Zugsɔba, fʋ san'an ka m su'a
31
1 Zugsɔba, fʋ san'an ka m su'a;da kɛ ka m di nyannɛ;
faanmim nɛ fʋ pʋpielim la.
2 Wʋmmi m sɔsʋg;
kem tɔ'ɔtɔ na faanm;
an tampinkanɛ na su'am,
ka an onɛ na faanm.
3 Fʋn sadigim aan m tampiing nɛ m kpi'euŋ zin'ig la;
fʋ yʋ'ʋr zugɔ, aan m tuongat ka nwɛdigidim.
4 Faanmi yis baŋ kanɛ ka ba bɛndim la pʋʋgin,
fʋnɛ aan m suak zin'ig.
5 M nɔki m siigi niŋi fʋ nu'usin;
faanmim, Zugsɔba, fʋnɛ an sida Wina'am.
6 M kis banɛ dɔl bada linɛ ka' gbin la;
mam mɛ tis Zugsɔb la sida.
7 M na maal sumalisim fʋ nɔŋir la ni,
bɔzugɔ fʋ nyɛt man namisid si'em,
ka baŋi m sʋnsa'aŋ la wʋsa.
8 Fʋ pʋ nɔkimi tisim dataas laa,
amaa ka lɛɛ nɔki m nɔba zi'el zin'isʋŋin.
9 Zɔmim nimbaanlig, O Zugsɔba, ka m bɛ nɛ sʋnsa'aŋin.
M nini gɛnnɛ nɛ kaasig,
ka m niŋgbiŋ nɛ m sʋnf wʋsa mɔr sʋnsa'aŋ.
10 Sʋnsa'aŋ kɛnɛ ka m gɛn
ka m yʋma sied;
namisʋg la kɛ ka m paŋ naae,
ka m kɔnba ka' paŋ ya'asɛ.
11 M dataas nɛ m kpi'es la wʋsa nɛ'ɛsidim nɛ;
banɛ mi'im la zɔtim nɛ,
ba ya'a nyɛɛm suoraugʋn ba zɔtnɛ.
12 Ba tami m yɛla ka li nwɛnɛ m kpinɛ nɛ;
man yʋ'ʋn nwɛnɛ yʋkanɛ nwa'ae nɛ.
13 M wʋm ka nidib bɛdegʋ nya'amid;
dabiem gilig zin'ig wʋsa.
Ba gban'ad gban'abɛ'ɛd man yɛla
ka mɔɔd ye ba kʋʋm.
14 Amaa m tis fʋn sida, O m Zugsɔba;
m yɛl ye, “Fʋnɛ aan m Wina'am.”
15 M bɛ nɛ fʋ nu'usin saŋa wʋsa;
faanmim m dataas
nɛ banɛ katim la nu'usin.
16 Kɛl ka fʋ nindaa kpa' man kanɛ aan fʋ tʋmtʋm la;
ka faanm nɛ fʋ nɔŋilim linɛ bɛ saŋa wʋsa la.
17 Zugsɔba, da kɛ ka m di nyannɛ,
amaa kɛl ka bugusim dim la di nyan
ka digin yaʋgʋn baanlimm.
18 Kɛl ka ziri dim la fɔn,
bɔzugɔ ba mɔri nyɛɛsim nɛ tita'alim,
ka pian'adi nɛ'ɛsid pʋpielim dim.
19 Fʋ mɔr bʋnsʋma bɛdegʋ,
ka su'a li tisid banɛ zɔtif la.
Fʋ tisid banɛ su'adi ba mɛŋi fʋ san'an la
ka nidib wʋsa nyɛt.
20 Fʋ su'a ba fʋ mɛŋ san'an
ka nimbanɛ an zam dim la kʋ nyɛɛ ba.
Fʋn bɛ si'el la, ani ka fʋ su'adi ba,
ka dataas banɛ tʋ'ʋdi ba la kʋ nyɛɛ ba.
21 Zugsɔb la yʋ'ʋr na nyɛ na'asi,
bɔzugɔ man daa nwɛnɛ tempʋkanɛ ka dataas gilig la,
o daa pa'al mam o nɔŋilim tita'ar.
22 M daa kaasi yɛl ye,
“O kadimi yis o san'an!”
La'am nɛ wala man kaasi buolif ye fʋ sʋŋim la
fʋ wʋmi m kaasig ka zɔɔm nimbaanlig.
23 Nɔŋimi Zugsɔb la, yanam banɛ tis o sida la!
Zugsɔb la gur banɛ an sida dim la,
amaa ka yɔɔd tita'alim dim la sam ka li paadi li bɛn.
24 Zi'enimi sʋ'ʋŋa ka kpɛ'ɛŋi ya sʋnf,
yanam banɛ wʋsa ti'iri bɛ Zugsɔb san'an la.