Bilidad yiiga pian'ad
8
1 Ka Bilidad onɛ an Suh nid la lɛbis ye,2 “Fʋ ye fʋ zaŋ saŋa wala pian'?
Fʋ pian'ad la nwɛnɛ sisi'em nɛ.
3 Wina'am na mɔŋ bʋʋd sɔb bʋʋdɛɛ?
Wina'am Onɛ an Paŋtita'ar sɔb la na zan'as linɛ an sidaa?
4 Fʋ biis la da tʋm bɛ'ɛdi pɔ'ɔg o la,
o pʋ yɔɔ ba, ba tʋʋmbɛ'ɛd la sammɛɛ?
ka fabili tis Wina'am Onɛ an Paŋtita'ar sɔb la ye o zɔmif nimbaanlig,
6 fʋ ya'a an pʋʋg yinne sɔb ka pʋ mɔr gba'arɛ,
hali baa di ya'a an si'em wʋsa
Wina'am mɛŋ na lɛbisi fʋ zi'eli fʋ zi'esimin.
7 Fʋn daa pin'il si'em bi'ela la,
fʋ mɔrim na galis hali saŋa kanɛ kenna la.
8 Bu'osim zʋmaaŋ banɛ gaad la yɛla,
ka fʋ na zamis ya'am ti yaanam san'an.
9 Bɔzugɔ tinam anɛ bɛɛga-bɛɛga biis ka zi' si'el si'ela,
ka ti dabisa mɛ pʋ zem si'el dunia nwa nii.
10 Ti yaanam la kʋ pa'alif ka yɛlif linɛ bɛɛ?
Ba kʋ zaŋi ba mi'ilim pian'af ya'am pian'adɛɛ?
11 Na'apu'a-kʋ-si'is-ku'om na nyaŋi yii
nɔbig ka li ka'anɛ zin'ima'asir zin'igaa?
Kɔlkantima na nɔbig zin'ikanɛ ka ku'om kae?
12 Ba ya'a nan nɔbigid ka pʋ siak ki'ebɔ,
ba zɛndigidnɛ kʋdigid tɔ'ɔtɔ nwɛnɛ mɔɔd nɛ.
13 Ala ka li aɛn nɛ banɛ tam Wina'am yɛla la.
Banɛ ba'a kae nɛ Wina'am la ti'ir na ba'as yɔri.
14 On zaŋ o ti'iri niŋ si'el la ka' paŋa,
on ti'e si'el la nwɛnɛ silinsi'ipaanlʋŋ nɛ.
15 O dɛlnɛ o silinsi'ipaanlʋŋ la ka li kɛnsig
ka o mak ye o gammi li ka li tɔnsig.
16 O nwɛnɛ mɔɔdi na bɛ nintaŋin ka ba dɔn'ɔsid ka ku'om wʋm,
ka li tɛɛn gilig lɔmbɔn'ɔg;
17 ka li nya'a tɔɔn gilig tampiins nɛ kuga
ye li nyɛ zin'isʋŋ.
18 Amaa ba ya'a vuoɛn li,
hali sɔ' pʋ lɛn tɛnr on bɛɛn zin'isi'a ya'asɛ.
19 Fʋ nyɛ yaa, banɛ pʋ zɔt Wina'am la nyɔɔdi la,
sieba na kena n di'e ba zin'ig.
20 Amaa gɔsima Wina'am kʋ maligim bas sida sɔba;
o mɛ kʋ sʋŋ tʋʋmbɛ'ɛd dima.
21 O na lɛn kɛ ka fʋ la'ad nɛ sumalisim,
hali fʋ na la' kaas kuŋ nɛ sumalisim ya'as.
22 O na kɛ ka nyan di banɛ kisif la,
ka san'am pitɔɔg dim la ya'.”