10
1 Ka Job lɛn yɛl ye,Man ya'am yii m bɛllim nwa nɛ;
kɛl ka m nyɔli m ya'am bɔɔd si'em
ka pian' nɛ m sʋntɔɔg.
2 M na yɛl Wina'am ye: Da kʋʋsim bɛ'ɛdɛ,
amaa lɛɛ yɛlimi m taali an si'el kimm.
3 Fʋn mugusid onɛ ka fʋ mɛŋ nu'ug maal la, li malisi fɔɔ?
Ka fʋ lɛɛ bas pitɔɔg dim ka ba tʋm bam bɔɔd si'el!
4 Fʋ mɔri ninsaalib ninii?
Ninsaalibi nyɛt si'em la, ala ka fʋ mɛ nyɛtaa?
5 Fʋ dabisa gimnɛ nwɛnɛ ninvʋsaal dabisaa?
Bɛɛ fʋ yʋma gimnɛ nwɛnɛ o yʋma?
6 Ka dinzug ka fʋ vɛɛnsid ye fʋ nyɛɛm taal
ka ieedi m tʋʋmbɛ'ɛdɛɛ?
7 Fʋ la'am mi' ye m pʋ tʋm taalɛ,
ka mɛ mi' sʋ'ʋŋa ye sɔ' kae na faanmi fʋ nu'usinɛ.
8 Fʋ mɛŋ-mɛŋ nu'us ka fʋ zaŋi maalim,
dinzug, fʋ na siaki san'ami maa?
9 Tɛnr ye fʋnɛ ya'abim wʋʋ ya'ad nɛ.
Alazug, fʋ na kɛ ka m lieb titan ya'asɛɛ?
10 Ka' fʋnɛ daa kpa'am wʋʋ bin'isim la niŋi m ma pʋʋgin,
ka maalim wʋʋ bam mɔr bin'isim maan waagazi si'em laa?
11 Fʋnɛ daa zaŋ giinla tɔ'ɔŋi m kɔnba wʋsa
ka zaŋ niŋgbina nɛ niŋgbauŋʋ pilim.
12 Fʋnɛ tisim vʋm nɛ nɔŋilim,
ka guri m siig.
13 Amaa m mi' ye nɛ'ɛŋa ka fʋ daa su'a fʋ sʋʋnrin,
m mi' ye linɛ daa bɛɛ fʋ pʋtɛn'ɛrin:
14 M ya'a tʋm tʋʋmbɛ'ɛd fʋ gɔsidim nɛ
ka kʋ kɛɛ m taali basɛ.
15 M ya'a tʋm taal, yɛla na paam!
Hali m ya'a ka' gbɛlʋŋɔ, m kʋ nyaŋi ʋki m zug agɔlaa,
bɔzugɔ nyan nɛ fara ma'aa mɔrim.
16 M ya'a ʋki m zug agɔla fʋ kemmim nɛ nwɛnɛ gbigim nɛ
ka lɛm pa'alimi fʋ paŋ la nyalima an si'em.
17 Daar woo fʋ nyɛti m gbɛlima,
ka linzug ka fʋ sʋʋnr maligim pɛligid nɛ mam;
ka fʋ namisʋg gaad ala.
18 “Bɔzug kimm ka fʋ kɛ ka ba du'a ma?
M ya'a da kpiinɛ m du'am saŋa ka sɔ'ɔsɔ pʋ nyɛɛ ma di naan sɔn'ɔn.
19 Ba ya'a pʋ du'anim,
bɛɛ m ya'a daa kpiinɛ m du'am saŋa
ka ba muminim gba li naan sɔn'ɔn.
20 M dabisa dinɛ an bi'ela la pʋn pʋ naae nɛ laa?
Basim mam ka m nyɛ nimma'asim bi'ela
21 ka nyaan kpii keŋ kpi'im teŋ
zin'ikanɛ ka' lɛbig naa
ka an lik biridi la.
22 Teŋ kanɛ an lik biridi saŋa wʋsa
ka sʋnsa'aŋ nɛ tʋʋmyaalis galis
ka nɛɛsim gba an wʋʋ lik la.”