GBAUŊ KANƐ PAAS AYI'
Yʋʋma 42-72
Onɛ bɛ teŋ zʋŋ winsɔsʋg
42
1 Nwɛnɛ waligi yu'osidi bɔɔd ku'om si'em la;ala ka m siig mɛ yu'osidi fʋ yɛla, O Wina'am.
2 M sʋʋnr wʋsa bɛ nɛ fʋn Wina'am kanɛ vʋe la ni.
Saŋkanɛ ka m na kɛɛn fʋ san'an na?
3 M ninta'am aan m diib
nintaŋ nɛ yʋ'ʋŋ wʋsa,
ka nidib yʋ'ʋn bu'osidim ye,
“Fʋ Wina'am la bɛ yaanɛ?”
4 M ya'a tɛn'ɛs nɛ'ɛnam yɛla
li tisidim nɛ sʋnsa'aŋ:
man daa ɛɛnti dɔl nidib bɛdegʋ si'em
ka gaadi ba tuon
ka ti yʋ'ʋmmi kpɛn'ɛd Wina'am pʋ'ʋsim Yin la;
ti daa tansid agɔla nɛ sumalisim
tisid Wina'am bareka pʋ'ʋsim, malʋŋ tiɛnr saŋa.
5 Bɔ ka m sʋʋnr aan anwana?
Bɔ ka li daamidim wala?
Kɛl ka m nɔki m ti'iri niŋi m Wina'am la ni,
man na kpɛn dʋ'ʋsid o yʋ'ʋr;
M sʋʋnr wʋsa san'am nɛ hali;
dinzug, m na tɛnri fʋ yɛla
lin yi Joodan kɔldaug baba,
nɛ Hemon nɛ Mizar zuoya la ni.
7 Sʋnsa'aŋ tita'ari paam
ka li nwɛnɛ ku'otita'ari naan zuor zugʋ suugid teŋin;
ka li paŋ nɛ ku'onwiis la nyaŋim hali.
8 Zugsɔb la nɔŋir na bɛɛ m san'an nintaŋ,
ka o yʋʋma bɛɛ m nɔɔrin yʋ'ʋŋ;
m sɔsidi Wina'am onɛ sʋ'oe m nyɔvʋr la.
9 M yɛli m Wina'am onɛ aan m tampiing la ye,
“Bɔ ka fʋ tami m yɛla?
Bɔ ka fʋ kɛ ka m fabinnɛ
m dataasi mugusidim hali la yɛla?”
10 M kɔnba la zabidnɛ hali ka li nwɛnɛ m bɔɔdi kum nɛ,
m dataas la tʋ'ʋdimnɛ
ka yɛtim saŋa wʋsa ye,
“Fʋ Wina'am la bɛ yaanɛ?”
11 Bɔ ka m sʋʋnr aan anwana?
Bɔ ka li daamidim wala?
Man na nɔki m ti'iri niŋi m Wina'am la ni,
man na kpɛn dʋ'ʋsid o yʋ'ʋr;
onɛ aan m Faangid nɛ m Wina'am.