13
1 Ka Job lɛn keŋ tuonnɛ yɛl ye,“Kɛlli baanlimm, ka man nini pʋn nyɛɛ li wʋsa,
ka m tʋba wʋm ka gban'e li gbin.
2 Yanamɛ mi' si'el la wʋsa mam mɛ mi' mɛn;
ya pʋ gati ma.
3 Amaa m sʋnf bɔɔdim anɛ ye m pian' tis Wina'am Onɛ an Paŋtita'ar sɔb la,
ka tu'asi m yɛl la gbinnɛ tis Wina'am.
4 Dama'am ma'aa ka ya ma'adi tabin mam;
ya nwɛnɛ tima dim banɛ kʋ nyaŋi ti'eb nida.
5 Ya ya'a sinni ya nɔɔr baanlimm,
li na kɛ ka ya nwɛnɛ ya'am dim nɛ.
6 Kɛlisimi ka m yisi m nɔɔr pian'ʋk;
wʋmminɛ m fabʋlʋg.
7 Ya niŋ wala mɔr Wina'am yʋ'ʋri pian'ad bugusim pian'adɛ?
Ya niŋ wala mɔr o yʋ'ʋri ma'ad dama'am?
8 Ya na nyaŋi mɔr baregaŋ man nɛ Wina'am teŋsʋkɔɔ?
Bɛɛ ya zabi tis o?
9 O ya'a vɛɛnsi ya sʋnya gɔs, li na an sʋ'ʋŋaa?
Ya na nyaŋi pan'as o nwɛnɛ yanamɛ pan'asid saalib si'em laa?
10 Ayei! Ya ya'a su'a mɔr baregaŋ,
o na zɛrigi ya.
11 O na'am girima la pʋ kpɛn'ɛsidi ya dabiem?
Ya pʋ zɔt dabiem nɛ on an si'em laa?
12 Ya siilima la anɛ zaalim nwɛnɛ tampɛligim nɛ;
yanamɛ mɔr si'eli gu'udi ya mɛŋ la anɛ ya'ad,
li sid kʋ ya'as nwa'arɛ.
13 Fɔɔnmɛ baanlimm ka kɛ ka m pian';
ka linɛ na niŋ, lin niŋ.
14 Bɔzug ka m mɔr nyɔvʋri nwɛ'ɛdi kpɛɛsid wʋʋ siya'ar
ka mɔri m vʋm maan galima?
15 Hali o ya'a bɔɔd, on kʋʋmim; ka m ti'ir nan kpɛn bɛ nɛ o ni.
M na tu'asi m yɛla wʋsa o tuon.
16 M mi' sʋ'ʋŋa ye m sʋnkpi'euŋ la na kɛ ka m paam faangir,
bɔzugɔ onɛ zi' Wina'am pʋn kʋ li'el o san'anɛ!
17 Wina'am, kɛlisimi m pian'ad nwa sʋ'ʋŋa;
kɛl ka man yɛt si'el la kpɛn' fʋ tʋbirin.
18 Man maal siri ye m tu'asi fʋ m yɛl la,
m mi' ye m na di bʋʋd.
19 Sɔ' mɔr antu'a kanɛ na zɛrig mam bɛɛ?
Alaa m na sin baanlimm hali ti paae m kum.
20 Wina'am, niŋim bʋnama ayi' nwa ma'aa tisim,
ka m kʋ lɛn su'a m mɛŋi fʋ san'anɛ:
21 Da lɛn nɔki fʋ kpa'asiri namisi ma,
mɛ da lɛn vɔlisidim nɛ fʋ kpi'euŋ la.
22 Ala ka fʋ ya'a buolim, m na siak,
bɛɛ fʋn kɛ ka m pian' ka fʋ gandig.
23 M taal nɛ m tʋʋmbɛ'ɛd kal aan ala?
Pa'alimi m gbɛlʋŋ nɛ m tʋʋmbɛ'ɛdi zu'oe si'em.
24 Bɔ ka fʋ zan'as ye fʋ kʋ gɔsi ma
ka zaŋim ka m liebi fʋ dataa?
25 Fʋ na namis man kanɛ nwɛnɛ vaung ka sisi'em da'ad laa?
Fʋ na kati dɔl udugɔɔ?
26 Fʋ sɔbnɛ yɛltɔɔdi gi' mam
ka kɛ ka m namisidi m biilimin sa tʋʋmbɛ'ɛd.
27 Fʋ ba'a m nɔba nɛ baans;
fʋ guri m suoya ka gɔsid
ye fʋ baŋ man ken si'el wʋsa.
28 Ala ka ninsaal bɛdigid nwɛnɛ bʋmpɔn'ɔsir nɛ,
ka nwɛnɛ fuug ka sibig mu'anɛ.”