Job
19
1 Ka Job lɛbisi yɛl ye,2 “Bʋndaar ka ya na basi m daamʋgɔ?
Ya nɔɔr pian'ad kɛ ka m kɔnba kɔɔd bur-bur!
3 Nɔɔrim bʋpiiga nwa ka ya pɔ'ɔgim;
ya tʋmim bɛ'ɛd hali, ka nyan kae.
4 Di ya'a an sida ye mam yidig nɛ,
yanam kɛl ka li paanɛ mam ma'aa.
5 Ya tɛn'ɛs ye ya sɔn'oe mam nɛ,
ka gɔs ka yɛlbanɛ paae mam la pa'al ye m tʋm nɛ taal.
6 Ya zi' ye li anɛ Wina'am tʋm mam nɛ'ɛŋaa?
Onɛ nɔk o baŋi bɛndim.
7 La'am nɛ man kaas ye, ‘O tʋmim dinɛ pʋ nar la,’
m pʋ nyɛ gandigirɛ.
La'am nɛ man ye ba sʋŋimim la,
sɔ' pʋ tisim bʋʋdɛ.
8 O giŋim nɛ ka m kʋ nyaŋi gaadɛ;
o kɛ ka m suor wʋsa an lik.
9 O yɛɛgi m girima ka basim zaalim
ka yisi m na'am zupibigi m zugin.
10 O tɔɔnsi tɔɔnsim nɛ zin'is wʋsa;
ka vuoɛn m ti'ir wʋʋ tiig ka ba vuoɛn nɛ.
11 Wina'am sʋnf pɛlig nɛ mam hali;
ka o kaalimi paas o dataas.
12 O zabzabidib la la'as ye ba zab nɛ m;
ba lɔbi giligim zin'is wʋsa.
13 Wina'am kɛnɛ ka m mɛŋ yidim basim;
m lieb nɛ saanne tis banɛ mi'im.
14 Ka m sizuop zɔ ka basim
ka m zuanam wʋsa tami m yɛla.
15 Banɛ an saam man yin, nɛ m tʋmtʋm pu'ab,
gɔsid mam ka m nwɛnɛ saan nɛ.
16 M buoli m yammʋg ka o zan'as siakir;
hali m bɛllim o ka o sin.
17 M vʋ'ʋsʋm nyuusidnɛ pɔn'ɔsʋgʋ m pu'a nyɔnya ni;
ka m ba'abiis pʋ bɔɔd ye ba li'eli ma.
18 Hali bibibis nini kpɛn' mam nɛ;
ka ba mɔrimi la'ad.
19 M zuamɛŋa gɔs man nɛ zaalim;
banɛ ka m nɔŋ la yʋ'ʋn kisigim nɛ.
20 M yʋ'ʋn lieb nɛ kɔnba ma'aa;
di kpɛlim bi'ela ka m kpiin.
21 Zɔminim nimbaanlig, m zuanama, zɔminim nimbaanlig,
bɔzugɔ, Wina'am nwɛ' m nɛ o mɛŋ-mɛŋ nu'ug.
22 Wala ka ya namisidim nwɛnɛ Wina'am namisidim si'em la?
Yanamɛ namisim si'em la pʋ sia'alɛɛ?
23 M pian'ad nwa ya'a sɔbidinnɛ digin,
ba naan sɔbi niŋin gbauŋ pʋʋgin.
24 Bɛɛ ba naan zaŋin lieŋe kie li tabil tampiing zug
ka li na kpɛm bɛ saŋa wʋsa.
25 M mi' ye m nu'unwɛ'ɛd la vʋe
ka na duoe ka zabi m yɛla.
26 Hali baa m niŋgbauŋ nwa ya'a pun'oe,
la'am nɛ ala m na nyɛ Wina'am nɛ m nini nwa.
27 Mam mɛŋ-mɛŋ na nyɛɛ o
nɛ m nini nwa ka ka' sɔ'ɔɔ.
M sʋnf lɔnɛ gur saŋa la!
28 Ya ya'a yɛl ye, ‘Ti na kpɛn namisid Job
bɔzugɔ, yɛla nwa wʋsa yinɛ o san'an na.’
29 M yɛti ya ye ya zɔm kum
bɔzugɔ Wina'am sʋnpɛɛn ziidnɛ san'auŋ na,
ala ka ya na baŋ ye Wina'am sariakadib sid bɛ.”