Job
21
1 Ka Job lɛbis ye,2 “Kɛlisimi sʋ'ʋŋa ka m pian' tisi ya;
ya ya'a siak, li na bʋgʋli m sʋʋnr.
3 Dimi suguru ka kɛ ka m pian',
ka m ya'a pian' naae ka ya bɔɔd, yanam la'aminim.
4 M pʋ nyɔnnɛ tisid ninsaala
dinzug m kʋ di suguru.
5 Ya ya'a gɔs man an si'em la ma'aa li na lidigi ya
ka ya pin' nɔɔri zin' baanlimm.
6 M ya'a tɛn'ɛs bʋn linɛ paae mam nwa,
di kpɛn'ɛsidim nɛ waad nɛ dabiem.
7 Di niŋ wala ka nimbɛ'ɛdnam vʋe yuugid hali,
ka ba kpi'euŋ paasida?
8 Ba nini ni ka ba biis nyɛt zi'esim linɛ an sʋ'ʋŋa,
ka ba yaas la nɔbigid hali.
9 Yɛlbɛ'ɛd pʋ kpɛn'ɛdi ba yir pʋʋginɛ,
ka dabiem mɛ pʋ mɔri baa;
Wina'am mɛ pʋ namisidi baa.
10 Ba na'araad dʋti ba na'anya'as
ka ba du'ad ka pʋ vɛnbisida.
11 Ba biis ian'adnɛ wʋʋ pɛ'ɛs nɛ,
ka wa'ad nɛ sumalisim.
12 Ba yʋ'ʋmnɛ ka nwɛ'ɛd siyada nɛ kɔna,
ka piebid wiisi maan sumalisim.
13 Ba dit nɛ malisim ba vʋm saŋa wʋsa,
hali ka ti kpi nɛ nimma'asim.
14 La'am nɛ wala ba yɛt Wina'am ye, ‘Basimi ti baanlimm!
Ti ba'a kae nɛ fʋn gban'e ti yɛla si'em.
15 Anɔ'ɔnɛ an Wina'am Onɛ an Paŋtita'ar sɔb la ka ti na pʋ'ʋs o?
Ka ti ya'a pʋ'ʋs o, nyɔbɔ ka ti na paam?’
16 Ba tɛn'ɛs ye ba mɛŋ paŋ ka ba paami ba mɔrim la,
amaa mam pʋ siak ban tɛn'ɛsid si'em laa.
17 La'am nɛ wala wʋsa, nɔɔr ala ka ya nyɛ ka tʋʋmbɛ'ɛd dim bugum kpiisɛ?
Nɔɔr ala ka tɔɔg paae ba
bɛɛ Wina'am sʋnpɛɛn luu ba zugɔ?
18 Nɔɔr ala ka o da'ae ba keŋ wʋʋ sa'ad
bɛɛ udug ka sisi'em da'ae keŋɛ?
19 Ba ya'a ye, ‘Wina'am namisid biisi ba saamnam tʋʋmbɛ'ɛd zug,’
man na lɛbis ye o ya'a namis tʋʋmbɛ'ɛd la sɔb mɛŋ,
o na baŋ ye o tʋm bɛ'ɛd!
20 Kɛl ka tʋʋmbɛ'ɛd sɔb nini nyɛɛ o san'auŋ;
kɛl ka Wina'am Onɛ an Paŋtita'ar sɔb la tɛɛg o tʋbir ka li wʋm o.
21 O dabisa dunia nwa ya'a ti naae,
o ba'a lɛn ka' nɛ o yaas yɛlaa.
22 Sɔ' bɛɛ na tun'e pa'al Wina'am
onɛ kat tuongatib banɛ mɔr kpi'euŋ hali saria laa?
23 Sɔ' mɔri laafi hali nɛ on na ti kpi;
ka o ya'a ti kpi o kpiidi nɛ nimma'asim ka dabiem kae,
24 ka o niŋgbina saalim sʋ'ʋŋa
ka o kɔnba mɔr biim.
25 Ka sɔ' on di namisʋg hali nɛ o kum,
ka pʋ di nyɛlʋg baa daar yinnee.
26 Amaa nidiba ayi' nwa ya'a kpi ba na mumi ba wʋsa teŋin
ka zunzunya dii ba niŋgbina la.
27 M mi' pʋtɛn'ɛbɛ'ɛd kanɛ ka ya tɛn'ɛsidi m yɛla,
nɛ gban'abɛ'ɛd kanɛ ka ya gban'e m yɛla la.
28 Ya na yɛl ye, ‘Nintita'ar la yir bɛ yaanɛ,
ka tʋʋmbɛ'ɛd dim la da bɛ zin'isi'a la bɛ yaanɛ?’
29 Ya pʋ bu'os banɛ ken suoya la wʋm ka baŋɛɛ?
Ya pʋ siak ban yɛl si'em laa?
30 Wina'am sʋʋnr ya'a ti duoe ka o ye o namis nidib
tʋʋmbɛ'ɛd dim ɛɛnti nyɛnɛ yɔlisimm?
31 Anɔ'ɔnɛ yɛt tʋʋmbɛ'ɛd sɔb ye o tʋm bɛ'ɛdɛ?
Anɔ'ɔnɛ yɔɔd o tʋʋmbɛ'ɛd la sammɛ?
32 Ba ya'a mum o naae,
ba guri o yaʋg la nɛ sʋ'ʋŋa.
33 Nidib na galis o dabɔɔgin,
ba na dɔl taaba keŋi pʋ'ʋs o kʋʋr la,
hali titan kanɛ ka ba zaŋi pin' o la anɛ malisim tis o.
34 Alazug, ya ye ya niŋ wala bɛlis man nɛ ya antu'ayɛɛd nwa?
Yanamɛ lɛbis si'el wʋsa anɛ faad ma'aa ka sida ka' li nii.”