33
1 Amaa Elihu lɛn yɛl ye,“Job, nannanna kɛlisimi m pian'ad;
kɛlisim man ye m tu'asif si'el la sʋ'ʋŋa.
2 M yʋ'ʋn na ya'ae m nɔɔri pian'
ka yɛli m nɔɔri mɔr si'el.
3 M pian'ad la anɛ pʋpielim pian'ad;
li yitnɛ m sʋʋnrin na, ka faad kae.
4 Wina'am Siig la maal mam;
Onɛ an Paŋtita'ar sɔb la vʋ'ʋsʋm kɛ ka m vʋe.
5 Fʋ ya'a na nyaŋ, fʋn gandigim;
ti'ebim sʋ'ʋŋa, ka ti gandis taaba.
6 Man nɛ fʋ anɛ yinne Wina'am tuon;
ba mɛ nɔk nɛ ya'adi maalim.
7 Da kɛ ka man yɛla kpɛn'ɛsif dabiem,
bɛɛ tɛn'ɛs ye m na mugusif halii.
8 Amaa fʋ yɛlim nyain ka m tʋba wʋm,
asida m pʋn wʋm pian'abama wʋsa, ye,
9 ‘M anɛ nyain ka pʋ mɔr tʋʋmbɛ'ɛdɛ;
m anɛ nyain ka ka' taalɛ.
10 La'am nɛ wala, Wina'am ye m tʋm taal;
o zaŋim ka m lieb o dataa.
11 O gbarim nɛ bana;
ka man ken zin'isi'a wʋsa ka o gɔsidim.’
12 Amaa m yɛtif ye fʋ ka' bʋʋd nɛ'ɛŋa nwa nii,
bɔzugɔ, Wina'am gat saal woo.
13 Bɔ kimm ka fʋ nyɔn
ye o pʋ gandigid ninsaal bu'osa wʋsa?
14 Wina'am ɛɛn pian'anɛ pian'ad kɔn'ɔb-kɔn'ɔb,
amaa ka saal pʋ gban'adi li gbinnɛ.
15 Saalib ya'a ɛɛn gbisid yʋ'ʋŋ la,
saŋkan la ka Wina'am nied yɛla pa'annɛ ba zaansʋŋ pʋʋgin.
16 O pian'adi tisidi ba ka nied yɛla pa'annɛ ba,
ka kɛn'ɛsidi ba nɛ nimmua.
17 Linɛ na kɛ ka ba bas tʋʋmbɛ'ɛd
ka gu'usid nɛ ba dʋ'ʋsi-m-mɛŋ wʋsa ni.
18 Ala ka o na gu' ba ka ba kʋ kpii,
bɛɛ ba sig kpi'im teŋa.
19 Wina'am mɛ tun'e digil nid nɛ ban'as
hali ka li wʋm o sʋ'ʋŋa, ka zabid o hali.
20 Ani ka o yaama yinɛ diib,
ka diib ya'a pʋn malis si'em o pʋ bɔɔda.
21 Ka o waŋim hali naae,
ka kpɛlim kɔnbdaad ma'aa.
22 Saŋkan ka o yʋ'ʋn li'el yaʋg,
ka o nyɔvʋr bɛ Akum nu'usin.
23 La'am nɛ wala maliaknam tusa si'em la ni yinne
ya'a zi'en o nɔba zugʋ aan o nu'unwɛ'ɛd,
ka yɛl niŋkan sɔb linɛ nar,
24 ka zɔɔ o nimbaanlig ka yɛl ye,
‘Da kɛ ka o ba'as yaʋgʋnɛɛ;
bɔzugɔ m yɔɔ o sam.’
25 Ala ka o niŋgbina na lɛn kpɛ'ɛŋ;
ka o lieb nwɛnɛ on da an dasaŋ la.
26 Ka o ya'a sɔs Wina'am o na zɔɔ o nimbaanlig,
o na nyɛ Wina'am nindaa ka maal sumalisim pamm;
ka Wina'am lɛbis o zi'el bɛllim sʋŋin.
27 Ka o zi'en nidib tuon ka yʋ'ʋm yɛl ye,
‘Man da tʋm tʋʋmbɛ'ɛd, ka niŋ linɛ pʋ nara,
amaa ba daa pʋ tɛki m tʋbir wʋʋ lin nar si'em.
28 O faanm siig ka m pʋ kpii,
ka m na bɛ nɛɛsimin vʋe nɛ sumalisim.’
29 Wina'am sid tʋmnɛ anwa saŋa pamm
tisid saalib;
30 ka faandi ba yisid kumin
ka kɛt ka vʋm nɛɛsim niedi ba san'an.
31 Job, an baanlimm ka wʋm;
kɛlisimi m pian'ad la sʋ'ʋŋa.
32 Fʋ ya'a mɔr lɛbisʋg, fʋn lɛbisim.
Pian'am ka m bɔɔd ye fʋ nyɛnɛ bʋʋd.
33 Ya'a ka' alaa, fʋn kɛlisim mam mɔr si'el ye m yɛlif;
an baanlimm, ka m na pa'alif ya'am.”