Elihu
32
1 Nidib atan' nwa da pʋ lɛm pian' Job si'ela bɔzugɔ o da tɛn'ɛs ye o pʋ mɔr gbɛlʋŋɔ. 2 Amaa Elihu onɛ an Barakɛl biig ka an Ram yir nid ka yi Buz na la da bɛɛ ani, ka o sʋʋnr da pɛlig nɛ Job hali, on tɛn'ɛs ye o anɛ pʋpiel ka nyɔn Wina'am la zug. 3 O sʋʋnr mɛ da pɛlig nɛ Job zuanama atan' la bɔzugɔ ban da pʋ nyaŋi pa'al o gbɛlʋŋʋ an si'ela, ka li kɛ ka li nwɛnɛ Wina'am ka' bʋʋd la.4 Job zuanama atan' la da an kpɛɛmnam ka Elihu an biigi ba sʋʋgin la zug, o da sinni baanlimm ka ba pian'ad. 5 Amaa on da nyɛ ka ba fɔn ka pʋ lɛbisid Job ya'as la, o sʋʋnr da pɛlignɛ.
6 Ka Elihu onɛ an Barakɛl biig ka yi Buz teŋin na la yɛl ye;
“Yanamɛ an kpɛɛmnam
ka man an biigi ya sʋʋgin la zug
ka m zɔɔ ya nif ka pʋ lɛbisi m nɔɔrɛ.
7 M tɛn'ɛs ye, ‘Zuobpielim na pian'ad nɛ ya'am
ka ayʋma-zu'oya mɛ an baŋir.’
8 Amaa li ya'a an sida, li anɛ siig kanɛ bɛ ninsaalin,
ka Wina'am Onɛ an Paŋtita'ar sɔb la vʋ'ʋsi niŋ o pʋʋgin la
linɛ tisid baŋir.
9 Li ka' banɛ kʋdig ma'aa mɔr ya'am
bɛɛ mi' linɛ an sidaa.
10 Alazug ka m yɛl ye,
Kɛlisimi man mɛ mɔr kʋkɔsi'a ye m lɛbis
ka mam mɛ na yɛli ya mam mi' si'el.
11 Tɔ, yanamɛ pian'adin la, m mɔdiginnɛ an baanlimm,
ka kɛlisid ka ya mɔ hali
ye ya nyɛ ya'am pian'adi lɛbis o.
12 M mɔdigi kɛlisi ya pian'ad la hali,
amaa ya sɔ'ɔsɔ pʋ nyaŋi pa'al Job gbɛlʋŋ,
bɛɛ on tʋm si'el ka li pʋ naraa.
13 Mid ka ya yɛl ye, ‘Tinamɛ mɔr ya'am si'a nwa:
ti bas o niŋ Wina'am nu'ugin,
ka onɛ mi' on na niŋ o si'em.’
14 Amaa Job pʋ pian' tisi ma,
alazugɔ m kʋ gandig o wʋʋ yanamɛ lɛbis o si'em laa.”
15 Ka Elihu yʋ'ʋn yɛl ye,
“Li nyaŋi ba nɛ ka ba zi' ban na lɛn lɛbisif si'ela;
ba nɔɔr lɛbnɛ biaunkin.
16 Ban sadigim fɔn ka zi' ban na lɛbis o si'em la,
m kpɛm mɔdigi sinnaa?
17 Mam mɛ na lɛbisi m nɔɔr;
m mɛ na yɛl mam mi' si'el.
18 Bɔzugɔ, pian'ad pamm bɛɛ m sʋʋnrin,
ka m zig ye m mɔdigi gʋ'ʋŋ.
19 M sʋʋnr pɛ'ɛli nɛ pian'ad
nwɛnɛ daam na pɛ'ɛl yʋʋr hali bɔɔd fudigir si'em la.
20 M na pian' ka vʋ'ʋs,
m na ya'ae m nɔŋgban nɛ pian'.
21 M kʋ pian' baregaŋ pian'ad
bɛɛ m pian' dʋ'ʋs sɔ'ɔɔ.
22 M ya'a mi'in baregaŋ pian'ad,
Wina'am onɛ maalim la naan san'aminim.”