24
1 Ka Job lɛn yɛl ye,“Wala ka Wina'am Onɛ an Paŋtita'ar sɔb la pʋ gban'e dabisbanɛ ka o na kad saria?
Bɔzug ka banɛ dɔl o la zi' dabisbama nwa?
2 Bugusim dim la tɔlisidi ba pɔɔd titɔndis,
ka zuud kɔnbidi paasidi ba pɛ'ɛsin.
3 Ba kad kpiibis bʋmisi keŋ sa
ka faaɛn pʋkɔɔnr lɔlig on pʋ nyaŋi yɔɔ o sam la zug.
4 Ba da'ae nɔŋdimi yis suorin
ka kad tadimnam ka ba zɔɔ su'a.
5 Nɔŋdaannam saadnɛ mɔɔgin
ieed diib wʋʋ bʋmis nɛ;
ba biis ginnɛ pipirisin ye ba nyɛ si'eli di.
6 Ba dɔlisidi nidib pɔɔdinɛ
ki'ed kɔnbid yaama
ka wi'isid zʋʋd pitɔɔg dim pɔɔdinɛ tisidi ba.
7 Ba dig yʋ'ʋŋ nɛ biel,
ba pʋ mɔr dinɛ na pili ba mɛŋ waad saŋaa.
8 Ba bɛ nɛ zuoya zut ka saa bʋ'ʋdi ba
ka ba zɔti ken tampiinsin ye ba labin ka li lusi ba.
9 Bugusim dim la pɔnsigid bibanɛ ka' saamnam la ba manam bin'isimin;
ka faand nɔŋ dim biisi yɔɔd sama.
10 Fara dim la ginnɛ sawɛnya ban ka' fuud la zug
ba bunnɛ kpan'am dim ki, ka lɛɛ ken kɔ'ɔm.
11 Ba tuod olif biili siligid kpaam
ka maan bʋnnuuda ka ken nɛ ku'onuud.
12 Tempʋbɛda la ni nidib ʋʋnsidnɛ bɔɔd kum
ka sieba pu'alim ka kaasidi bɔɔd sʋŋir
amaa ka Wina'am ba'a kae nɛ baa.
13 Ninsieba zan'as nɛ ye bam pʋ bɔɔd nɛɛsim,
ba pʋ gban'e nɛɛsim la gbinnɛ
ka mɛ pʋ siak ye ba dɔlli li suorɛ.
14 Bɛog ya'a ti yɔe nier la, ninkʋʋd la duodnɛ
kʋʋd nɔŋ dim nɛ tadimnam;
ka yʋ'ʋŋ ka o an na'ayiigi giligid.
15 Pu'abɔɔd guri ye li sɔb,
ka o zaŋ si'eli lus o nindaa
ka tɛn'ɛs ye, ‘Sɔ' kʋ nyɛɛ ma.’
16 Yʋ'ʋŋ ka ba labisidi kpɛn'ɛd yaan,
ka bɛog nie ka ba yɔɔ ba mɛŋ dɔɔgin;
ka pʋ bɔɔd nɛɛsim baa bi'elaa.
17 Ba zaŋ lik biridi ka li an nɛɛsim tisi ba,
ka lɛɛ zɔt nɛɛsim dabiem.
18 Tʋʋmbɛ'ɛd dim la nwɛnɛ pusinpuum
ka ku'om diti ken sa;
Wina'am nɔpɔɔr bɛɛ ba pɔɔd zug,
alazug ka sɔ'ɔsɔ pʋ lɛn kennɛ ba pɔɔdin laa.
19 Nintaŋi nyɛligid sakuga si'em la,
ala mɛn ka tʋʋmbɛ'ɛd dim na bɔdig dunia zug.
20 Ba manam pʋn tami ba yɛla nɛ
ka zunzunya diti ba.
Sɔ' pʋ lɛn tɛnr tʋʋmbɛ'ɛd dim la yɛlaa,
ba nwɛnɛ tiig ka sisi'em kɔ'ɔgi bas nɛ.
21 Ba mugusidi kundu'ada
ka pʋ zɔt pʋkɔnya nimbaanliga.
22 Wina'am nɔkid o kpi'euŋʋ vɛ'ɛd paŋ dim la basid;
la'am nɛ ban tɛn'ɛs ye ba mɔr paŋ la,
ba vʋm bɛ nɛ Wina'am nu'ugin.
23 Wina'am kɛ ka ba bɛ nwɛnɛ yɛlsi'a pʋ paki baa,
amaa o nini gɔti ba ken wʋsa.
24 Ba diti ya'an daba ayi',
ka yʋ'ʋn sʋʋg wʋʋ mɔpuum nɛ,
ba nwaadi ba nɛ nwɛnɛ ki ka ba bʋn si'em la.
25 Ya'a ka' alaa anɔ'ɔn na pa'al ye m ka' sida sɔba,
ka kɛ ka man tu'as si'el la wʋsa lieb yɔri?”