Bilidad
18
1 Ka Bilidad onɛ an Suh teŋin nid la lɛbis ye,2 “Ya kʋ mumi ya nɔɔr baanlimm nɛɛ?
Paasimi ya'am, ka kɛlis ka ti yʋ'ʋn pian'.
3 Bɔ ka ya gɔs ka ti nwɛnɛ niigi ya nini ni
wʋʋ ti ka' ya'am baa bi'ela?
4 Job, fʋ sʋʋnri duoe ka fʋ tɔɔnsi fʋ mɛŋi zɔrisi zɔris la!
Fʋ tɛn'ɛs ye saalib wʋsa na zɔ ka bas dunia la fʋ sʋnpɛɛn la zugɔɔ?
Bɛɛ fʋ yɛl ye tampiins na vɔn?
5 Ba kpiis pitɔɔg sɔb fitir;
o bugum la kpiisnɛ ka pʋ lɛn ditta.
6 Nɛɛsim dinɛ bɛɛ o dɔɔgin la lieb lik;
ka o fitir mɛ kpiis.
7 O tadig nɛ ka pʋ tun'e yakid nɔbir nɛ kpi'euŋɔ;
o mɛŋ bugusim ya'am la dii o.
8 O mɛŋ nɔba mɔr o kpɛn' zimi zulisin
ka di gban'e o.
9 Baŋ gban'e o nɔbkpansinkpanda
ka bɛndig la mɔr o kiŋ-kiŋ.
10 Ba su'a bɛnd bɛndig teŋin gur o;
baŋ dig o suorin.
11 On ken zin'isi'a wʋsa
dabiem mɔr o nɛ.
12 Kɔ'ɔm tadig o;
ka san'auŋ gur o ye o li.
13 Ban'abɛ'ɛdi tiigi o niŋgbina wʋsa,
ka kɛ ka o nu'us nɛ o nɔba pun'oe.
14 Ba yis o, o yir kanɛ ka o bɛ ka daauŋ kae la ni
m mɔr o keŋ Na'aba Akum san'an.
15 Bugumpielim ma'aa bɛɛ o dɔɔgin;
ka kidibir dinɛ dit bugum gilig o yir la.
16 O nya'a kʋdignɛ teŋin,
ka o wila la agɔla ziank.
17 Sɔ' pʋ lɛn tɛnri o yɛla dunia nwa pʋʋginɛ,
ka o yʋ'ʋr bɔdig teŋ la zug.
18 Ba kad o yis nɛɛsimin kpɛn'ɛs likin
ka mɛlis o dunia nwa ni.
19 O kʋ mɔr yaas o nidib sʋʋginɛ,
o nid baa yinne lɛn kae on da bɛ teŋ si'a la.
20 Yɛl kanɛ paae o la kɛnɛ ka banɛ bɛ ya-nya'aŋ la sʋnf vuoɛn;
ka dabiem gban'e banɛ bɛ ya-tuona la.
21 Asida, lin niŋid banɛ pʋ zɔt Wina'am si'em la;
ala ka banɛ zi' Wina'am la bɛllim aɛn.”