Tʋʋmbɛ'ɛd viigir nɛ Akɛ-taali-bas
32
1 Wina'am bareka bɛ nɛ onɛ ka ba kɛɛ o taali baska lus o tʋʋmbɛ'ɛd la.
2 Wina'am bareka bɛɛ tis ninkanɛ
ka Zugsɔb la pʋ kaannɛ o tʋʋmbɛ'ɛdɛ,
nɛ onɛ wʋsa ka ziri ka' o san'anɛ.
3 Man daa pʋ viigi m tʋʋmbɛ'ɛd la,
li daa kilim ban'asi m kɔnba ni
ka m ʋʋnsid dabismum.
4 Yʋ'ʋŋ nɛ nintaŋ wʋsa
fʋ daa tisim namisʋg,
ka m paŋ wʋsa naae
wʋʋ ɔnsir saŋa ka ku'om kpiɛnd si'em la.
5 M gban'e ye, “M na viigi m tʋʋmbɛ'ɛdi tis Zugsɔb la.”
M yʋ'ʋn kaali m tʋʋmbɛ'ɛdi tisif
ka pʋ su'af linɛ ka m pɔ'ɔg laa,
ka fʋ daa kɛ tʋʋmbɛ'ɛd linɛ ka m tʋm la taali bas.
6 Dinzugɔ, kɛl ka banɛ dɔl fʋn Wina'am la sɔsif
saŋkan ka fʋ nam bɛ yammin la;
Sida yɛlmugusa ya'a ti paae na
wʋʋ ku'otita'ari badigidnɛ,
li kʋ dii baa.
7 Fʋ anɛ m suak zin'ig;
fʋ na gurim ka yisim yɛla pʋʋgin
ka m na yʋ'ʋm yʋʋma fʋ faangir la yɛla.
Zugsɔb la yɛt ye,
8 “M na tisif nɔɔr ka pa'alif fʋn na ken si'em;
M na sa'alif ka gurif.
9 Da nwɛnɛ wief bɛɛ bʋŋ
banɛ pʋ gban'ad si'el gbinnɛ.
Ba ya'a pʋ li'a ba nɔɔr ka bʋ'ʋdi ba,
ba kʋ dɔl suorɛ.”
10 Bugusim sɔb na nyɛ namisʋg bɛdegʋ,
amaa onɛ siak Zugsɔb la
o nɔŋilim linɛ pʋ naad la na bɛ nɛ o.
11 Mɔri sumalisim ka maal sumalisim, yanam pʋpielim dima;
yʋ'ʋmmi nɛ sumalisim, yanam banɛ pʋ mɔr gba'ar la.