Job
26
1 Ka Job lɛbis ye,2 “Waii, gɔsim fʋn sʋŋ ninkanɛ ka' sʋŋid si'em!
Gɔsim sʋŋ kanɛ ka fʋ sʋŋ tadim nwa!
3 Waii, gɔsim fʋn sa'al ninkanɛ ka' ya'am si'em!
Waii, fʋ sid pa'al ye fʋ mɔr ya'am pamm!
4 Anɔ'ɔn kimm lɛɛ sʋ'ʋŋif ka fʋ pian' anwana?
Anɔ'ɔnɛ tisif pʋtɛn'ɛr ka fʋ pian' pian'abama?
5 Gɔsim kpi'imnam banɛ bɛ teŋin nɛ ku'om pʋʋgin la,
ba wʋsa kiridnɛ nɛ dabietita'ar.
6 Hali kpi'im teŋ gba pʋ su'ad nɛ Wina'am;
li wʋsa nie nɛ nyain o nini ni.
7 Wina'am yadig saŋgbauŋ la ya-datiuŋ,
ka maal teŋgbauŋ la ka li yul ka si'el pʋ mɔri li.
8 Onɛ kɛ ka saŋgbana la pɛ'ɛl nɛ ku'om
ka lɛɛ kʋ tɛbigi tansi li naa.
9 O tiɛnd o saŋgbana la
libin nwadpielig.
10 O buoɛn atɛukʋn la ka li mɔr bɛn-bɛn
ka li bɛŋ nɛɛsim nɛ lik.
11 Wina'am ya'a tans,
zan'antɔlis banɛ ti'e saŋgbauŋ la dammidnɛ nɛ dabiem.
12 Wina'am zaŋ nɛ o paŋ tita'ar la nyaŋ Atɛuk;
ka zaŋ o ya'am aans bʋnzɔtir linɛ bɛ ku'otita'arinɛ buon Rahab la.
13 Wina'am vʋ'ʋsʋm kɛ ka agɔl nie nyain;
ka o nu'ug kʋns wa'akanɛ ian'ad ka nwɛɛlimɛ o mɛŋ hali la.
14 Gɔsima, nwa' wʋsa anɛ Wina'am tʋʋma bi'ela la,
ban nya'am yɛl ka ti wʋm si'eli nwa!
Ka anɔ'ɔnɛ na tun'e baŋ o paŋ la an si'em?”