Zun'or yʋʋm
33
1 Yanam pʋpielim dima, yʋ'ʋmmi nɛ sumalisim!Zun'omi Zugsɔb la yʋ'ʋr,
ka li nar ye banɛ pʋ mɔr gba'ar la zun'e o.
2 Nwɛ'ɛm kɔnne zun'e Zugsɔb la;
yʋ'ʋmmi yʋʋma ka nwɛ' bʋnnwɛ'ɛda tis o.
3 Yʋ'ʋm yʋʋm paalli tis o,
nwɛ'ɛm sʋ'ʋŋa ka tans nɛ sumalisim.
4 Zugsɔb la pian'ad anɛ sida ka dɔl suor;
ka on tʋm si'el wʋsa mɛ an sʋm.
5 Zugsɔb la bɔɔdi pʋpielim nɛ sida;
teŋgbauŋ la pɛ'ɛli nɛ o nɔŋilim linɛ ka' bɛnnɛ.
6 Zugsɔb la pian'ʋk ka o da maal saŋgbana,
o nɔɔr pɛbisim da maal winnig
nɛ nwadig nɛ nwadbibis wʋsa.
7 O da la'as atɛuk ku'om zin'ig yinne
ka yɔ' ku'om la lɛbisi li bɛllim zin'igin.
8 Kɛl ka teŋgbauŋ la wʋsa zɔ Zugsɔb la;
kɛl ka dunia nidib wʋsa na'as o sʋ'ʋŋa.
9 O da pian'anɛ ka li naam;
o da tis nɔɔr ka li zi'en sʋ'ʋŋa.
10 Zugsɔb la widigid buudi wʋsa gban'ar;
ka kɛ ka nidibi gban'e si'el la lieb yɔri.
11 Amaa Zugsɔb la gban'ar zi'enɛ kiŋ-kiŋ saŋa wʋsa,
o sʋnfʋ gban'e si'el la dɔlisidnɛ paad zʋmaana wʋsa.
12 Yɛlsʋm bɛ nɛ buudkanɛ ka Zugsɔb aan ba Wina'am la,
nɛ nimbanɛ ka o gaŋ ka ba aan o nidib la.
13 Zugsɔb la bɛ nɛ arezana ni
ka gɔsid teŋinɛ nyɛt nidib wʋsa.
14 On bɛ zin'isi'a la ka o gɔsid
banɛ bɛ teŋin la wʋsa.
15 Onɛ maal nidib wʋsa sʋnya
ka mi' ban maan si'el wʋsa.
16 Na'ab kae na di ya'an ka li anɛ o soogianamɛ zu'oe la zugɔ;
bɛɛ zabzabid kae na nyaŋi pɔns zaba ni nɛ o mɛŋ paŋa.
17 Zaba wief ti'ir anɛ zaalim;
la'am nɛ on mɔr paŋ si'em la, o kʋ nyaŋi faaɛn fɔ.
18 Amaa Zugsɔb la nini laki kpa' nɛ banɛ zɔt o la,
nɛ banɛ ti'iri bɛɛ o nɔŋilim linɛ ka' bɛn la ni,
19 ye o faaɛn ba yis kum pʋʋgin
ka guri ba ka kɔ'ɔm kʋ kʋʋ ba.
20 Ti gu'usid ka mɔr ti'ir Zugsɔb la ni;
onɛ sʋŋidi ti ka lusidi ti.
21 On zug ka ti sʋnya malis,
o yʋ'ʋr kanɛ an kasi la ka ti tis sida.
22 O Zugsɔba, kɛl ka fʋ nɔŋir linɛ ka' naar la bɛɛ ti ni,
wʋʋ tinamɛ nɔki ti ti'iri niŋi fʋ san'an si'em la.