7
1 Job da lɛn yɛl ye,“Ka' tʋʋm kpi'ema ma'aa bɛ ninsaal zug dunia nwa nii?
O pʋ nwɛnɛ ninkanɛ tʋm baadi tʋʋmaa?
2 Ka nwɛnɛ sankpan'asi tʋm tadig ka bɔɔd ye winnig li tɔ'ɔtɔ si'em la,
bɛɛ nwɛnɛ onɛ kuod baadi guri o yɔɔd si'em la,
3 ala ka ba kɛ ka m bɛ yɔri bɛllim nwadis wʋsa,
ka dig yʋ'ʋŋ wʋsa liebid ka pʋ tun'e gbisida.
4 M ya'a kpɛn' yʋ'ʋŋ ye m gbis,
m tɛn'ɛsidnɛ ye, ‘Saŋkanɛ ka m na nie?’
Ka bɛog mɛ pʋ nieda, ka m digi liebid bɛog nyain.
5 Zunzunya nɛ dian'ad ma'aa pɛ'ɛli m niŋgbina;
m niŋgbauŋ la anɛ fɛn'ɛdi nyuusid.
6 M dabisa zɔtnɛ tɔ'ɔtɔ hali
gat onɛ ʋgʋd pienni lɔbidi sʋlʋg ʋgʋb daug si'em la,
ka li ba'asʋg wʋsa anɛ yɔri, ka ti'ir kae.
7 M Wina'am, tɛnr ye m vʋm anɛ giŋa nwa;
ka m nif kʋ lɛn nyɛ bʋnsʋŋ linɛ na tisim sumalisim ya'asɛ.
8 Nini banɛ gɔsidim la kʋ lɛn nyɛɛ ma;
fʋ na ieedi m zin'ig, ka m kʋ lɛm bɛɛ.
9 Nwɛnɛ saŋgbana ɛɛnti gaad tɔ'ɔtɔ si'em la,
ala mɛn ka onɛ kpii keŋ kpi'im teŋ kʋ lɛn lɛb naa.
10 O kʋ lɛn lɛb o yin na ya'asɛ,
ba mɛ kʋ lɛn tɛnri o yɛla ya'asɛ.
11 Dinzugɔ m kʋ sinni m nɔɔrɛ;
m na tu'as lin mugusim si'em;
m na nyɔl hali pa'alim sʋnpɛɛnni zem si'em.
12 M anɛ atɛuk ku'om bɛɛ ku'omin bʋnyua,
ka fʋ kɛ ka ba guri maa?
13 M ya'a tɛn'ɛs ye m ya'a diginɛ m sɔŋ zug, m na nyɛ nimma'asim,
ka tɛn'ɛs ye m ya'a gbis, li na kɛ ka m tami m namisʋg la;
14 hali nɛ din mɛnɛ, fʋ vɔlisidim nɛ zaansima,
ka ian'asidi m ya'am nɛ bʋn linɛ wʋsa ka fʋ niedi pa'annim la.
15 Li kɛ ka m siak nɛ ban na yulim ka m kpi
gaad mam bɛ bɛllim si'a nwa.
16 M vʋm la ka' vɔɔnrɛ, m pʋ bɔɔd ye m vʋe saŋa wʋsaa;
basim mam baanlimm ka m bɛllim nwa ka' vɔɔnrɛ.
17 Ninsaal an bɔ ka o yɛla paki fɔ,
o an bɔ ka fʋ tɛn'ɛsidi o yɛla?
18 O an bɔ ka fʋ kpansid o daar woo,
ka makid o saŋa wʋsa?
19 Fʋ kʋ di suguru ka fɛndigi fʋ nindaa m san'anɛɛ,
bɛɛ kɛ ka m paam vʋ'ʋsʋm bi'elaa vɔli m nintɔɔndɛ?
20 Fʋn kanɛ gɔsid ninsaalib wʋsa la,
taal bɔ kimm ka m tʋm tisi fɔ?
Bɔ ka fʋ maalim bʋmbʋ'ʋdir ka bʋ'ʋdim saŋa wʋsa?
Man lieb nɛ ziidi tisi fɔɔ?
21 Bɔzug ka fʋ kʋ di suguru m pɔ'ɔgir zug
ka kɛɛ m tʋʋmbɛ'ɛd taali basɛ?
Bɔzugɔ, li kʋ yuugɛ ka m paae m yaanam san'an.
Fʋ na ieedim ka kʋ lɛn nyɛɛ ma.”