41
1 Ka Zugsɔb la lɛm bu'os Job ye,Fʋ na nyaŋi tɛɛg bandaug nɛ gu'a yis ku'omin
bɛɛ lɔɔ o nɔɔr nɛ nwiigaa?
2 Fʋ na nyaŋi vʋdig o nyɔnya ka kpɛn'ɛs nwiig
bɛɛ zaŋ gu'a kʋns o yierɛɛ?
3 Bandaug la na bɛlimif ye fʋ zɔɔ o nimbaanligaa?
O na fabil ka nwɛ'ɛf nu'ugɔɔ?
4 O na siak ka fʋn nɛ on maal nɔnaar
ye o liebi fʋ yammʋg hali o nyɔvʋr bɛn wʋsaa?
5 Fʋ na gban'e o mɔri wʋʋ niiŋe fʋ yin
bɛɛ maal o wʋʋ di'ema bʋn ka fʋ yampu'ab gɔsidaa?
6 Ziiŋku'osidib na dii o da'aa?
Ba na pʋdig oo tis ziiŋda'adibaa?
7 Fʋ na tun'e tɔɔn o nɛ kpana,
bɛɛ vʋdig o zug nɛ ziiŋtɔɔndib piema?
8 Fʋ ya'a si'is o nɔɔr yinne,
fʋ kʋ lɛn paasɛ.
9 Pʋn da tɛn'ɛs ye fʋ na tun'e niŋ o si'ela,
fʋ ya'a pʋn nyɛɛ o nɛ nif, fʋ giinla kɛnsidnɛ.
10 Sɔ' kae mɔr sʋnkpi'euŋ hali na tun'e dam oo.
Li daan bɛ yaa na tun'e zi'en o tuonnɛ?
11 Anɔ'ɔn lɛɛ na tun'e lud o ka tiligɛ?
Dunia nwa wʋsa, sɔ' kae na mak oo.
12 M pʋn pʋ lɛn yɛt o gbɛya nɛ o paŋi
galis si'em nɛ on vɛnl si'em.
13 Anɔ'ɔn lɛɛ na tun'e tɛɛgi fulig o gbauŋɔ?
Bɛɛ pʋn nyaŋi li'el o nɛ salibir ye o li'a o?
14 Anɔ'ɔnɛ na tun'e wɛ'ɛgi o nɔɔri ya'ae
ka nyɛɛ o nyina banɛ kpɛn'ɛsid nidib dabiem la?
15 O nya'aŋ gbana la anɛ muula-muula wʋʋ pien ka ba tɔ'ɔŋi sɛn' nɛ.
16 Ba gban'e nɛ taaba kiŋ-kiŋ hali
ka pɛbisim gba kʋ nyaŋi kpɛn'.
17 Ba tɔ'ɔŋ nɛ taaba kimm,
ka li tɔi pamm nɛ sɔ' na nyaŋi wɛligi ba.
18 O ya'a tɛnsim li nwɛnɛ bugum nɛ ian'asidi yit na;
ka o nini mu'oe wʋʋ nintaŋi tansid bɛogʋn nɛ.
19 Bugum pielim yit o nɔɔrin na;
li ian'adnɛ pidʋ-pidʋ.
20 Ka nyɔ'ɔs yiti o nyɔnya ni us-us
wʋʋ dʋk ka ba dʋgʋl bugumin ka li kɔt ka walim yitnɛ.
21 O ya'a vʋ'ʋs, bugumsaana la'aŋid nɛ bugum,
ka bugum yit o nɔɔrin na pidʋ-pidʋ.
22 Paŋ ma'aa pɛ'ɛli o niŋgɔɔnr;
ka o zin'ig wʋsa mɔr dabiem.
23 O niŋgbiŋ gban'anɛ kimm,
li kpi'emnɛ kaŋ-kaŋ ka sɔ' kʋ tun'e dammi li.
24 O sʋnf kpi'emnɛ nwɛnɛ kugir nɛ,
li kpi'emnɛ wʋʋ nɛɛr nɛ.
25 O ya'a duoe zi'en, paŋ dim kiridi nɛ dabiem;
ba zɔtnɛ lɛbid nya'aŋ hali ka o nam pʋ zab nɛ baa.
26 Ba ya'a zaŋ zaba sʋ'ʋgʋ kʋns o, li kʋ niŋ o si'ela;
hali baa ba ya'a kʋns o nɛ piema bɛɛ kpanaa li kʋ niŋ o si'ela.
27 Kʋnt nwɛnɛ kikan'a o san'an,
ka kʋntzɛn'ug nwɛnɛ dapɔn'ɔnsa tis o.
28 Piema kʋ tun'e kad o ka o zɔɔ;
ka luobkugir mɛ nwɛnɛ udugu o san'an.
29 Balaar nwɛnɛ kikan'ari tis o.
Ba ya'a tɔɔn o kpan ka li dammid, li kpɛn'ɛsidi o nɛ la'ad.
30 O pʋʋr la anɛ pa'ad pa'adi,
ka o ya'a vuugi o mɛŋ bian'ar zug
li maannɛ bʋmbɔk wʋʋ na'avuk nɛ.
31 O kɛt ka ku'ozulima la dammid
wʋʋ ku'om bɛ bugumini lɛ'ɛgid nɛ
ka kɛt ka mu'a ku'om nwɛnɛ dʋkʋn kpaam nɛ.
32 O ya'a lugid, pumpuum fukid nɛ
pɛlig wʋʋ zuobpielim nɛ.
33 O tiraan kae teŋgbauŋ zugɔ;
o anɛ bʋnkɔnbkanɛ pʋ zɔt si'ela.
34 O pʋ gɔsi nyɛ bʋnkɔnbkanɛ zem nɛ oo;
onɛ an bʋnkɔnbid wʋsa na'ab.