29
1 Job keŋ tuon nɛ o pian'ʋk la ye,2 “Waii, man ya'a nan kpɛn aan wʋʋ man da bɛ si'em
saŋkanɛ ka Wina'am da gɔsidim sʋ'ʋŋa la,
3 ka o fitir la nie m zugin lauu
ka m kennɛ o nɛɛsimin la!
4 Saŋkan ka man da nan bɛɛ m naŋnaŋin
ka Wina'am onɛ aan m zua la gur man nɛ m yidim la.
5 Wina'am Onɛ an Paŋtita'ar sɔb la da nan bɛ nɛ m,
ka m biis mɛ bɛɛ m san'anɛ zu'oe,
6 saŋkan la ka m mɔrim galis
hali ka kpaam kpa'adi yit tampiinsin na olif kpaam nɛ tisidim.
7 Kpɛɛmnam ya'a da ɛɛnti la'as
ka m kena zin'inɛɛ,
8 dasam da ɛɛn lɛb nɛ nya'aŋ sa
ka bʋnkʋda pɔnd nɔba m tuonnɛ na'asidim.
9 Tuongatib da ɛɛn zaŋ nɛ ba nu'usi pin' ba nɔya
lɛbi fɔn baanlimm.
10 Hali burikinnam da ɛɛn fɔnnɛ baanlimm
nwɛnɛ ba sɛɛn ba nɔya nɛ.
11 Banɛ wʋsa da wʋmmi m labaar la da pian'adi m yɛla sʋ'ʋm,
ka banɛ wʋsa nyɛɛm siak ye m sid anɛ ninsʋŋ.
12 Bɔzugɔ, nɔŋ dim ya'a da kaasidi bɔɔd sʋŋir, m sʋŋidi ba
hali nɛ kpiibis banɛ ka' sʋŋida.
13 Banɛ ka li da wʋmi ba hali ka ba wʋm kum nyuug la
da kaanb kaanbsʋŋɔ tisim;
m mɛ da sʋŋ pʋkɔnya ka ba sʋnya ma'ae.
14 M da yɛ pʋpielim nwɛnɛ fuug nɛ,
ka pid sida nwɛnɛ zupibig nɛ.
15 Manɛ da an zʋnzɔɔs nini
nɛ pɔnda nɔba.
16 Manɛ da an tadimnam saam;
ka di'e saam yɛla zi.
17 M da kɔ' bugusim dim nu'us
ka faaɛn banɛ ka ba gban'e ba la bas.
18 M da tɛn'ɛs ye, ‘M na yuug hali pamm,
ka nyaan kpii m mɛŋ yin.
19 M da nwɛnɛ tikanɛ nya'a bɛ ku'omin saŋa wʋsa
ka o vaand pɛ'ɛl nɛ mɛligim.
20 M girima la na kpɛn kennɛ tuon
ka m nyɛt kpi'euŋ paal saŋa wʋsa.’
21 M ya'a da ya'ae nɔɔr ye m sa'al nidib,
ba anɛ ki' ka kɛlisid nɛ ya'amlɛog.
22 M ya'a da pian' naae, sɔ' pʋ lɛm pian'ada,
bɔzugɔ, m pian'ad la da ɛɛn lii ba tʋba ni
ka bʋgʋli ba sʋʋnr.
23 Ba da ɛɛn gur nɛ ya'amlɛog ye ba wʋmi m pian'ad
wʋʋ kpaadi gur sigsaa si'em la.
24 M ya'a da lɔdigi m nindaa tisi ba,
ba sʋʋnr ɛɛn kpɛ'ɛŋnɛ.
25 Manɛ da gban'adi ba gban'ar wʋsa tisidi ba
ka gaadi ba tuon wʋʋ na'abi gati o zabzabidib tuon si'em la,
ka bɛlisidi ba saŋkanɛ ka ba bɛ mugusʋg pʋʋgin wʋsa.”