27
1 Job da nan kpɛn pian'ad ye,2 “M pɔya nɛ Wina'am, onɛ mɔŋim bʋʋd la,
Onɛ an Paŋtita'ar sɔb ka kɛ ka m bɛllim lieb tɔɔg la,
3 m ya'a nan kpɛn bɛɛ m nyɔvʋr zug,
ka Wina'am nan kɛ ka m vʋe,
4 m nɔɔr nwa kʋ maligin ya'ae pian' bɛ'ɛdɛ,
m zilim mɛ kʋ maligim pian' linɛ an zirii.
5 M kʋ maligim siak ye yanamɛ yɛt si'el la anɛ sidaa,
hali baa kunya bɔkinɛ, m kʋ yɛl ye m ka' sida sɔba.
6 M nam kpɛm bɛɛ m pʋpielim bɛllim la ka kʋ basɛ;
m pʋtɛn'ɛr na kpɛn an nyain hali nɛ m kum.
7 Wina'am na namisi m dataas nɛ banɛ kisim la
nwɛnɛ on namisid nimbɛ'ɛdnam si'em la.
8 Ti'ir bɔ ka onɛ pʋ zɔt Wina'am mɔr
saŋa kanɛ ka Wina'am di'e o nyɔvʋrɛ?
9 Yɛltɔɔd ya'a ti paae o ka o kaasida,
Wina'am na wʋm o kukumaa?
10 O na nyɛ sumalisim Wina'am san'anɛɛ?
O pʋn na sɔs Wina'am ʋʋn?
11 M na pa'ali ya Wina'am paŋi zem si'em;
m kʋ su'a ya Wina'am Onɛ an Paŋtita'ar sɔb la yɛlaa.
12 Ya wʋsa pʋn nyɛ linɛ naam wʋsa;
ka bɔzug ka ya pian'ad pian'ayɛɛd bama?
13 Wina'am gban'e ye o tʋm tʋʋmbɛ'ɛd sɔb
nɛ pitɔɔg dim si'em nwa:
14 hali baa o biis ya'a zu'oe si'em, ba wʋsa ye ba kpinɛ zaba ni;
o yaas kʋ maligim di ka li sia'ali baa.
15 Ban'as na kʋʋ o bibanɛ pɔns zaba ni la
hali ka ba pʋkɔnya kʋ kaasi ba kʋʋrɛ.
16 Tʋʋmbɛ'ɛd daan ya'a bɔɔd on vaae anzurifa su'a si'em,
hali ka mɔr fuud ka li galis si'em,
17 pʋpielim sɔb na yɛ fuud la wʋsa;
ka onɛ ka' taal mɛ di'e anzurifa la.
18 Yir kanɛ ka o mɛɛd la nwɛnɛ silinsi'ipaanlʋŋ nɛ,
bɛɛ sʋgʋr ka ba ti' gur pɔɔg.
19 O dig nɛ kpan'am zug, amaa ka kʋ maligim bɛɛ ala,
o nif aŋir ka li pʋn gaad sa.
20 O yam na iank wʋʋ ku'om ɛɛn di nid ka li an si'em la;
ka sisi'etita'ar zii o yʋ'ʋn gaad.
21 Sisi'em na yi ya-nya'aŋ na zii o gaad;
di na piis o on bɛ zin'isi'a la gaad.
22 On mɔɔd ye o zɔɔ yi sisi'emin la
li na nwɛ' o yutim-yutim ka nimbaanlig kae.
23 Sisi'em la vuud nɛ paŋ tita'ar hali
kpɛn'ɛsid o dabiem ka kad o yis o bɛllim zin'igin la.”