Ban'as saŋa winsɔsʋg
41
1 Wina'am bareka bɛ nɛ onɛ tɛn'ɛsid tadimnam yɛla;o ya'a ti bɛ yɛla ni, Zugsɔb la na yis o.
2 Zugsɔb la na gur o nɛ o nyɔvʋr;
o na niŋ o zug bareka teŋ la ni
ka kʋ kɛ ka o lii o bi'emnam nu'usin
bɛɛ ba maal o ban bɔɔd si'em.
3 Zugsɔb la na sʋŋ o, o ban'as saŋa
ka na kɛ ka o paam laafi o wiim la pʋʋgin.
4 M yɛl ye, “O Zugsɔba, m tʋm taali pɔ'ɔgif;
zɔmim nimbaanlig ka tisim laafi.”
5 M dataas pian'adi m yɛla ye,
“Bʋndaar ka o na kpi ka o yʋ'ʋr bɔdigɛ?”
6 Ba nid yinne ya'a kena nyɛɛm
o nɔɔr pian'adi linɛ ka' sidaa,
ka mɛ tɛn'ɛs yɛlbɛ'ɛd o sʋnfʋn,
ka yii mɔɔli li tis nidib zin'ig wʋsa.
7 M dataas la wʋsa nya'amidi taaba m yɛla;
ba makid yɛlbɛ'ɛdi tisidimi yɛt ye,
8 “Ban'abɛ'ɛdi gban'e o;
on dig si'em la o kʋ lɛn duoe.”
9 Hali m mɛŋ zua, onɛ ka m niŋ o yadda,
onɛ ka man nɛ on la'am dit la,
yii m nya'aŋi zi'e m yɛla.
10 Amaa fʋn onɛ aan m Zugsɔba, zɔmim nimbaanlig;
kɛl ka m duoe ka yɔɔ ba sam.
11 M mi' ye fʋ bɔɔdi m yɛla,
bɔzugɔ m dataas la pʋ nyaŋi ma.
12 M bɛllim an sʋ'ʋŋa la zug fʋ kʋ basi ma
ka na kɛ ka m bɛɛ fʋ tuon saŋa wʋsa.
13 Dʋ'ʋsim Zugsɔb onɛ an Israel Wina'am la yʋ'ʋr,
saŋa linɛ ka' bɛnnɛ.
Ami! Ami!