36
1 Ka Elihu nan kpɛn ken tuonnɛ yɛt ye,2 “Ma'ami fʋ mɛŋ bi'ela nwa
ka m naae Wina'am mɔr si'el ye m yɛlif la.
3 Man ya'am la zu'onɛ galis;
alazug m na kɛ ka fʋ baŋ Wina'am onɛ maalim la yɛla
ye o anɛ pʋpiel ka tʋm linɛ nar.
4 Baŋim sʋ'ʋŋa ye man yɛtif si'el la, ziri ka' li nii;
man kanɛ zi'e fʋ tuon nwa anɛ onɛ mɔr baŋir pamm.
5 Wina'am anɛ paŋ sɔb, amaa o pʋ ziemid sɔ'ɔsɔ.
O mɔr paŋ tita'ar ka o ya'a gban'e si'el o na maali li ka bi'esʋg kae.
6 O pʋ kɛt ka tʋʋmbɛ'ɛd dim nyɔvʋr wa'ama,
ka lɛɛ tisid banɛ namisid la bʋʋd.
7 Wina'am pʋ yisid o nif pʋpielim dim nii;
o dʋ'ʋsidi ba ka ba zin' nɛ na'anam,
ka kɛt ka ba an girima dim saŋa linɛ ka' naarɛ.
8 Amaa ba ya'a ti lɔ saalib nɛ baans,
ka ba bɛ namistita'ar pʋʋgin,
9 o nied ban tʋm si'el la pa'annɛ ba,
ka kɛt ka ba baŋid ye li anɛ ban tʋm tʋʋmbɛ'ɛd ka mɔr nyɛɛsim la zug.
10 O kɛt ka ba baŋid ban gbɛlig si'em,
ka yɛti ba nɛ nimmua ye ba tiakim ka sɔs suguru ba tʋʋmbɛ'ɛd zug.
11 Ba ya'a siak ka lɛb na dɔl o,
o niŋidi ba zug yɛlsʋm ba nyɔvʋr bɛllim wʋsa,
ka ba bɛ nɛ sumalisim, hali nɛ ba kum dabisir.
12 Amaa ba ya'a zan'as ka pʋ kɛlisɛ,
ba na kʋʋ ba nɛ zaba sʋ'ʋs,
ka ba kpi yɔri-yɔri.
13 Banɛ pʋ niŋ Wina'am yadda la mɔri sʋnpɛɛn saŋa wʋsa,
hali o ya'a ba'a ba nɛ bana, ba kʋ sɔs o ka o sʋŋi baa.
14 Ba kpiidnɛ ka ba daar nam pʋ paae,
ba naar wʋsa anɛ nyan nɛ zufa'asim.
15 Wina'am dɔlisidnɛ namisʋg pʋʋgin faand banɛ bɛ namisʋgʋn la,
namisʋg saŋa ka o pa'annɛ ba ya'am.
16 Wina'am mɔrif nɛ baanlimm yis yɛla ni na,
ka mɔri fʋ keŋ zin'ikanɛ ka yɛlpakir kae,
ka li anɛ diib nɛ nuub ma'aa.
17 Amaa nannanna fʋ di'e sariakadib linɛ nar nɛ tʋʋmbɛ'ɛd dim la,
sariakadib linɛ an yɛlsida la na gban'af.
18 Gu'usim ka da kɛ ka sɔ' pan'asif nɛ o mɔrimm;
da kɛ ka ba zaŋ kpan'am kpɛn'ɛsif mɔɔgɔ.
19 Fʋ tɛn'ɛs ye fʋ mɔrim bɛɛ fʋ mɛŋ-mɛŋ paŋ
na nyaŋi yisif yɛla nii?
20 Da mɔr ti'ir ye yʋ'ʋŋ sɔb
ka fʋ vɛ' nidibi yisi ba, ba yaanɛ.
21 Mid ka fʋ lɛb tʋʋmbɛ'ɛdin;
fʋ namisʋg la anɛ li gu'uf ka fʋ da lɛb tʋʋmbɛ'ɛdinɛ.
22 Gɔsima, Wina'am paŋ la ka' tiraana.
Anɔ'ɔnɛ an pa'annɛ nwɛnɛ on an si'em la?
23 Anɔ'ɔnɛ na tun'e pa'al o linɛ nara
bɛɛ yɛl o ye, ‘Fʋ gbɛlig ya!’
24 Tiɛnm ka zun'e o nu'ugʋ tʋm si'el la
linɛ ka saalib yʋ'ʋm ka pian'ad saŋa wʋsa la.
25 Sɔ' wʋsa nyɛ Wina'am tʋʋma la;
amaa ba nyɛɛ li nɛ lalli sa.
26 Ya'a an sida, Wina'am galis nɛ hali
ka ti kʋ nyaŋi baŋ on zem si'em!
O yʋma ka' bɛnnɛ.
27 Onɛ kɛt ka ku'om yit teŋgbauŋ zugʋ
dʋt agɔla kilim saa niid.
28 O kɛt ka saŋgbana la kpa'ad saa
ka li nii tiig teŋ wʋsa.
29 Anɔ'ɔnɛ na tun'e baŋ on niŋ si'em yadigid saŋgbana la,
bɛɛ satansʋg la tansidi dammidi
yit agɔl zin'ikanɛ ka o bɛ la?
30 Gɔsim on kɛ ka saa iank agɔl pililili si'em,
ka atɛuk pʋʋgin lɛɛ an lik biridi.
31 On gur buudi wʋsa si'em nwa.
O kɛt ka saa niid ka zʋʋd maan,
ka saalib nyɛt diib bɛdegʋ dit.
32 Onɛ mɔr sa-ian'asʋg la paŋ
ka on bɔɔd ye li kpa' zin'isi'a la, ani ka li ken.
33 Saa ya'a ti tans, li pa'an ye sisi'etita'ari na dɔl;
hali niigi mɛ mi' ye li kenna.