Elifaz
22
1 Ka Elifaz onɛ yi Teman la lɛbis ye,2 “Ninsaal ya'am ya'a bɔɔd din zem si'em
amaa di ka' vɔɔnri tis Wina'am.
3 Fʋ ya'a pʋn an sida sɔba,
li sʋm an bɔɔ tis Wina'am
Onɛ an Paŋtita'ar sɔb la?
Bɛɛ fʋ ya'a an onɛ pʋ mɔr taala, nyɔbɔ ka o na nyɛ?
4 Di anɛ fʋn zɔt Wina'am la zug ka o tansidif,
ka kati fʋ saria anwa, bɛɛ?
5 Fʋ zi' ye fʋ bugusim tʋʋma la zu'onɛ galis
ka fʋ tʋʋmbɛ'ɛd la ka' bɛnnɛɛ?
6 Fʋ faaɛn fʋ ba'abiis banɛ dii fʋ sam fuud ka li pʋ nara,
fʋ yɛɛs nidib la'ad ka basi ba sawɛnya.
7 Fʋ daa pʋ nɔk ku'om tis banɛ ka ku'onuud kʋʋdi baa,
ka lɛm mɔŋ banɛ ka ba kɔ'ɔm zabid la diib,
8 la'am nɛ fʋn da an kpi'euŋ sɔb ka mɔr kuob pamm
ka zin' anina nɛ fʋ girima wʋsa la.
9 Fʋ da kad pʋkɔnya ka ba lɛb nu'uzaalis,
ka tʋm kpiibis dinɛ pʋ nara.
10 Linɛ kɛ ka bɛndis giligif zin'is wʋsa,
ka dabiem ɛɛn gbirigi gban'af saŋa wʋsa la.
11 Linɛ mɛ kɛ ka li an lik biridi ka fʋ pʋ nyɛta,
ka ku'om limif zin'is wʋsa la.
12 Wina'am pʋ bɛ nɛ saazug saa?
Gɔsim o dʋʋ gaad nwadbibis banɛ bɛ agɔlli ian'ad pidʋ-pidʋ la.
13 Amaa fʋ yɛl ye, ‘Wina'am mi' bɔ?
O na nyaŋi nyɛ likine kad nid sariaa?
14 O bɛ nɛ saazug sa gin
ka saŋgbantita'ar ligil o, ka o pʋ nyɛti tii.’
15 Fʋ na kpɛn dɔl suokʋdʋg
kanɛ ka tʋʋmbɛ'ɛd dim dɔl laa?
16 Ba da kpi ka pʋ paae ba daarɛ,
ka li nwɛnɛ ku'om dii ba gaadnɛ.
17 Ba da yɛl Wina'am ye, ‘Basimi ti baanlimm!
Bɔ ka fʋn, Wina'am Onɛ an Paŋtita'ar sɔb la, na nyaŋi niŋi ti?’
18 Amaa gɔsima, li anɛ Wina'am pɛ'ɛli ba ya' nɛ bʋnsʋma.
Tʋʋmbɛ'ɛd dim pʋtɛn'ɛr pʋn bɛ nɛ li kɔn'.
19 Pʋpielim dim ya'a nyɛ ka tʋʋmbɛ'ɛd dim namisid
ba maannɛ sumalisim;
ka banɛ ka' taal la la'adi ba ka yɛt ye,
20 ‘Asida mɛnɛ, ba san'ami ti dataas la
ka bugum dii ba mɔrim la wʋsa.’
21 Siakim tis Wina'am ka paam sumbʋgʋsʋm;
fʋ ya'a niŋ ala, o na niŋi fʋ zug yɛlsʋm.
22 Di'em o pa'alʋg
ka zaŋi li niŋi fʋ sʋʋnrin.
23 Fʋ ya'a fɛndigi lɛb Wina'am Onɛ an Paŋtita'ar sɔb la san'an na,
o na lɛn lɛbisi fʋ, fʋ zin'ikʋdigin la.
Fʋ ya'a yis tʋʋmbɛ'ɛdi fʋ yin
24 ka basi fʋ sanlimgbila la,
lɔmmi fʋ sanlim sʋma la bas tampinyɔ'ɔdin,
25 ka Onɛ an Paŋtita'ar sɔb la na aan fʋ sanlima,
ka an anzurifa dinɛ bɛɛ li gʋnni tisif.
26 Ala ka fʋ sʋnf na malis Wina'am Onɛ an Paŋtita'ar sɔb la ni
ka fʋ na gɔdigi gɔs Wina'am.
27 Fʋ na sɔs o, ka o na kɛlisi fʋ sɔsʋg
ka fʋ na nɔki fʋ piini tis o
wʋʋ fʋn pʋn zi'el nɔɔr si'em la.
28 Fʋ ya'a gban'e si'el wʋsa, li na zi'en
ka nɛɛsim na nie fʋ suoya zan' ni.
29 Yɛla ya'a sigis nidib teŋin
ka fʋ yɛl ye, ‘Wina'am, dʋ'ʋsimi ba!’
O sid na tiligi ba wʋsa.
30 Hali onɛ ka' bʋʋd la, o na faaɛn o bas,
ka li anɛ fʋ nu'usi an nyain la yɛla.”