
o faanmi yis yɛla wʋsa pʋʋgin.
7 Zugsɔb la maliak gur banɛ zɔt o la,
ka faandi ba saŋa wʋsa.
8 Li'elim na ka fʋ na baŋ ye Zugsɔb la dɔllim malis;
ninkanɛ wʋsa su'a o mɛŋ o san'an mɔr Wina'am bareka.
9 Yanam banɛ an Zugsɔb nidib la, zɔmini o;
si'el kʋ pansig banɛ zɔt Zugsɔb laa.
10 Kɔ'ɔm na wʋm gbigima ka ba tadig,
amaa banɛ ti'e Zugsɔb la,
bʋnsʋŋ si'a kʋ pɔ'ɔgi baa.
11 Kemi na, m biisɛ, kɛlisimi;
M na pa'ali ya ka ya na zɔt Zugsɔb la.
12 Anɔ'ɔnɛ bɛ ya sʋʋgin nɔŋ vʋm
ka bɔɔd ye o vʋe yuug ka o bɛllim na malisa?
13 Gban'ami fʋ zilim ka li da pian'ad bɛ'ɛdɛ
ka mɛ da kɛ ka fʋ nɔɔr pian'ad an zirii.
14 Basim bɛ'ɛd tʋʋma ka fɛndigi tʋm linɛ an sʋm;
gban'am sumbʋgʋsʋm, nu'us ayi' ka da basɛ.
15 Zugsɔb la nindaa kpa'anɛ gɔsid pʋpielim dim
ka o tʋba yɔ'ɔgi kɛlisidi ba fabʋlʋg;
16 Zugsɔb la fɛndig o nindaa bid tʋʋmbɛ'ɛd dim kʋdig,
ye o kɛ ka nidib tami ba yɛla dunia nwa ni.
17 Pʋpielim dim ya'a kaasi buol Zugsɔb la, o na kɛlisi tisi ba,
ka na yisi ba yɛla wʋsa pʋʋgin.
18 Zugsɔb la pʋ lal nɛ banɛ sʋnya san'am la,
ka sʋŋid banɛ ti'iri naae la.
19 Yɛla bɛdegʋ na tun'e paae pʋpiel,
amaa Zugsɔb la na yis o li wʋsa pʋʋgin;
20 o na yis o yɛlbɛ'ɛd wʋsa pʋʋgin,
hali o kɔnbir baa yinne kʋ kɔ'ɔgɛ.
21 Pʋkpɛnnim linɛ ka bugusim dim mɔr la na mɔri ba keŋ;
banɛ kis pʋpielim dim la na nyɛ kʋʋsbɛ'ɛd.
22 Zugsɔb la na faaɛn o tʋmtʋmnib;
banɛ nɔki ba mɛŋi dɛllim o la kʋ nyɛ kʋʋsbɛ'ɛdɛ.