37
1 “Elihu da tʋgisi yɛl ye“Nɛ'ɛŋa kɛnɛ ka m ya'am iank
ka m pʋʋg wʋsa bɔŋim.
2 Kɛlisimi, kɛlisim on tansid si'em
ka wʋm o nɔɔri pian'ad ka li dammid si'em.
3 O kɛ ka saa iank agɔla
hali ti tiig zin'ig wʋsa.
4 Lin nya'aŋ ka ti wʋm o tansʋg la;
o tansʋg la anɛ linɛ mɔr paŋ nɛ girima.
O tansʋg la nya'aŋ,
si'el kae na nyaŋi gu'oe paŋ tita'ar la.
5 Wina'am tansʋg mɔr nyalima.
O tʋm tʋʋm titada ka ti kʋ nyaŋi gban'e li gbinnɛ.
6 O yɛt sakuga ye, ‘Lummi teŋgbauŋ la zug,’
ka yɛt saa ye, ‘Niim sakʋdʋg ka li pʋbid teŋgbauŋʋn la.’
7 O gu'od ninsaalib wʋsa ba tʋʋma ni,
ala ka nidib wʋsa na baŋ o tʋʋma an si'em.
8 Ka bʋnkɔnbid mɛ bɔɔd su'asa zin'ig;
ba zɔtnɛ kpɛn'ɛd zin'ikanɛ ka saa kʋ bʋ' baa.
9 Sisi'etita'ar la yitnɛ ya-dagɔbʋg na,
ka waad linɛ ma'ad sim-sim la yit ya-datiuŋ na.
10 Wina'am vʋ'ʋsʋm kɛtnɛ ka ku'om ga'aŋ nwɛnɛ kugir nɛ
hali ka ku'otitada lieb wʋʋ tampiing nɛ.
11 O kɛt ka saŋgbana pɛ'ɛl nɛ ku'om,
ka kɛt ka saa ian'asid pil-pil saŋgbana la ni.
12 Onɛ kɛt ka saŋgbana yadigi gilig teŋgbauŋ la wʋsa
ka dɔlisid on zi'eli li si'em la.
Li sid maan on gban'e ye ba maal si'el wʋsa.
13 O tun'e tʋm saa na
ka li namis saalibi ba tʋʋmbɛ'ɛd zug,
ka mɛ tun'e kɛ ka saa nii maal zʋʋd
ka li pa'al on an sʋ'ʋm si'em.
14 Job, kɛlisim nɛ'ɛŋa sʋ'ʋŋa;
an baanlimm ka gɔs Wina'am tʋʋmnyalima an si'em.
15 Fʋ mi' Wina'am niŋ si'em kɛt ka saŋgbana bɛi,
bɛɛ on kɛt ka saa ian'asidi li pʋʋgin si'em laa?
16 Fʋ mi' lin niŋ si'em ka saŋgbana yul agɔlaa,
li ka'anɛ Wina'am tʋʋmnyalimaa?
17 Fʋn kanɛ ka pɛbistʋʋlʋg ya'a ɛɛn naan ya-dagɔbʋg na
ka ɔnsir di'e fʋ fuug matti la
18 na tun'e sʋŋ Wina'am yadig saŋgbauŋ,
ka kɛ ka li kpi'em ka ian'ad nwɛnɛ gɔtiŋɔɔ?
19 Pa'alimi ti tinamɛ na yɛl Wina'am si'el;
bɔzugɔ ti nɔɔr kpari ka ti zi' tinamɛ na yɛl o si'ela,
ka li anɛ tinamɛ bɛ likin biridi la yɛla.
20 Man kʋ siak ye m pian' tis Wina'am;
bɔ ka m kɛt ka o ti san'amidim yɔri-yɔri?
21 Sɔ' kae na tun'e gɔs winnig
linɛ nie nyain saŋgbauŋin la.
Li kas-kas anɛ sisi'em ya'a ti da'ae
ka pɛbisim la pie uusʋg la ka li maligim nie nyain.
22 O naan ya-datiuŋʋ kenna ka ian'asid pil-pil wʋʋ sanlim nɛ;
Wina'am la kenna nɛ o na'am pipilim.
23 Wina'am Onɛ an Paŋtita'ar sɔb la bɛ lalli sa
ka sɔ' kae na tun'e paae o san'anɛ;
asida o paŋ la gat si'el wʋsa.
O anɛ sida nɛ pʋpielim sɔb,
ka pʋ mugusid sɔ'ɔsɔ.
24 Alazug ka saalib woo na'asid o.
O mɛ pʋm pʋ gɔsi nyɛ banɛ ye ba anɛ ya'am dim laa.”