17
1 Ka Job yʋ'ʋn yɛl ye,“Man vʋm la naae ya,
m dabisa pʋ lɛn lalla,
yaʋg ya'anɛ nɔɔri gurim.
2 Asida sida banɛ la'ad mam la galis nɛ;
dinzugɔ m na kpɛn gɔsid banɛ pɛligidi m sʋnf la.
3 O m Wina'am, kpɛn'ɛsimi fʋ nu'ugʋ m yɛl nwa ni
ka sɔ' kae na zi'enɛ m nya'aŋa.
4 Fʋnɛ lusi ba pʋtɛnda ka ba kʋ gban'e si'el-si'el gbinnɛ;
alazug, da kɛ ka ba di ya'annɛ.
5 Ninkanɛ yii o zua nya'aŋ ye o di'e yɔɔd,
o sɔb biis na ba'as yɔri.
6 Wina'am kɛnɛ ka man lieb bʋnla'adiri tis nidib wʋsa,
ba tʋbisidnɛ nintɔɔndi matti m nindaa.
7 M sʋnsa'aŋ la kɛnɛ ka m nini sɔbid,
ka m niŋgbina naae kpɛlim kɔnba ma'aa.
8 Pʋpielnam ya'a nyɛ nɛ'ɛŋa, li zabidi banɛ;
ka banɛ ka' taal sʋʋnr pɛlig nɛ banɛ pʋ zɔt Wina'am.
9 La'am nɛ wala, pʋpielim dim na kpɛn zi'e ba sida ni,
ka banɛ nu'usi an nyain la maligin nyɛ kpi'euŋ.
10 Amaa ya wʋsa lɛm na! Yanamɛ pian' si'el la,
maligim pian' ya'as!
Nɛ lin wʋsa m kʋ nyɛ ya'am sɔbi ya sʋʋginɛ.
11 M dabisa gaad ya ka m gban'ar wʋsa san'am
ala ka m ya'amlɛog pʋn lɛn kae nɛ si'ela.
12 Nimbama nwa nɔknɛ yʋ'ʋŋ ka li lieb nintaŋ;
ka zaŋ lik ka li lieb nɛɛsim.
13 M ti'ir wʋsa bɛ nɛ kpi'im teŋ,
zin'ikanɛ ka m na diginɛ gbis likin.
14 M na buol Ayaʋg ye, ‘M saam’,
ka buol bʋnvʋya banɛ diti m niŋgbina la
ye, ‘M ma’, bɛɛ ‘M taʋn’.
15 M ti'ir bɛ yaanɛ kimm nɛ?
Anɔ'ɔn na gɔsi nyɛ ti'iri tisi ma?
16 Ti'ir na dɔllimi sig yaʋgʋnɛɛ?
Li na diginɛ m san'an kpi'im teŋaa?”