39
1 Ka Wina'am lɛn yɛl Job ye,“Fʋ mi' saŋkanɛ ka sian'arin bʋʋs du'adaa?
Fʋ nif nan mi' nyɛ ka walig du'ad o biisɛɛ?
2 Fʋ mi' ban nɔkid pʋʋg nwadis si'em ka du'adaa?
Fʋ mi' saŋa kanɛ ka ba du'adi baa?
3 Ba ɛɛnti iginɛ ka du'a ba biis
ka zabir la naae.
4 Ba biis la nɔbigidnɛ ka kpɛ'ɛŋid tɔ'ɔtɔ;
ba ya'a kpɛ'ɛŋi naae, ba zɔtnɛ ka basidi ba ma.
5 Anɔ'ɔnɛ kɛ ka mɔɔgin bʋmis gɔɔndi ba ya'aminɛ?
Anɔ'ɔnɛ idigi ba basɛ?
6 Manɛ tisi ba teŋ kanɛ ka nidib kae ka li an pipirig la,
ka ye zin'ig kanɛ ka mɔɔd pʋ yit la na aan ba bɛllim zin'ig.
7 Ba pʋ wʋm tempʋʋgin tʋkpiidʋg
bɛɛ kɛlis nidibi tansidi ba bʋmis ka mugusidi ba si'em laa.
8 Ba gɔɔndnɛ zuoya zuti ieed yam,
ba ieednɛ yamma'asa zin'ig wʋsa.
9 Wɛnaaf na siak ka fʋ lɔɔ o kuaa?
O pʋn na siaki kpɛn' fʋ gariki nii?
10 Fʋ na nyaŋi niŋ o yu'asin ka o vɛ'ɛg kuunrɛɛ?
O na siaki nwɛ' fʋ bɔn'ɔgʋ tisi fɔɔ?
11 Fʋ na yɛl ye on mɔr paŋ la zug,
fʋ na pɛsigi fʋ kuobu tis o ka o kuaa?
12 Fʋ tɛn'ɛs ka o na siaki zii fʋ ki pɔɔgin
bɛɛ zi kibielim zieŋin naa?
13 Niiŋtita'asi'a bɛ pipirigin sa;
o ya'a bɔɔd on nwɛ'ɛmi o kpʋkpama si'em,
amaa o kʋ nyaŋi mak nɛ silʋg kpʋkpama linɛ ian'ad laa.
14 O nyɛ'ɛd o gɛla digin teŋin
ka kɛ ka titanbin'isʋg tʋligidi ba.
15 O ba'a kae ye sɔ' na tun'e nɔɔ ba
bɛɛ bʋnkɔnbid na tun'e nɔɔ ba nwa'ae.
16 O maannɛ o biis nɛ yɔri-yɔri nwɛnɛ ba ka' o biisɛ,
o ba'a kae ye o tʋʋma la na an yɔrii.
17 Linɛ kɛ la, Wina'am pʋ tis o ya'am,
bɛɛ kɛ ka o mi' linɛ an sʋ'ʋm.
18 Amaa o ya'a laki o kpʋkpama ye o zɔ kpɛla,
wiedban'ad nɛ o wief wʋsa kʋ li'el oo.
19 Fʋnɛ tis wief paŋaa?
Bɛɛ kɛ ka o niŋgɔɔnrin gbɛɛnd la sɔbig liŋ-liŋ laa?
20 Fʋnɛ kɛ ka o ian'ad wʋʋ sisɔm
ka sin'im ka dabiem gban'ad nidib laa?
21 O dɛɛdnɛ hali ka li mɔr dabiem, ka pa'annɛ o paŋ
saŋkanɛ ka o dammid ka ian'ad zaba bɔn'ɔgin la.
22 O zi' dabiem an si'ela
ka mɛ pʋ zɔt zaba sʋ'ʋgɔ.
23 Lɔk kanɛ ka ba suud piema la dammid o lʋga ni,
hali ka kpana ian'ad fiaʋn-fiaʋn.
24 Zaba na'atan ya'a ti pieb, o pʋ lɛn tun'e gban'ad o mɛŋa,
o zɔtnɛ ki'ed teŋ la parigid-parigid ka uusʋg duod.
25 Na'atan ya'a ti pieb, o sin'imnɛ,
ka pʋn wʋm zaba nyuug lalli sa,
hali nɛ zaba tuongatib la kuŋ.
26 Silʋgʋ ɛɛnti iank ka yadig o kpʋkpama kpa'ad ya-dagɔbʋg la,
fʋ baŋiri ɛɛn tis o ya'am ka o ian'adaa?
27 Fʋnɛ ɛɛn tis silʋg nɔɔr ka o ianki dʋʋ agɔla sa
ye o tɛɛ o tɛog laa?
28 O tɛɛdi li nɛ zuorin tampinkanɛ wa'am la zug,
anina ka o gbɛɛnd ka si'el kʋ paae oo.
29 Anina ka o ɛɛn gɔs kii
ka nyɛti o diib hali lalli sa.
30 O biis diib anɛ ziim ma'aa
dinzug, bʋnkpiilima bɛ si'el la, o bɛ nɛ anina.”