Zofar
11
1 Ka Zofar onɛ an Naama nid la lɛbis ye,2 “Nid na pian' anwana wʋsa ka ba kʋ lɛbisɛɛ?
Fʋ tɛn'ɛs ye pian'ad bɛdegʋ na tisif bʋʋdɛɛ?
3 Fʋ tɛn'ɛs ye fʋ pian'ayɛɛd nwa na kɛ ka nid mɔdigi sinnaa?
Fʋ na maan siaa ka ba kʋ zɛrigi fɔɔ?
4 Fʋ yɛt Wina'am ye, ‘Man niŋi fʋ yɛlʋg la yadda ka gbɛlʋŋ kae,
ka bɛ nyain fʋ nini ni.’
5 Amaa m naan bɔɔdin ye Wina'am mɛŋ-mɛŋ na gandig
ka ya'ae o nɔɔri pian' zɛrigif
6 ka viigi pa'alif yɛlsu'ada linɛ yit ya'amin na
ka mɛ kɛ ka fʋ baŋ ye ya'am bɛ nɛ ka ya'am bɛ.
Kʋdim baŋim ye, Wina'am tammi fʋ tʋʋmbɛ'ɛd la sieba gba.
7 Fʋ na nyaŋi baŋ Wina'am nyalima gbinnɛɛ?
Fʋ na nyaŋi vɛɛnsi baŋ Wina'am Onɛ an Paŋtita'ar sɔb la zem si'em?
8 Li dʋʋ gaad saŋgbana wʋsa,
ka bɔ kimm ka fʋ na tun'e niŋɛ?
Li zulimmi gat yaʋg,
ka fʋn mi' bɔ?
9 Li wa'alim gat teŋgbauŋ
ka li labisim gat atɛuk.
10 O ya'a zaŋi fʋ niŋ sanrega ni
ka mɔri fʋ dʋ kɔɔtʋ, anɔ'ɔnɛ na tun'e ki'is o?
11 Bi'esʋg kae, o mi' pʋʋs ayi' dim
ka nyɛt banɛ tʋm tʋʋmbɛ'ɛd wʋsa.
12 Zɔlʋg ya'a ti gban'e pian'ad gbinnɛɛ,
alaa bʋŋ na du'a ninsaal.
13 La'am nɛ wala, fʋ ya'a dɔl o nɛ fʋ sʋʋnr wʋsa
ka tiɛn fʋ nu'ugʋ sɔs o,
14 ka bas tʋʋmbɛ'ɛd kanɛ bɛɛ fʋ sʋʋnrin la,
ka da siak ka tʋʋmbɛ'ɛd tʋmi fʋ yin ya'asɛ,
15 ala ka fʋ na duoe fʋ zug agɔla ka nyan kae,
fʋ na zi'e kiŋ-kiŋ ka dabiem kae.
16 Fʋ na tami fʋ yɛla wʋsa,
ka li nwɛnɛ saa nii gaadnɛ.
17 Fʋ bɛllim na nie nyain nwɛnɛ nintaŋ nɛ
ka bʋnkanɛ an liki fʋ bɛllimin la
na nie nyain wʋʋ bɛogʋn sɔɔnrim nɛ.
18 Fʋ na zin' ka dabiem kae, fʋn mɔr ti'ir la zug.
Fʋ na gɔs gɔbʋg nɛ diiug wʋsa
ka li anɛ nimma'asim ma'aa ka dabiem kae.
19 Fʋ na diginɛ gbis ka onɛ na vɔlisif kae.
Nidib bɛdegʋ na bɔɔd sʋŋiri fʋ san'an.
20 Amaa pitɔɔg dim ti'ir na bɔdig ka kɛɛ ba
ka ba zi' ban zɔti ken si'ela,
ba ti'ir la na ba'as nɛ kumin.”