Elifaz
15
1 Ka Elifaz onɛ an Teman nid la lɛbis ye,2 “Di nar ye ya'am sɔb lɛbis pian'ad ka pʋ tɛn'ɛsɛɛ,
bɛɛ o pɛ'ɛl o mɛŋ nɛ baŋir linɛ nwɛnɛ pɛbisimm?
3 Ya'am sɔb na nwa'asid nɛ pian'ayɛɛdɛɛ,
bɛɛ o tu'asid pian'ad kanɛ ka' vɔɔnrɛ?
4 Amaa fʋ pʋn pʋ lɛn zɔt Wina'am
ka mɛ kɛ ka nidib kʋ lɛn tis o girima.
5 Fʋ nɔɔr pian'ad pa'annɛ fʋ tʋʋmbɛ'ɛdi zem si'em;
fʋ mɔri nɔmalisim pan'asid nidib.
6 Fʋ mɛŋ nɔɔri ditif ka ka' manɛ,
fʋ mɛŋ pian'adi zɛrigidif.
7 Ba da dɛŋi du'anɛ fʋn yiiga bɛɛ?
Wina'am da maan zuoya la fʋ da bɛɛ?
8 Wina'am da gban'ad on na maal si'em la, fʋ da wʋm yaa?
Fʋnɛ fʋ kɔn'ɔkɔn' mɔr dunia la wʋsa ya'am?
9 Fʋ mi' bɔ ka tinam zi'?
Ya'am gɔnlʋŋ bɔ ka fʋ mɔr ka tinam pʋ mɔra?
10 Tinam ya'am la yit nɛ zugpielim dimin na,
ba da bɛ hali ka fʋ saam nan kae.
11 Bɔzug ka fʋ zan'asid sumbʋgʋsʋm linɛ ka Wina'am tisidif la?
La'am nɛ tinamɛ pian' baanlimm tisif la wʋsaa?
12 Bɔzug ka fʋ kɛ ka fʋ sʋʋnr duoe wala?
Bɔzug ka fʋ nini mu'oe hali
13 ka fʋ sʋʋnr duoe nɛ Wina'am
ka fʋ pian'ad pian' linɛ pʋ nari tisid o?
14 Ninsaal sid na nyaŋi an nyainnɛɛ?
Bɛɛ pu'a du'a sɔ' na tun'e an pʋpielaa?
15 Wina'am ya'a pʋ niŋ o mɛŋ-mɛŋ maliaknam yadda,
hali ka arezana ka' nyain o nini nii,
16 ka ninsaal onɛ an pitɔɔg nɛ bugusim sɔb
ka nuud tʋʋmbɛ'ɛd wʋʋ ku'om la yʋ'ʋsɛ?
17 Job, kɛlisim sʋ'ʋŋa ka m tu'asi pa'alif;
kɛl ka m yɛlif man nyɛ si'el.
18 Banɛ an ya'am dim pa'alim sida
linɛ ka ba zamisi ba yaanam san'an ka pʋ su'a si'ela.
19 Bama ka ba pɔnsi zaŋ teŋ la tisi ba
ka saan baa yinne pʋ gɛndigi ba sʋʋginɛ.
20 Pʋtɔɔg sɔb na namis hali nɛ o nyɔvʋr bɛn.
Onɛ bɔɔd zaba la kʋ yuug dunia nwa nii.
21 Tʋkpiidʋg ma'aa ka o tʋba wʋm
ka li kpɛn'ɛsid o dabiem.
Saŋkanɛ ka o tɛn'ɛs ye si'el wʋsa an sʋ'ʋŋa la,
li saŋa ka faandib libigid o.
22 O pʋ mɔr ti'ir ye o na nyaŋi zɔɔ yi likinɛ,
bɔzugɔ zaba sʋ'ʋg dignɛ gur o.
23 O yiridnɛ gin, ka na ba'asi kilim zuund diib.
O mi' ye lik dabisir la na paae o.
24 Sʋnsa'aŋ nɛ tɔɔg dabiem mɔr o
ka libig o nwɛnɛ na'abi yi tanp ye o zab nɛ o.
25 Li anɛ on mɔr nyɛɛsim nɛ Wina'am
ka zabid nɛ Wina'am Onɛ an Paŋtita'ar sɔb la zug.
26 O maal tʋbzian'asim
ka zaŋ o zaba la'akpi'ema zabid nɛ Wina'am.
27 La'am nɛ on nɔb ka kpɛnda yi,
ka o siaa nɔbi pɛ'ɛl la,
28 o na bɛ teŋ kanɛ an dabɔɔd,
nɛ ya' banɛ an wɛn ma'aa ka nidib kae.
29 O kʋ lɛn an bʋmmɔra, bɔzugɔ o mɔrim la na naae
ka kʋ lɛn yaligi pɛ'ɛl teŋ la wʋsaa.
30 O kʋ nyaŋi zɔɔ yi likin la;
bugum na zɛɛlim o ka o zɛndig wʋʋ tiig vaand nɛ.
31 O mid ka o ma'aa o mɛŋi ti'e linɛ ka' vɔɔnrɛ,
bɔzugɔ o kʋ nyɛ sʋŋiri yii aninaa.
32 O saŋa kʋ paae ka o pʋn zɛndig
ka o wila kʋ lɛn sɔbig lim-lim nɛ.
33 O na nwɛnɛ tiig wil kanɛ ka ba fanri li wala pilɛɛd,
ka nwɛnɛ olif tikanɛ puum sʋʋg wʋsa.
34 Nimbanɛ pʋ zɔt Wina'am na kilim kundu'ada,
bugum mɛ na di banɛ nɔŋ filʋŋ la ya'.
35 Ba gban'adnɛ yɛla pʋʋg ka du'ad tʋʋmbɛ'ɛd;
ba pʋʋs anɛ dama'am ma'aa.”