Wina'am kʋkɔtita'ari bɛ sisi'em pʋʋgin si'em
29
1 Yanam banɛ bɛ arezana ni, tisimi Zugsɔb la na'asi!Tisimi Zugsɔb na'asi o girima nɛ o paŋ la zug.
2 Tisimi Zugsɔb la na'asi linɛ nar nɛ o yʋ'ʋr la,
zun'omi Zugsɔb onɛ vɛnl ka an kasi la.
3 Zugsɔb la dammid ku'om la zug;
Wina'am onɛ an girima sɔb ka mɔr paŋ la tans ya,
Zugsɔb la tansid ku'otita'ar zug.
4 Zugsɔb la pian'ad mɔr paŋ;
Zugsɔb la pian'ad mɔri na'asi.
5 Zugsɔb la kɔɔd na'aziinr tiis;
hali Lebanon na'aziinr tiis la o kɔɔdi ba bur-bur.
6 O kɛt ka Lebanon zuor la ian'asid wʋʋ na'abil nɛ,
ka lɛn kɛt ka Hemon zuor ian'asid wʋʋ mɔɔgin na'arapɔl nɛ.
7 Zugsɔb la ya'a pian'ad, bugum yit nɛ.
8 Zugsɔb la pian'ad ka pipiris teŋ la dammid;
Zugsɔb la dam Kades linɛ an pipirig teŋ la.
9 Zugsɔb la kɛ ka tibɛda dammid
ka sian'arin tiis vaand sʋʋg wʋsa.
Ka sɔ' wʋsa tansid o pʋ'ʋsim Yin la ye,
“Girima anɛ Zugsɔb la din!”
10 Zugsɔb la zin'inɛ o na'am gbauŋ zug ka sʋ'oe dunia ku'om wʋsa;
Zugsɔb la na'am pʋ mɔr bɛnnɛ.
11 Zugsɔb la tisidi o nidib paŋ;
Zugsɔb la kɛt ka o nidib la mɔr bareka nɛ sumbʋgʋsʋm.