40
1 Ka Zugsɔb la yɛl Job ya'as ye,2 “Fʋn kanɛ nwa'asid nɛ mam Wina'am Onɛ an Paŋtita'ar sɔb la
na nyaŋi pa'alim man gbɛlig lɔsi'a?
Fʋn kanɛ fiied Wina'am la, gandigim!”
3 Ka Job lɛbis Zugsɔb la ye,
4 “Man aan anɔ'ɔnɛ na tun'e gandisidi fɔ?
Mam nɔki m nu'usi pin' m nɔɔr baanlimm.
5 M pʋn pian' nɔɔrin babiga m kʋ lɛm pian' ya'asɛ,
m pʋn kʋ lɛn yɛl si'ela.”
6 Ka Zugsɔb naam sisi'etita'arin la na pian' tis Job ye,
7 “Gban'ami fʋ mɛŋ kimm wʋʋ dau nɛ
ka m bu'osif bu'osa ka fʋ gandigim.
8 Fʋ bɔɔdi pa'al ye man ka' sida sɔbaa?
Fʋ bɔɔd ye fʋ zɛrig man ka lɛɛ tisi fʋ mɛŋ bʋʋdɛɛ?
9 Fʋ paŋ paae Wina'am paŋaa?
Ka fʋ na tun'e tans ka fʋ kʋkɔr vuud wʋʋ o kʋkɔrɛ?
10 Alaa, duom zi'en ka pa'ali fʋ girima nɛ fʋ vɛnlim an si'em,
pa'alimi fʋ na'am pipilim nɛ fʋ gandaalim.
11 Kɛl ka fʋ sʋnpɛɛn duoe nɛ nyɛɛsim dim,
ka sie ba, ka ba lieb zaalim.
12 Gbɛɛnlim banɛ dʋ'ʋsidi ba mɛŋ la
ka kɛ ka ba lɛbi sig teŋ,
ka nwɛ' tʋʋmbɛ'ɛd dim la bas ban zi'e si'el la vuguri.
13 La'asimi ba wʋsa pin' teŋin;
ka kpari ba bas kpi'im teŋ.
14 Ala ka m na baŋ ka siak ye
fʋ sid na tun'e faaɛn fʋ mɛŋ.
15 Gɔsim Bʋnkɔnbid Na'ab la zem si'em;
manɛ maal o ka mɛ maalif,
amaa ka o ɔnbid mɔɔd wʋʋ naaf nɛ.
16 O paŋ bɛ nɛ o sien,
ka giinl kpi'ema bɛɛ o pʋʋrin.
17 O zʋʋr yibisidnɛ nwɛnɛ na'aziinr nɛ,
ka o gbɛgiinla kpɛn' kiŋ-kiŋ.
18 O kɔnba kpi'emnɛ wʋʋ kʋntzɛn'ug nɛ,
ka o gbɛya kpi'em wʋʋ kʋnt nɛ.
19 Onɛ an bʋntita'ar kanɛ ka Wina'am da dɛŋi maal;
ka Wina'am ma'aa na tun'e li'el o nɛ zaba sʋ'ʋg.
20 On ɔnbid yam sieba bɛ nɛ zuoya ni,
zin'ikanɛ ka mɔɔgin bʋnkɔnbid gɔɔndi giligid la.
21 O dignɛ kɔldaugin tiis teŋir,
zin'ikanɛ ka kɔlkantima duoe an limm la.
22 Kɔldaug nɔɔrin tiis la tisid o ma'asim
ka kɔlkantima la gilig o.
23 Joodan kɔldaug ya'a bɔɔd lin pɛ'ɛlim si'em
ka ku'om la kpɛn'ɛd o nɔɔrin nɛ kpi'euŋ si'em,
la'am nɛ wala o pʋ zɔt dabiem.
24 Anɔ'ɔnɛ na nyaŋi puns o nini ka gban'e o?
Anɔ'ɔnɛ na nyaŋi zaŋ gu'a kʋns o nyɔnya?”