30
1 Job da lɛn yɛl ye,“Amaa nannanna nwa ba la'ad mam nɛ,
hali na'akim baanlʋg
banɛ an bɛɛga-bɛɛga biis,
ka man da pʋ siakid ye
ba saamnam dɔlli m baasi
gur kɔnbid la.
2 Ba da tadignɛ hali
ka ka' paŋi na tʋmi m tʋʋmaa tisidi ma.
3 Nɔŋ nɛ kɔ'ɔm da mɔri ba hali
ka ba gʋ'ʋŋi ɔnbid tiis nya'a,
ka yʋ'ʋŋ ka ba gɔɔndi gin mɔɔgin nɛ pipirisin.
4 Ba da vɔɔndnɛ tutuud pipirisin ɔnbid
hali ka la'am ɔnbid nya'a banɛ pʋ mɔr mimilimm.
5 Nidib da kadi ba nɛ yis saalibi bɛ zin'isi'a,
ka wuunnɛ ba wʋʋ ba anɛ na'ayiis nɛ.
6 Di da nyaŋi ba ka ba bɛ kɔldaad banɛ ka ku'om kae la pʋʋg,
nɛ tampinlɛma ni, hali nɛ vɔnya ni.
7 Ba da bɛ nɛ mɔɔgin kaasid wʋʋ bʋnkɔnbid nɛ
ka la'asi kʋk taaba dig mɔɔgin.
8 Ba da anɛ banɛ ka' vɔɔnrɛ ka sɔ' mɛ zi' ba yɛlaa,
ba da nɔk kpa'asa kadi ba yis teŋin la.
9 Amaa nannanna ba biis gɔs mam nɛ zaalim
ka mɔri m yʋ'ʋri yʋ'ʋm;
m pʋ lɛm mɔr vɔɔnri tisi baa.
10 Ba nɛ'ɛsid man nɛ ka pʋ bɔɔd ye ba li'eli ma;
ka tʋbisid nintɔɔndi mat man nindaa.
11 Wina'am kɛ ka m lieb tadim ka ka' sʋŋid la zug,
ka nidib mɔrimi niŋid bam bɔɔd si'el.
12 Ba la'as nɛ m datiuŋ baba gubigim;
ba tu nɛ bʋmbu'ad m nɔba baba;
ka gban'e ye ba zab nɛ m.
13 Ba vi' m suori lɛbis
ka mɔɔd ye ba kʋʋm
ka sɔ' kae na faaɛn ma.
14 Ba li' m nɛ wʋʋ zabzabidibi nwa'ae zaŋguom
ka dɔl wɛlʋgʋ kpɛn' na.
15 Dabiem kɛ ka m pabig.
M burikinnim la wʋsa gaadi nwɛnɛ sisi'em nɛ,
ka m mɔrim la mɛlim wʋʋ saŋgbana nɛ.
16 Nannanna nwa mam vʋm paadi li bɛn;
m namisʋg la dabisa ka' naarɛ.
17 Yʋ'ʋŋ wʋsa m kɔnba nwa'adnɛ hali
ka m niŋgbina zabid ka pʋ ma'ada.
18 Wina'am zaŋ nɛ o paŋ tita'ar la gban'e m niŋgɔɔnri siank
wʋʋ fuug niŋgɔɔnri muknɛ.
19 O zaŋimnɛ lɔbi bas bian'arin,
ka m yʋ'ʋn lieb wʋʋ titan nɛ tampɛligim.
20 M Wina'am, man kaasi buolif, ka fʋ pʋ gandigi ma;
ka m duoe zi'en ka fʋ gɔsidim ka pʋ yɛl si'ela.
21 Gɔsima, fʋ namisid man nɛ;
fʋ zaŋ nɛ fʋ paŋ tita'ar la tʋmim nyɔnbid.
22 Fʋ kpɛn ʋk man nɛ lɔbigi bas ka sisi'em mɔrimi keŋ sa;
ka nwɛ'ɛmi yutim-yutim sisi'etita'arin la.
23 Mam mi' ye fʋ na ba'asi kʋʋm,
ka m keŋ saalib wʋsa naad zin'isi'a la.
24 Sɔ' nan zi' namis ninkanɛ bɛ tɔɔg pʋʋgin
ka buon ye ba kena faaɛn o basɛ.
25 M da pʋ kaasi fabil banɛ bɛ yɛla ni la yɛlaa?
M sʋʋnr da pʋ san'am nɔŋ dim yɛlaa?
26 Amaa mam mɛ ya'a ti tɛn'ɛs ye sʋ'ʋm na kena la, bɛ'ɛdi kenna;
m ya'a ti tɛn'ɛs ye nɛɛsim na kena la, liki kenna.
27 M sʋʋnr san'am nɛ hali ka ka' ma'arɛ;
namisʋg bɛɛ m zugin daar wʋsa.
28 M gɛnnɛ nɛ sʋnsa'aŋ ka onɛ bɛlisidim kae.
M duoe zi'en wʋrʋginɛ nwɛ' kuŋ ye ba sʋŋim.
29 M yʋ'ʋn nwɛnɛ zaŋku'ar sizua,
ka an viiug bɛllim taa.
30 M niŋgbiŋ wʋsa sɔbig nɛ hali
ka tʋligi nwɛnɛ bugum nɛ.
31 M yʋ'ʋn nwɛ'ɛdi m kɔn nɛ sʋnsa'aŋ nwɛ'ɛb ma'aa
ka piebidi m wiig kʋʋr piebʋg ma'aa.”