Bareka pʋ'ʋsim winsɔsʋg
30
1 M na dʋ'ʋsif, O Zugsɔbaa,fʋn yisim teŋ teŋiri dʋ'ʋsim agɔl,
ka pʋ kɛ ka m dataas nyaŋim la.
2 M Zugsɔb Wina'am, m buolif ye fʋ sʋŋim
ka fʋ tisim laafi.
3 Zugsɔba, fʋ vɛ'ɛgimi yis kpi'im teŋ na;
fʋ faanm ka pʋ kɛ ka m kpii.
4 Yʋ'ʋm tisi Zugsɔb, yanam banɛ aan o nidib la;
zun'omini o yʋ'ʋr kanɛ an kasi la.
5 O sʋnpɛɛn pʋ yuugida,
amaa o nɔŋir bɛ nɛ fʋ nyɔvʋr bɛn wʋsa;
kaasig na bɛ nɛ yʋ'ʋŋ ma'aa,
amaa sumalisim na kɛn bɛogʋn na.
6 Man daa zi'e sʋ'ʋŋa la, m daa yɛl ye,
“Sɔ' kʋ lɛn nyaŋi ma.”
7 O Zugsɔbaa, fʋn daa maalim sʋ'ʋŋa la,
fʋ daa kɛ ka m zi'e ka dabiem kae;
amaa fʋn daa bidim kʋdig la
dabiem daa mɔrim nɛ hali.
8 Naa Zugsɔbaa, fʋn ka m buol;
Zugsɔb la ka m kaasi tis ye o zɔɔm nimbaanlig:
9 “M ya'a kpii keŋ yaʋgʋnɛ,
nyɔbɔ ka fʋ na di'e?
Titan la na nyaŋi zun'e fɔɔ?
Li na mɔɔli fʋ yɛlsida la yɛlaa?
10 M Zugsɔba, wʋm ka zɔɔm nimbaanlig;
Naa Zugsɔba, fʋnɛ aan m sʋŋid.”
11 Fʋ tiaki m kaasig ka li lieb wa'a;
fʋ yis sʋnsa'aŋ linɛ nwɛnɛ bɔto fuug la m niŋgbiŋin,
ka lɛbis sumalisim yɛɛlim
12 ye li kɛ ka m sʋnf ma'ae
ka m yʋ'ʋmmi tisidif ka kʋ an baanlimm nɛ.
M Zugsɔb Wina'am,
m na tisif bareka pʋ'ʋsim saŋa wʋsa.