14
1 Job da lɛn yɛl ye,“Ninsaal mɛkama dunia nwa pʋʋgin dabisa anɛ bi'ela
ka pɛ'ɛl nɛ yɛla.
2 O duodnɛ tɔ'ɔtɔ nwɛnɛ mɔpuum nɛ,
ka li pʋ yuugɛ ka o zɛndig
ka mɛlim tɔ'ɔtɔ wʋʋ ma'asim tulignɛ.
3 Wina'am, fʋ na san'ami fʋ nini gɔsid ninkan buudii?
Fʋ na mɔr oŋa sɔbi fʋ tuon na ye fʋ kad o sariaa?
4 Anɔ'ɔn na nyaŋi yis bʋn dinɛ an nyain dian'ad pʋʋginɛ?
Sida, li sɔb kae!
5 Fʋ pʋn gban'e ninsaal nyɔvʋr bɛnnɛ naae;
fʋ mɛ gban'e on na vʋe nwadis si'em
ka o kʋ tʋʋgi li bɛnnɛ.
6 Alazug, yisimi fʋ nini ka bas o baanlimm,
ka o di nyɛlʋg o vʋm dabisa la pʋʋgin nwɛnɛ onɛ tʋm lɛbir nɛ.
7 Hali tiig gba mɔr ti'ir,
bɔzugɔ ba ya'a nwaae li ka bas gbi'ir, li na lɛm bus ya'as
ka li bulpaala la kʋ sʋʋgɛ.
8 Hali li nya'a ya'a kʋdig si'em wʋsa,
ka li gbi'ir la kpi teŋin,
9 la'am nɛ wala li ya'a wʋm ku'om nyuug, li na bus
ka li bula la na nwɛnɛ tiigi nar ye li an si'em.
10 Amaa ninsaal ya'a kpi o sigid nɛ teŋin;
o bɛn ya'a ti paae ka o vʋ'ʋsʋm naae ka o gaad sɔee.
11 Nwɛnɛ ku'om ɛɛn naae atɛukʋn si'em la
bɛɛ ku'om ɛɛnti kpiɛn kɔlʋgin ka li kʋdigi tans si'em la,
12 ala ka ninsaal kpiid ka pʋ duoda.
Ya'a ka' saazugʋ na ti gaadɛ, saalib kʋ maligim lɛb naa
bɛɛ nie gbɛɛm pʋʋginɛ.
13 Fʋ ya'a pʋn su'anim kpi'im teŋ
ka lusinim ka fʋ sʋnpɛɛn la gaadin, li pʋ sɔn'oe yaa?
Fʋ ya'a zi'elin saŋa
ka lɛn tiɛn m yɛla ya'asɛ!
14 Ninsaal ya'a kpi o na lɛn vʋ'ʋg ya'asɛɛ?
Li ya'a aan ala m na mɔdig m tʋʋm kpi'ema la wʋsa ni
hali ka ti paam vʋ'ʋsʋm.
15 Fʋ na buolim ka m na siak;
fʋ sʋnf na malis nɛ man onɛ ka fʋ maal nɛ fʋ nu'us la.
16 Asida, fʋ na gur man sʋ'ʋŋa saŋa wʋsa
ka kʋ lɛn gi'ennɛ m tʋʋmbɛ'ɛdi zem si'em.
17 Fʋ na zaŋi m tʋʋmbɛ'ɛdi su'a bɔto ni lɔ,
ka pin' m taal wʋsa.
18 Amaa nwɛnɛ zuoya birigidi lit
ka kugbɛda vurigid si'em la,
19 ka lɛn nwɛnɛ ku'om dit kuga
ka ku'okanɛ zɔt pied tanni ken si'em la,
ala ka fʋ san'amid ninsaal ti'ir.
20 Fʋ nyaŋ o vuguri ka o mɛlim;
fʋ tiaki o nindaa nwɛnɛ onɛ kpi nɛ ka o gaad sa.
21 Nidib ya'a na'asid o biis, o zi'isigɛ;
ba ya'a mɛ pɔ'ɔgidi ba, o pʋ nyɛtaa.
22 O mi'inɛ o mɛŋ niŋgbina zabir ma'aa
ka kaasid o mɛŋ yɛla ma'aa.”