Zofar
20
1 Ka Zofar onɛ an Naama nid la lɛbis ye,2 “Job, fʋ pian'ad la daamim sʋʋnr
ka li an tilas ye m lɛbisif.
3 Fʋn pian'am pian'asi'a la wʋsa anɛ tʋ'ʋd,
amaa m mi' man na lɛbisif si'em.
4 Asida, fʋ pʋm mi' din da an si'em kʋdimin sa;
saŋkanɛ ka ba da zaŋ ninsaali niŋ dunia zug la,
5 ye ninvʋbɛ'ɛd wʋsa sumalisim pʋ ya'asid naarɛ
ka banɛ kis Wina'am kʋ nwɛ' nyɔ'ɔgʋ yuugɛ.
6 Hali baa o dʋ'ʋsi-m-mɛŋ ya'a bɔɔd din duoe paae arezana,
ka o wa'am hali ka o zug paae saŋgbana ni,
7 o na pun'oe nwɛnɛ o mɛŋ bin nɛ,
ka banɛ daa mi' o na bu'osid ye, ‘O bɛ yaanɛ?’
8 O na mɛlim nwɛnɛ zaansʋŋ nɛ ka ba kʋ lɛn nyɛɛ o;
o na bɔdig sɔee.
9 Nif kanɛ da nyɛt o la kʋ lɛn nyɛɛ o;
on da bɛ zin'isi'a la o kʋ lɛm bɛɛ ani.
10 O biis na yɔ dinɛ wʋsa an nɔŋ dim bʋn la lɛbis;
ka o mɛŋ mɛ lɛbis mɔrim kanɛ wʋsa ka o zaŋ la.
11 Kpi'euŋ kanɛ ka o da mɔr o dasannimin la
na lɛbi dig titanin.
12-13 O zaŋ pitɔɔlim ka li malis wʋʋ diib nɛ o nɔɔrin;
ka o liennɛ li hali ka pʋ basida.
14 Amaa li ya'a paae o pʋʋrin li na lieb tɔɔg;
li na tɔi lak-lak nwɛnɛ yabid nɛ.
15 O na tin mɔrim kanɛ ka o di la;
Wina'am na kɛ ka o tiin li wʋsa yis na.
16 O na liel wiigi zɛɛnsim,
zɛɛlʋŋ na dum o kʋ.
17 O kʋ nyɛ siind nɛ bin'isim
linɛ pʋbid wʋʋ ku'osuoya badigid la malisim.
18-19 O namis nɔŋ dim hali ka basi ba,
ka fan' nidib ya' banɛ ka o pʋ mɛɛ,
dinzug o kʋ dii o namisʋg la nyɔɔdɛ.
On tɔlim paam si'el la wʋsa, o kʋ dii li malisim.
20 O kʋkɔma'asim la kɛnɛ ka o pʋ tigid si'ela
amaa o areza'as la kʋ nyaŋi faaɛn o.
21 Si'el lɛn kae ka o na dii;
dinzug, o mɔrim la kʋ yuugɛ.
22 Saŋa kan ka o mɔr si'el mɛkama la,
saŋkan nɔɔ ka yɛltɔɔd paad o;
fara nɛ yɛlmugusa na gban'e o.
23 O ya'a ti dii pɛ'ɛl o pʋʋr la,
saŋkan ka Wina'am sʋnpɛɛn na lii o zug.
24 Ba na kad o nɛ zan'an ka o zɔɔ yi,
ka ba yʋ'ʋn kʋns o nɛ kʋntzɛn'ug kpan.
25 Kpan la zug na kʋns o sɔɔnri
tɔlig o nya'aŋ na.
Dabietita'ar na kpɛn' o
26 ka on bɔ si'el wʋsa digil la san'am;
bugum dinɛ ka ninsaal pʋ nyu'oe
na di on nɛ o yin la'ad wʋsa.
27 Saazug na nie o tʋʋmbɛ'ɛd la paalʋ,
ka teŋgbauŋ la na duoe zab nɛ o.
28 Wina'am sʋnpɛɛn na zii o yiri gaad,
nwɛnɛ ku'om pʋbidi dit la'ad si'em la.
29 Bugusim daan yɔɔdi an si'eli la,
lin ka Wina'am maali digili ba.”