Job lɛbisʋg
42
1 Ka Job lɛbis Zugsɔb la ye;2 “M mi' ye fʋ na tun'e maal si'el wʋsa;
fʋn gban'e si'el wʋsa sɔ' kae na nyaŋi gu'oe li.
3 Fʋ bu'os ya ye, ‘Oŋa aan anɔ'ɔnɛ bi'esid ya'am pian'ad
ka mɛ an onɛ zi' si'ela?’
Ya'a an sida, m pian'adi bʋn linɛ ka m pʋ gban'e li gbinnɛ,
yɛl nyalima banɛ ka mam mɛŋ pʋn zi'.
4 Fʋ yɛl ye, ‘Kɛlisim ka m na pian';
m na bu'osif bu'osa,
ka fʋ gandigim.’
5 M tʋba daa wʋmi fʋ yɛla
amaa nannanna m nini nyɛɛf.
6 Alazug, m gɔs ka man niŋ si'el la kʋdim pʋ dɔl suorɛ
lin ka m sɔs suguru
ka bugi m mɛŋ nɛ titan nɛ tampɛligim.”
Wina'am lɛbis Job mɔrim tis o
7 Zugsɔb la n yɛl Job nɛ'ɛnam wʋsa naae la, o yɛl Elifaz onɛ yi Teman na la ye, “M sʋnf duoe fʋn nɛ fʋ zuanama ayi' la, bɔzugɔ ya pʋ pian' m yɛla sida wʋʋ Job n pian' si'em laa. 8 Alazug, zaŋimi na'araad ayɔpɔi nɛ pɛraad ayɔpɔi keŋ maal nyu'or malʋŋʋ ya mɛŋ zug. M tʋmtʋm Job na sɔsi tisi ya, ka m na siak o sɔsʋg ka kʋ niŋi ya wʋʋ ya zɔlim tʋʋma la narin si'em la. Ya pʋ pian' m yɛla sʋ'ʋm wʋʋ m tʋmtʋm Job n pian' si'em laa.” 9 Ala ka Elifaz onɛ yi Teman la na, nɛ Bilidad onɛ yi Suh la na, nɛ Zofar onɛ yi Naama teŋin na la niŋ wʋʋ Zugsɔb la yɛli ba si'em la; ka Zugsɔb la di'e Job sɔsʋg.
10 Job da sɔsi tis o zuanam la, Zugsɔb la da lɛbisi o mɔrim la tis o ka li gaad on da mɔr si'em la nɔɔr ayi'. 11 O ba'abiis wʋsa da kennɛ o yin na ka ba la'am dit, nɛ banɛ wʋsa da mi' o ka yɛltɔɔd naan paae o la. Ba da bʋgʋl o sʋnf ka bɛlis o, Zugsɔb la da kɛ ka yɛla pamm paae o la zug. Ka ba yinne, yinne tis o anzurifa la'af nɛ sanlima baŋ.
12 Wina'am da niŋ Job zug bareka hali gaad on da nyɛ si'em pin'ilʋgʋn la. O da mɔr kɔnbid tusa pii nɛ anaasi nɛ yʋgʋma tusa ayuobʋ nɛ lɔlkuoda tusa ayi', nɛ bʋnnya'as tusir. 13 O mɛ da mɔr biribis ayɔpɔi nɛ bipumis atan'. 14 O da pʋd bipuŋ kpɛɛm la yʋ'ʋr ye Jemaima ka pʋd onɛ tia'al la yʋ'ʋr ye Keeziya nɛ onɛ pa'a la ye Keren-hapok. 15 Pu'a sɔ' da kae teŋgbauŋ la wʋsa zugʋ vɛnl wʋʋ Job pu'ayuos laa. Ba saam da kɛ ka ba la'as nɛ o biribis la ka o pʋdig o faari tisi ba wʋsa.