31
1 Ka Job da lɛn yɛl ye,“Mam pɔ nɛ ye m kʋ zaŋi m nini
gɔs pu'asadir nɛ yamlɛogɔ.
2 Ya'a ka' ala m yɔɔd na an bɔ kimm Wina'am san'anɛ?
Bɔ ka Wina'am Onɛ an Paŋtita'ar sɔb la na tisimi li zugɔ?
3 Li ka'anɛ san'auŋ ma'aa ka o tisid nimbɛ'ɛdnam,
ka kɛt ka banɛ tʋm bɛ'ɛd ba'asid yɔri?
4 O pʋ nyɛt mam bɛ bɛllim si'aa,
hali ka mi' m nɔba yakir kallɛɛ?
5 M ya'a aan pʋʋs ayi' sɔb
bɛɛ anɛ onɛ ma'adi tisidi m taaba,
6 Wina'am on makim tituaa nɛ sida makir
ka o na nyɛ ka m ka' gba'arɛ.
7 Man ya'a sid bienɛ ka bas suosʋŋ la,
ka kɛ ka m ya'amlɛog kpɛn' dinɛ an bɛ'ɛd,
bɛɛ nɔki m nu'ugʋ tʋm bɛ'ɛd,
8 Wina'am on kɛl ka m pɔɔg zʋʋd san'am,
bɛɛ o kɛ ka sieba dii m diib la ka basim.
9 M ya'amlɛog ya'a kpɛn' nɛ sɔ' pu'a
bɛɛ m ya'a digin nɛ m yak pu'a,
10 Wina'am on kɛl ka mam mɛŋ pu'a mɔnnɛ tisid dau zʋŋ,
ka dap mɔr o digi.
11 Nid ya'a tʋm tʋʋmfɛn'ɛsa bama buudi,
li nar ye ba kʋʋs o daana bɛ'ɛd ka tɛk o tʋbir.
12 Li na nwɛnɛ bugum nɛ diimɛ paae kpi'im teŋ
ka na di mam nɛ m mɔrim wʋsa.
13 M ya'a daa tʋm linɛ pʋ nari tisim tʋmtʋm dap nɛ tʋmtʋm pu'ab
ka ba fabili tisim ka m pʋ wʋm tisi ba,
14 Wina'am sʋnf ya'a ti duoe nɛ ma, m na niŋ wala?
O ya'a ti bu'osim bu'osa m na niŋ wala gandigɛ?
15 Ka' Wina'am kanɛ maal man la mɛ maali baa?
Ɛɛn! Onɛ sid maali ti wʋsa ti manam pʋʋsin.
16 M nan zi' zan'as ye m kʋ sʋŋ nɔŋ dima,
bɛɛ kɛ ka pʋkɔnya gɔsi m nini ni ti tadig ka pʋ nyɛ si'ela.
17 M da diti m kɔn'
ka zan'as ye m kʋ sʋŋ kpiibisɛɛ?
18 Bɔzugɔ, m na'akinnimin sa, m gɔsi ba wʋʋ m mɛŋ-mɛŋ biis nɛ,
m biilimin sa m ba'a bɛnɛ pʋkɔnya yɛla.
19 M nam mi' nyɛ sɔ' ka o bɔɔd sʋŋir
hali ka nɔŋ kɛ ka o kʋ nyaŋi paam fuugʋ lus o mɛŋ,
20 ka m pʋ tis o fuugɔɔ? Ayei! Li naan kʋ dɔllin suorɛ!
Amaa m tis o fubanɛ ka ba nɔk bʋnkɔnbid kɔnbidi maal
ka li yinɛ m mɛŋ kɔnbidin na,
ka o pʋ'ʋsim nɛ o sʋʋnr wʋsa.
21 M nan mi' vɔlis kpiibig
mam mɔr suobanɛ na tisim bʋʋd na'ayin la zugɔɔ? Ayei!
22 M ya'a tʋm ala, m biaunk on aam li,
ka m nu'ug kɔ'ɔgi li sʋn'urin la.
23 Man zɔt ye Wina'am na san'amim la zug
m pʋn kʋ siaki tʋm nɛ'ɛŋaa.
24 M ya'a nɔkini m mɛŋi dɛllim nɛ sanlima
bɛɛ tɛn'ɛsi m pʋtɛn'ɛrin ye, ‘Sanlim sʋma ka man ti'e,’
25 bɛɛ nwɛ'ɛdin nyɔ'ɔgʋ m mɔrim zug,
bɛɛ man tʋm paam si'el zug,
26 bɛɛ m ya'a gɔsin winnigi ian'ad pil-pil la,
bɛɛ nwadig la pɛlig puki si'em la
27 ka m ya'am kpɛn' ba
ka m pin'ili pʋ'ʋsidi ba,
28 lina wʋsa naan aan tʋʋmbɛ'ɛd linɛ nar namisʋg
bɔzugɔ li pa'al ye m pʋ tis Wina'am onɛ an yinne la sidaa.
29 M dataa ya'a daa namisid, m daa pʋ maan sumalisim,
bɛɛ o bɛ yɛla ni ka li ma'ae m sʋʋnrɛ,
30 m pʋ pɔ nɔɔri niŋ o
ka li kɛ ka m kpɛn' taalinɛ.
31 M yin nidib la wʋsa sɔ' kae ka kʋ yɛl ye,
‘Anɔ'ɔnɛ bɛ Job yin ka nan zi' dii tigɛ.’
32 Saan sid nan zi' gbɛn yiŋa,
bɔzugɔ m di'esid saam wʋsa m yin.
33 Man pʋ su'a m tʋʋmbɛ'ɛd
wʋʋ sieba niŋid si'em la.
34 Mam pʋ zɔt nidibi na pian' m yɛla si'em.
M mɛ pʋ zɔt ye m yidim na diisim nyan
ka linzug kɛ ka m fɔn baanlimm ka kʋ yi yiŋa.
35 Kassa, sɔ' kae na wʋm tisi maa?
M pɔya ye man yɛl si'el la wʋsa anɛ sida.
Gɔsima, m tiki m nu'ug.
Kɛl ka Wina'am Onɛ an Paŋtita'ar sɔb la wʋm tisim!
Sɔm man tʋm taal si'a ka li an kasɛt,
ala ka m na nyɛ sumbʋgʋsʋm.
36 Asida mɛnɛ, m na zaŋi li buki m biankimpiiung zug.
M na pidi li nwɛnɛ na'am zupibig nɛ.
37 M na yɛl Wina'am man tʋm si'el wʋsa,
ka ʋki m zug agɔla o tuon.
38 M ya'a zuun pɔɔg kanɛ ka m kuod la
bɛɛ faaɛn li yi o daana nu'ugin,
li na kaasi pa'al ye m tʋm taal.
39 M ya'a di pɔɔg la zʋʋd
ka kɛ ka banɛ kua kuob la kpiid kɔ'ɔm,
40 Wina'am on kɛl ka m ya'a bʋd ki nɛ mui,
mɔɔd nɛ gɔn'ɔs ma'aa on yim.”
Job antu'a naarɛ la.