Job
12
1 Ka Job lɛbis ye,2 “Waii, bi'esʋg kae, ya sid anɛ a-mi'-wʋsa dim,
ya ya'a kpii, ya'am mɛ kpiya!
3 Amaa baŋimi ka m mɔr ya'am nwɛnɛ yanam nɛ;
sida, ya pʋ gati ma.
Anɔ'ɔnɛ zi' yanamɛ yɛt si'el la wʋsa?
4 M yʋ'ʋn lieb nɛ bʋnla'adiri tisim zuanam,
hali baa man buol Wina'am ka o gandig la.
La'am nɛ man an pʋpiel ka ka' gbɛlʋŋ la,
m lieb nɛ bʋnla'adir!
5 Banɛ ka si'el-si'el pʋ paki ba la ziemid banɛ bɛ yɛla ni,
ka tusid banɛ sadigidi bɔɔd liig la.
6 Bɔɔ kɛ ka banɛ faand mɔr yɔlisim?
Bɔ ka sɔ' pʋ daamid banɛ kis Wina'am la?
Ka la'am yɛl ye Wina'am bɛ nɛ ba nu'usin.
7 Bu'osim bʋnkɔnbid ka ba pa'alif,
bɛɛ niis banɛ ian'ad agɔla la ka ba na yɛlif;
8 bɛɛ fʋn pian' tis teŋgbauŋ la ka o na pa'alif,
bɛɛ zimi banɛ bɛ atɛukʋn la ka ba na yɛlif dinɛ bɛ.
9 Banɛ ka m kaal nwa wʋsa
mi' ye Zugsɔb la tʋm nɛ'ɛŋa nwa.
10 O nu'ugin ka bʋnvʋr wʋsa bɛ,
hali nɛ saalib wʋsa vʋm.
11 Bɔzugɔ, tʋbiri wɛligid pian'ad
wʋʋ zilimi lɛmmid diib si'em la, bɛɛ m ma'aanɛɛ?
12 Mɛ ya'am bɛ nɛ zuobpielim dim ni?
Li ka'anɛ kʋdigire an baŋirɛɛ?
13 Ya'am nɛ paŋ anɛ Wina'am din;
mi'ilim nɛ baŋir mɛ anɛ o din.
14 O ya'a nwa'ae, anɔ'ɔnɛ na nyaŋi mɛ'?
Ka ninkanɛ ka o yɔɔ o sanrega ni, anɔ'ɔn na nyaŋi yis o?
15 O ya'a gu' saa lɛbis,
teŋgbauŋ la lɛbigid nɛ kpi'emisi kpɛ'ɛŋ bar-bar.
O ya'a yɔ'ɔg saa bas
li na nii di bʋn linɛ wʋsa bɛ teŋgbauŋ la zug.
16 Paŋ nɛ nyaŋir anɛ o din;
banɛ pan'asid nidib nɛ banɛ ka ba pan'asid wʋsa anɛ o din.
17 Onɛ kɛt ka mi'ilim dim lieb zaalim
ka sariakatib lieb zɔn.
18 Onɛ yɛɛgid na'anam banaas
ka zaŋid pien fuugi lɔɔdi ba sies wʋʋ yammis nɛ.
19 Onɛ yisid maanmaannibi ba kpi'euŋin
ka kɛt ka paŋ dim lieb zaalim.
20 Onɛ kɛt ka nidibi niŋ sieba yadda la lɛbi fɔn baanlimm
ka kɛt ka kpɛɛmnam zi' sida nɛ ziri bakida.
21 Onɛ diisid na'ayikpɛm nyan
ka kɛt ka paŋ dim liebid zaalim.
22 Onɛ nied dinɛ wʋsa bɛ likin
ka kɛt ka lik lɛbigid nɛɛsim.
23 Onɛ kɛt ka tɛɛns nɔbigid onɛ lɛn san'amidi ba,
onɛ yaligid tɛɛns, onɛ lɛn widigidi ba.
24 Onɛ mɔŋid tɛɛns na'anam ya'am;
ka kɛt ka ba gɔɔndi gin yɔɔg-yɔɔg.
25 Ba babinnɛ likin ka nɛɛsim kae
ka kɛ ka ba gɛnnim wʋʋ danuudib nɛ.”