Job
9
1 Ka Job lɛbis ye,2 “Ɛɛn, m mi' ye li anɛ ala yim.
Ka ninsaal ye o niŋ wala kilim pʋpiel sɔb Wina'am tuonnɛ?
3 Nid ya'a bɔɔd ye o nwa'as nɛ o,
o sɔb kʋ nyaŋi gandig o bu'osʋg yinne bu'osa tusir pʋʋginɛ.
4 O ya'am la ka' makirɛ ka o paŋ ka' bɛnnɛ.
Anɔ'ɔn nam mi' mak o mɛŋ nɛ Wina'am ka di ya'annɛ?
5 O sʋʋnr ɛɛn duoe ka o vɔn' zuoya lɔb,
hali ka zuoya la zi' onɛ niŋida.
6 Onɛ dammid teŋgbauŋ la,
ka li mi'im zin'ig wʋsa.
7 O ya'a bɔɔd, o tun'e kɛ ka nintaŋ da yii;
o mɛ tun'e kɛ ka nwadbibis kʋ nie.
8 On ma'aa yadig saŋgbana la
ka kennɛ atɛuk ku'onwiis zug.
9 Onɛ maal nwadbibis buudi wʋsa zin'is atan'
ka sieba bɛ dagɔbʋg ka sieba bɛ teŋsʋk ka sieba mɛ bɛ datiuŋ;
o mɛ la'as Nɔnya'aŋ-nɛ-o-biis nɛ A-kidigim-bu'osnam.
10 O tʋm nɛ tʋʋmnyalima banɛ ka ninsaal kʋ gban'e li gbinnɛ,
o kilima la ka' bɛnnɛ.
11 Kassa, o dɔlli m san'anɛ gat, amaa m pʋ nyɛt oo;
o ya'a gat, m kʋ baŋ oo.
12 O ya'a faaɛn si'eli gaadɛ, anɔ'ɔn na nyaŋi gu' o?
Anɔ'ɔnɛ na nyaŋi bu'os o ye, ‘Bɔ ka fʋ niŋid ala?’
13 Wina'am pʋ gu'udi o sʋnpɛɛnnɛ;
hali baa bʋnzɔtir linɛ bɛ ku'otita'arin buon Arahab la,
o sʋŋidib dig nɛ o nɔba teŋir.
14 M ye m niŋ wala zab nɛ Wina'am?
M ye m nyɛ nɔɔr ya nwa'as nɛ o?
15 Hali la'am nɛ man ka' taal la, m kʋ nyaŋi gandig oo;
m na nwɛ'ɛnɛ on kanɛ aan m sariakat la nu'ug
ye o zɔɔm nimbaanlig.
16 Hali man ya'a buol o ka o siak,
mam pʋ tɛn'ɛs ye o na kɛligi m pian'adɛ.
17 O na kɛ ka sisi'etita'ar nwɛ'ɛmi yutim
ka kɛ ka m fɛn'ɛd la maligim paas zaalim-zaalim.
18 O kʋ kɛ ka m vʋ'ʋs baa bi'elaa
amaa ka kpɛm paasidim tɔɔg.
19 Li ya'a anɛ paŋaa,
onɛ an paŋ tita'ar sɔb;
bɛɛ li ya'a anɛ sariakadib,
anɔ'ɔnɛ pa'an o sida suorɛ?
20 Hali baa m ya'a ka' taalɛ,
mam mɛŋ nɔɔr kʋ tisim bʋʋdɛ;
m ya'a pʋn pʋ mɔr gbɛlʋŋɔ,
li nar ye m mɔr taal.
21 La'am nɛ man ka' gbɛlʋŋ la,
m ba'a ka' nɛ m mɛŋ-mɛŋ yɛllɛ,
m mɛŋ gɔs ka m vʋm la anɛ yɔri.
22 Man gɔs ka li wʋsa anɛ yinne, lin ka m ye,
‘O san'amid banɛ ka' gbɛlʋŋɔ nɛ banɛ an tʋʋmbɛ'ɛd dim wʋsa.’
23 Yɛlmugusa ya'a ti kʋ ninkanɛ ka' taalɛ,
Wina'am la'ad o nɛ.
24 Teŋ si'a ya'a li pitɔɔg dim nu'usin,
Wina'am lusid nɛ banɛ kat saria la nini.
Ya'a ka' onɛ, ka anɔ'ɔnɛ?
25 Dunia nwa pʋʋgin, m yʋma zɔt tɔ'ɔtɔ gat zɔzɔt,
ba zɔtnɛ tɔ'ɔtɔ gat ka sumalisim kae.
26 Dabisa la zɔtnɛ nwɛnɛ anrʋŋ kanɛ gat tɔ'ɔtɔ nɛ,
ka nwɛnɛ silʋgʋ na naan agɔlli zuligid ye o gban'e nɔbil nɛ.
27 M ya'a ye, ‘M na bas nyɔnyɔlʋg la wala,
ka basim nindalɔɔr la ka maal sumalisim.’
28 La'am nɛ wala m namisʋg la kpɛn'ɛsidim nɛ dabiem,
bɔzugɔ m mi' ye fʋ kʋ tisim bʋʋdɛ.
29 Ba pʋn gban'e ye m lu ya nwa,
ka bɔ ka m lɛn gɛɛndi m mɛŋ zaalim-zaalim?
30 Hali baa m ya'a sʋʋ m mɛŋ nɛ ki'ibʋ nyain
ka pie m nu'us nɛ zɛɛm,
31 la'am nɛ wala fʋ na lɔsim bian'arin
hali ka fubanɛ ka m yɛ la yaama yiim.
32 O ka' ninsaal nwɛnɛ mam ka m na tun'e gandig oo,
bɛɛ ti mɔr taaba keŋ kɔɔtʋ nii.
33 Yɛlmaan ya'a bɛɛn man nɛ on teŋsʋk
ka kpɛn'ɛsin o nu'ugʋ ti yɛl la ni,
34 ka yisin balaar kanɛ ka Wina'am mɔri bʋ'ʋdim la,
ka dabiem kanɛ ka o kpɛn'ɛsidim la gaad,
35 m naan pian'adin nɛ o ka dabiem kae.
Amaa din bɛ si'em nannanna nwa la,
m kʋ nyaŋi pian' nɛ oo.”