35
1 Ka Elihu lɛn yɛl ye,2 “Fʋ tɛn'ɛs ka nɛ'ɛŋa dɔl suorɛɛ? Fʋ yɛt ye,
‘Wina'am na tisim bʋʋd.’
3 La'am nɛ wala fʋ bu'os o ye,
‘M ya'a pʋn ye m kʋ tʋm bɛ'ɛdɛ,
di nyɔɔd an bɔ ka m na di'e?’
4 Tɔ, m na gandig fʋn
nɛ fʋ zuanam nwa wʋsa.
5 Ʋkimi fʋ nindaa gɔs agɔl;
fʋ nyɛ saŋgbana la bɛ saazug si'em laa?
6 Fʋ ya'a tʋm bɛ'ɛdɛ li niŋid Wina'am bɔ?
Fʋ tʋʋmbɛ'ɛd ya'a zu'oe galisɛ, li niŋid o bɔ?
7 Ka fʋ ya'a tʋm pʋpielim, li paasid o bɔ,
bɛɛ bɔ ka Wina'am bɔɔdi fʋ san'anɛ?
8 Fʋ tʋʋmbɛ'ɛd la namisidnɛ fʋ saal taaba ma'aa,
ka fʋ pʋpielim tʋʋma mɛ sʋŋidi ninsaalib gʋllim.
9 Ba ya'a mugus saalib, ba kaasidnɛ
ka sɔsid yɔlisim banɛ mɔr kpi'euŋ la ni.
10 Amaa sɔ' pʋ bu'osid ye, ‘M Wina'am onɛ maalim la bɛ yaa?
Onɛ tisidim yʋʋma ye m yʋ'ʋm yʋ'ʋŋ la bɛ yaanɛ?
11 Onɛ pa'annɛ ti baŋir ka li gat on pa'an
bʋnkɔnbid banɛ bɛ teŋgbauŋ zug la,
ka tisidi ti ya'am ka li gat niimis banɛ ian'ad agɔla la.’
12 Saalib ya'a kaasidi bɔɔd sʋŋir, o pʋ gandigida,
ka li anɛ tʋʋmbɛ'ɛd dim nyɛɛsim la zug.
13 Wina'am pʋ kɛlisidi ba fabilyɛɛd la;
Onɛ an Paŋtita'ar sɔb la ba'a pʋn kae nɛ baa.
14 Ka fʋn kanɛ ye fʋ pʋ nyɛt o la;
o na niŋ wala wʋm tisi fɔ?
La'am nɛ fʋn yɛt ye fʋ bɛɛ o tuon
ka gur ye o maali fʋ yɛla la.
15 Fʋ tɛn'ɛs ye Wina'am sʋnf pʋ duodaa,
ka lɛn yɛl ye o ba'a kae nɛ tʋʋmbɛ'ɛd dimi tʋm si'ela.
16 Alazug ka Job ya'ae o nɔɔrɛ pian'ad pian'ayɛɛd,
ka pʋn zi' on yɛt si'ela.”