Job
23
1 Ka Job lɛbis ye,2 “Hali zina m nan kpɛn nyɔnnɛ nɛ sʋnpɛɛn;
la'am nɛ din wʋmim ka m unsid la,
Wina'am nan kpɛm mugusidim nɛ.
3 M ya'a baŋin man na nyɛɛ o zin'isi'a;
ka paae o na'am zin'igin la!
4 Man naan yɛli nɛ o m yɛla la wʋsa
ka nwɛ' nɔŋgban kpi'euŋ nɛ o nɛ nimmua.
5 M naan baŋin on na gandigi m yɛl la si'em,
ka kɛlis on na yɛlim si'el.
6 O na zaŋ o paŋ tita'ar la zab nɛ mam bɛɛ?
Ayei, o na kɛlisi m pian'ad la.
7 Ani ka ninkanɛ an pʋpielim sɔb na mɔr o antu'a kɛɛn o tuon na,
ani ka m na paam faangir m sariakat la san'an saŋa linɛ ka' bɛnnɛ.
8 Amaa m ya'a keŋ ya-nya'aŋ, o ka' anii;
m ya'a keŋ ya-tuona, m kʋ nyɛɛ o anii.
9 O ya'a bɛ ya-datiuŋʋ tʋmmaa, m kʋ nyɛɛ o;
o ya'a fɛndigi lɛb ya-dagɔbʋgɔ, m kʋ baŋ on bɛ si'ela.
10 Amaa on mi' suokanɛ ka man dɔl la;
o ya'a ti makimi naae, m na nyɛɛn wʋʋ sanlim nɛ.
11 Man dɔl Wina'am suor la tituaa;
m dɔl o nɔba ka pʋ bie lɛb gɔbʋg bɛɛ datiuŋʋ.
12 M pʋ bie ka bas o nɔzi'ela la;
m di'e o nɔyɛlʋg la ka li gaadi m diib.
13 Nɛ wala wʋsa, on ma'aa an Wina'am ka sɔ' kae na ki'is oo
bɛɛ na tun'e kɛ ka o bas on gban'e ye o tʋm si'em la.
14 On gban'e ye o tʋm mam si'em la, linɛ bɛ.
O mɛ mɔr gban'asieba man zug.
15 Alazug ka m yam ian'ad o zug,
m ya'a tiɛn nɛ'ɛŋa wʋsa dabiem mɔrim nɛ.
16 Wina'am kɛ ka m giinla kɛns,
Onɛ an Paŋtita'ar sɔb la kɛ ka dabietita'ar kpɛn'ɛm.
17 Amaa la'am nɛ wala, lik pʋ nyaŋi kɛ ka m fɔn baanlimm nɛ,
hali baa di ya'a bɔɔd lin sɔbigim biridi si'em.”