Zugsɔb la gandig Job
38
1 Ka Zugsɔb la naan sisi'etita'arin la lɛbis Job ye,2 “Fʋ aan anɔ'ɔnɛ bi'esid ya'am pian'ad nɛ pian'ayɛɛd
ka mɛ an onɛ zi' si'ela?
3 Gban'ami fʋ mɛŋ nwɛnɛ bʋraa nɛ
ka m bu'osif bu'osa,
ka fʋ gandigim.
4 Man da ɛɛnb teŋgbauŋ la, fʋ da bɛ yaanɛ?
Fʋ ya'a gban'e li gbin fʋn lɛbisimim!
5 Anɔ'ɔnɛ maki li yalʋŋʋ zem si'em? Mɛ fʋ pʋn mi'!
Anɔ'ɔnɛ zaŋ nwiigi maki li labisim zem si'em?
6 Teŋgbauŋ la ɛɛnbir la sʋn'e bɔ zugɔ,
bɛɛ anɔ'ɔnɛ ba'a li ɛɛnbir kuga la,
7 saŋkanɛ ka bɛogʋn nwadbibis yʋ'ʋm wʋʋ saalib
ka maliaknam tansid nɛ sumalisim la?
8 Atɛuk ku'om da tansi yi teŋgbauŋʋn na
nwɛnɛ biig ka ba du'ad si'em la,
anɔ'ɔnɛ da nyaŋi yɔɔ li
wʋʋ ban kparid dɔɔg si'em la?
9 Manɛ da nɔk saŋgbana pil atɛuk la,
ka bɔbigi li nɛ lik linɛ an biridi la.
10 Saŋkan la m da bia' bi'ena ka li gu' li,
ka maal kʋlis nɛ kʋnt gama kpɛn'ɛsi ba.
11 Ka yʋ'ʋn yɛl ye, ‘Fʋ tun'e pʋbigi paae kpɛ', amaa da gaadɛ;
fʋ ku'opila banɛ dʋt agɔla la bɛnnɛ nwa.’
Anɔ'ɔnɛ da kɛ ka li wʋsa niŋɛ?
Li ka'anɛ manɛɛ?
12 Job, fʋ biilimin sa, fʋ nan mi' kɛ ka bɛog nie,
bɛɛ pa'al sɔɔnrim la li bɛllim zin'igaa?
13 Fʋ nan mi' yɛl nɛɛsim ye li tansim tiig dunia la wʋsa
ka kɛ ka tʋʋmbɛ'ɛd dim yii ba suak zin'isin naa?
14 Nɛɛsim ya'a tans, teŋgbauŋ niednɛ nyain
ka zuoya nɛ bɔn'ɔd wʋsa nie nwɛnɛ fuug nɛ.
15 Li kɛtnɛ ka tʋʋmbɛ'ɛd dim kʋ mɔr nɛɛsim,
ka kɛt ka ba pʋ lɛn nyaŋidi zabida.
16 Fʋ nan mi' keŋ zin'ikanɛ ka atɛuk ku'om yit naa,
bɛɛ vɛɛnsi baŋ dinɛ bɛɛ atɛuk pʋʋginɛ an lik biridi la?
17 Ba nan mi' pa'alif kum za'anɔɔrɛɛ?
Fʋ nan mi' nyɛ kpi'im teŋ kʋlisɛɛ?
18 Fʋ mi' teŋgbauŋ la yalʋŋʋ paae si'em?
Fʋ ya'a mi' nɛ'ɛnam wʋsa, fʋn yɛlimim!
19 Fʋ mi' nɛɛsim la yit si'el naa,
bɛɛ fʋ baŋ liki naanid si'eli kenna?
20 Fʋ na tun'e mɔri ba lɛbis ban yi zin'isi'a naa?
Fʋ mi' suokanɛ ka ba dɔlli kunnaa?
21 Fʋ na yɛl ye fʋ mi' wae, mɛ saŋkan sa ka ba pʋn du'a fɔ!
Waii, fʋ yuug ya woo!
22 Fʋ nan mi' kpɛn' sakuga dɔɔginɛɛ?
Bɛɛ fʋ mi' nyɛ ba suak zin'iga?
23 Manɛ digil sakuga ani gur yɛltɔɔd saŋa,
nɛ dabisbanɛ ka zaba nɛ tanp na li la.
24 Suobɔ ka saa ɛɛn dɔlli ianki widig zin'ig wʋsa?
Sisi'em ɛɛn niŋ wala yit ya-nya'aŋ na widigi tiig teŋgbauŋ la?
25 Anɔ'ɔnɛ maal ku'osuor ka satitada dɔlisid ani niid,
ka maal suor ka sisi'etita'ar nɛ satansʋg yit na?
26 Hali ka niid teŋ kanɛ ka saalib kae
ka mɛ niid pipirisin zin'ikanɛ ka sɔ'ɔsɔ kae.
27 Ka anɔ'ɔnɛ dɔn'ɔsid teŋ kanɛ kʋdig bar-bar la
ka kɛt ka mɔma'asa yit na?
28 Saa mɔr saammaa?
Ka mɛligim mɔr ba'a?
29 Sakuga yinɛ pu'a pʋʋgin naa?
Anɔ'ɔnɛ du'a mɛligim linɛ yi agɔl na ka ma'ad sim-sim la?
30 Ka kɛt ka ku'om ga'aŋi kpɛ'ɛŋ wʋʋ kugir nɛ
ka atɛuk zugin ga'aŋi lieb wʋʋ tampiinga?
31 Fʋ na nyaŋi la'as nwadbibis banɛ bɛ saŋgbana teŋsʋk la bɔbigɛɛ,
bɛɛ idig nwadbibis banɛ yʋ'ʋri buon Nɔnya'aŋ-nɛ-o-biis la basɛ?
32 Fʋ na tun'e kɛ ka nwadbibis la yi saŋkanɛ ka fʋ bɔɔd,
bɛɛ pa'al nwadbibis banɛ yʋ'ʋri buonnɛ A-kidigim-bu'os la ban na keŋ zin'isi'aa?
33 Fʋ mi' wada banɛ gɔsid saŋgbana laa,
ka fʋ na tun'e kɛ ka wada bama tʋm teŋgbauŋ nwa zugɔɔ?
34 Fʋ na tun'e tansi yɛl saŋgbana,
ka saa ni hali ka ku'om la gɛɛli fɔɔ?
35 Fʋ na tun'e tʋm sa-ian'asʋg ka li tʋm fʋn bɔɔd si'el,
ka lɛb na yɛlif ye, ‘Tinamɛ nwana’?
36 Anɔ'ɔnɛ nɔk ya'am tis saal
bɛɛ tis nidib pʋtɛn'ɛr ka ba bakid yɛla?
37 Anɔ'ɔnɛ mɔr ya'am hali na tun'e kaal saŋgbana,
bɛɛ gbɛlig yʋya banɛ bɛ saazug la kpa'ae ku'om la bas na?
38 Ka li kɛ ka uusʋg la'asi kpɛ'ɛŋ wʋʋ kugir,
ka titan la'asi an gammire?
39-40 Gbigima ya'a su'a ba buuginɛ
gur ye bʋnkɔnbid gat ka ba gban'e,
fʋ na nyaŋi gban'e tisi ba
ka ba ɔnbi tigɛɛ?
41 Agaung biis ya'a ɛɛnti kaasidi buon Wina'am
ka ginnɛ ieed diibɔ,
anɔ'ɔnɛ bɔɔd diibi tisidi ba?”