34
1 Ka Elihu yʋ'ʋn yɛl ye,2 “Wʋmminɛ m pian'ad, yanam banɛ an ya'am dima;
kɛlisimi, yanam banɛ zamis ka mɔr mi'ilim hali la.
3 Bɔzugɔ, tʋbiri wɛligid pian'ad
wʋʋ zilimi lɛmmid diib si'em la.
4 Kɛlli ka ti mɛŋ-mɛŋ kpansi baŋ linɛ an sida;
kɛlli ka ti zamisi baŋ linɛ an sʋm.
5 Job yɛl ye, man ka' taalɛ:
‘Amaa Wina'am pʋ tisim m bʋʋdɛ.
6 La'am nɛ man mɔr sida la,
o ye m anɛ ziri sɔb;
la'am nɛ mam pʋ tʋm taal la,
o pu'alimim bɛ'ɛd bɛ'ɛdi.’
7 Fʋ nan mi' nyɛ sɔ' ka o nwɛnɛ Job, bɛɛ?
O nɔk nimpʋnannim ka li nwɛnɛ ku'om ka o nuudnɛ.
8 Bugusim dim ma'aa aan o sɔnsidim taas;
ka o dɔllim taas an tʋʋmbɛ'ɛdim gʋllim.
9 Bɔzugɔ o yɛt ye, ‘Ninsaal ya'a bɔɔd on ma'am Wina'am sʋnf si'em
ka o kʋ dii li nyɔɔdɛ.’
10 Dinzugɔ, kɛlisimi sʋ'ʋŋa yanam banɛ an ya'am dim la.
Wina'am kʋ maligin tʋm tʋʋmbɛ'ɛdɛ
Onɛ an Paŋtita'ar sɔb la kʋ niŋ linɛ pʋ nara.
11 Wina'am yɔɔd tʋʋmbɛ'ɛd dim nɛ
ka li dɔlisid ban tʋm si'em la;
asida ban tʋm tʋʋmbɛ'ɛd si'a la na dɔlli ba.
12 Ya'a an sida, Wina'am kʋ tʋm bɛ'ɛdɛ,
Onɛ an Paŋtita'ar sɔb la kʋ nyɛ piel ka ye sabillɛ.
13 Anɔ'ɔnɛ tis Wina'am suor ka o sʋ'oe teŋgbauŋ la?
Bɛɛ anɔ'ɔnɛ da kɛ ka o sʋ'ʋg dunia nwa wʋsa?
14 Wina'am ya'a gban'anɛ o pʋtɛn'ɛrin
ye o vaae o siig nɛ o vʋm lɛbis o mɛŋ ni,
15 ninsaalib wʋsa naan mɛlimin;
ba naan lɛbin tintannin.
16 Fʋ ya'a sid mɔr ya'am tun'e bakid yɛla,
fʋn kɛlisim ka wʋm man ye m yɛl si'el la.
17 Ninkanɛ kis yɛlsida na tun'e an na'aba?
Ka fʋ na tun'e zɛrig Wina'am Onɛ an Paŋtita'ar sɔb
ka an sida daan nɛ paŋ sɔb laa?
18 Ka' Onɛ yɛt na'anam ye,
‘Ya pʋ mɔr vɔɔnrɛ,’
ka yɛt yʋ'ʋr dim ye, ‘Ya anɛ bugusim dim laa?’
19 O pʋ kpɛn'ɛd kpɛɛmnam zug
bɛɛ gɔs ka kpan'am dim gat nɔŋ dima;
bɔzugɔ, onɛ maali ba wʋsa.
20 Ba tun'e kpi yʋ'ʋŋ tisʋʋs nif aŋir pʋʋgin;
Wina'am kɛt ka saalib kpiid vuguri,
ka yisid kpi'euŋ dimi ba kpi'euŋ zin'igin ka li pʋ tɔiya.
21 Saalibi ken zin'isi'a wʋsa, Wina'am gɔsidnɛ,
o nyɛti ba nɔbir yakir wʋsa.
22 Lik zin'ig bɛɛ su'asir kae
ka tʋʋmbɛ'ɛd dim na tun'e su'aa.
23 Li ka' tilas ye Wina'am dɛŋin gban'e
zi'el saŋkanɛ ka o na kat saalib sariaa.
24 O ya'amin ka o yisid kpi'euŋ dimi ba zin'isin ka pʋ vɛɛnsida
ka kɛ ka sieba di'e ba zin'ig.
25 On mi' ba tʋʋma la zug
ka o yisidi ba yʋ'ʋŋ vuguri,
ka ba yɛla wʋsa naae.
26 Saalib nini ni ka o bʋ'ʋdi ba
ban tʋm taal la zug.
27 Bɔzugɔ, ba zan'as ye ba kʋ dɔl oo,
ka ba ba'a kae o zi'ela la nii.
28 Ba namisid nɔŋ dim ka ba kaasid
ka li tuak Wina'am sʋnfʋn.
29 Amaa o ya'a gban'e ye o kʋ lɛbis si'ela, anɔ'ɔnɛ na zɛrig o?
O ya'a su'a o nindaa, anɔ'ɔnɛ na tun'e nyɛɛ o?
La'am nɛ wala onɛ sʋ'oe saalib nɛ sʋ'ʋlim wʋsa,
30 ka na gu' ka bugusim sɔb kʋ di na'am
ka bɛnd saalibi kpɛn'ɛsi ba mɔɔgɔ.
31 Amaa nid ya'a yɛl Wina'am ye,
‘M tʋm taal, m kʋ lɛm pɔ'ɔgi fɔ.
32 M ya'a tʋm taal ka zi',
fʋn pa'alimim ka m kʋ lɛm paasɛ.’
33 Fʋn sadigim ki'is Wina'am nɔɔr la,
fʋ tɛn'ɛs ka o na tisif fʋn bɔɔd si'elaa?
Fʋnɛ na baŋi li, ka ka' manɛ;
dinzug, yɛlim fʋn gban'e si'em.
34 Nimbanɛ gban'ad pian'ad gbin la yɛl ya,
ka ya'am dim mɛ siak man yɛt si'el la ka ye,
35 Job pian'adnɛ ya'am ka'alʋg pian'ad;
o pian'ad la pʋn ka' vɔɔnrɛ.
36 Fʋ ya'a kpans Job pian'ad ka gɔsi li kii,
fʋ na baŋ ye li anɛ sida ye o sid anɛ tʋʋmbɛ'ɛd sɔb.
37 Li kas-kas anɛ on tʋm bɛ'ɛd ka lɛn ki'is Wina'am nɔɔr la,
ka zi'e ti tuonnɛ pian'adi takidi
maligim tukid Wina'am sʋnf.”