28
1 Ka Job lɛn yɛli ba ye,“Bʋmbɔk kanɛ ka ba tuudi nyɛt anzurifa la bɛnɛ,
ka ban nyɛligid sanlima zin'isi'a mɛ bɛ.
2 Ba tuud kʋnti yisid teŋin na,
ka nyu'od kuga yisid kʋntzɛn'ug.
3 Sanlim tuudib mɔri bugum kpɛn'ɛd sanlimbɔkin;
ba tuudi paad zin'ibanɛ an lik biridi wʋsa ieed sanlima.
4 Ba ɛɛn gɔsnɛ nidibi kae zin'isi'a la
tu vɔndʋg hali ka li zulim
ka zaŋ nwiigi lɔɔ dɔlisi sigi bɛɛ anina ba kɔn'ɔkɔn'.
5 Zʋʋd yitnɛ teŋgbauŋ zugin,
ka li teŋir-teŋir sa nwɛnɛ bugum dii kanb nɛ.
6 Teŋ la tampiinsin ka kugvɛnla yit na,
ka sanlima ɛɛnti li titanin na.
7 Niiŋ kae m mi' zin'ig la
ka silʋg nif mɛ nan zi' nyɛɛ li.
8 Mɔɔgin bʋnkɔnbid pʋn pʋ nɔɔdi ba nɔba anii,
ka gbigim gba pʋ dɔl ani gata.
9 Saalib tuudnɛ hali nwa'ad tampinkpi'ema;
ba tuudi zuoya hali paadi ba teŋir.
10 Ba tuudnɛ ka nyaad vɔnya tampiinsin la,
ka nyɛt kugvɛnla nɛ linɛ ligidi zu'oe la wʋsa.
11 Ba ieedi baŋid kɔldaadi pin'il si'el na,
ka mɔr dinɛ wʋsa su'a yi nɛɛsimin na.
12 Ya'a an sida, ya ka ti na nyɛ ya'am?
Ka ya ka baŋir bɛ?
13 Ninsaal ya'am kʋ baŋi lii;
fʋ kʋ maligim nyɛ li saalibinɛ.
14 Ku'otitada nɛ Atɛuk yɛl ye,
‘Ya'am kae tinam san'anɛ.’
15 Fʋ kʋ nyaŋi da' ya'am nɛ sanlim vɛnliŋ,
bɛɛ zaŋi li mak nɛ anzurifaa.
16 Ofir teŋ sanlim sʋma kʋ nyaŋi da' lii,
fʋ mɛ kʋ nyaŋi da' li nɛ kugvɛnla buudi wʋsaa.
17 Fʋ kʋ nyaŋi zaŋ sanlima bɛɛ gɔtiŋvɛnla mak nɛ lii,
bɛɛ da' li nɛ sanlima niŋgɔnkɔrisɛ.
18 Kugpielvɛnla nɛ li buudi mɛ pʋ li'eli lii;
bɔzugɔ ya'am gaad si'el wʋsa.
19 Kus teŋ kugvɛnla linɛ an dɔnbʋʋlim la kʋ nyaŋi mak nɛ lii;
fʋ mɛ kʋ nyaŋi da' li nɛ sanlimaa.
20 Ka yaanɛ kimm ka ya'am yina?
Ka ya ka baŋir bɛ?
21 Li su'anɛ ka bʋnvʋr kae na tun'e nyɛɛ li,
hali niis banɛ ian'ad agɔla nan zi' lin bɛ si'ela.
22 Hali Asan'auŋ nɛ Kpi'im Teŋ yɛl ye;
‘Tinam mɛ kʋdim wʋmi nɛ tʋba.’
23 Wina'am ma'aa mi' ya'am suor,
ka mɛ mi' lin bɛ zin'isi'a.
24 Bɔzugɔ, onɛ gɔsidi nyɛt teŋ-magbinnin
ka mɛ nyɛt dinɛ niŋid teŋgbauŋ zug wʋsa.
25 Onɛ da maal pɛbisim nɛ li paŋ wʋsa,
ka mak ku'okanɛ bɛ saŋgbana ni la zem si'em,
26 ka tis saa nɔɔr lin na ni si'em
ka maal suori tis satansʋg.
27 O da gɔs ya'am sʋ'ʋŋa
ka siak ye li an sʋ'ʋm pamm.
28 Ka yɛl saalib ye, ‘Nid ya'a bɔɔd ya'am, on zɔm Wina'am,
o ya'a bɔɔd baŋir on zɔm yi tʋʋmbɛ'ɛdin tɔ'ɔtɔ.’ ”