Job lɛbis Elifaz
6
1 Ka Job lɛbis o ye,2 “Gbaagba! Di ya'a nyaŋidin, ba naan makini m sʋnsa'aŋ nwa,
ba naan baŋini li tɛbisim zem si'em.
3 Di tɛbisim na gaad titanbin'isʋg linɛ dig atɛuk gbɛog la.
Linɛ kɛ ka m pian'ad yɔɔg-yɔɔg la.
4 Wina'am Onɛ an Paŋtita'ar sɔb la tɔn mam nɛ o piema,
Ka piema la yabid kpɛn' m siigin.
Wina'am kɛnɛ ka o sʋnpɛɛn kpɛn'ɛsim dabiem.
5 Mɔɔgin bʋŋ ya'a nyɛ yaama ɔnbida, o na kaasidaa,
bɛɛ lɔlig na ɔnbid yam ka lɛm bʋʋnna?
6 Ba dit dikanɛ ka yaarim kae,
bɛɛ ya nam mi' nyɛ ka gɛlpielim mɔr mimilim?
7 Man diibi an si'em la,
ka m ya'amlɛog ka' li ni baa bi'elaa.
8 Mam ya'a sɔs si'ela, Wina'am na gandigi maa?
O na siaki maali m sʋʋnr bɔɔdim?
9 O ya'a kpɛn zaŋ o nu'ugʋ mɛdiginim
ka li naae, li pʋ sɔn'oe yaa?
10 Amaa linɛ tisidim sumbʋgʋsʋm anɛ ye,
la'am nɛ tɔɔg la wʋmim si'em la,
m pʋ ki'is Onɛ an Kasi la yɛlʋgɔ.
11 Paŋ bɔ ka m mɔr ka li na tisim ti'irɛ?
Bʋnsʋŋ bɔɔ bɛ tuon ka m na maal suguru gura?
12 M paŋ paae kugirɛɛ?
Ka m niŋgbiŋ anɛ kʋntzɛn'ugɔ?
13 Ya'a an sida, m pʋ lɛm mɔr paŋ kanɛ ka m na sʋŋi m mɛŋa,
ka linɛ naan kɛɛn ka m nyaŋ la mɛ lɛn kae.
14 Di nar ye ninkanɛ bɛ yɛltɔɔgin nyɛ sʋŋiri o zuanam san'an,
hali baa o ya'a pʋ lɛn zɔt Wina'am Onɛ an Paŋtita'ar sɔb la dabiem.
15 Amaa man taaba nwa anɛ banɛ pʋʋgʋ pʋ paada.
Ba nwɛnɛ kɔlkanɛ ku'om pʋ ya'asid kpiɛnrɛ.
Ba nwɛnɛ ku'osuobanɛ pɛ'ɛl nɛ ku'om
ka li pʋ yuugɛ ka ku'om la pʋbigi gaad.
16 Sɛɛung ka saa niid hali
ka sakuga lii pɛ'ɛli li ka li badigid;
17 amaa ʋʋn ya'a nie ku'om la pʋ lɛm pʋbida,
ka nintaŋi yit hali la ka li kʋdig bar-bar.
18 Kpikpinkpinnib banɛ ban'adi ba yʋgʋma ya'a kena
ka bie ye ba nu ku'om,
ba kennɛ hali kpɛn' pipirigin ti bɔdig.
19 Hali yʋgʋma banɛ yi Tema teŋin gɔɔnd
ka bɔɔd ku'om ye ba nu la,
Seeba teŋ kpikpinkpinnib ya'a kena nɛ ti'ir,
20 ba sʋnya san'amidnɛ
bɔzugɔ ba na nyɛ ka ku'om kae.
21 Yanam mɛ anɛ ala, ya kʋ tun'e sʋŋi ma;
ya nyɛɛm namisʋg la ka dabiem gban'e ya.
22 M nam mi' sɔsi ya ye, ‘Tisiminim piini,
bɛɛ zaŋiminɛ ya mɔrim yɔ man yɛla,
23 bɛɛ faanminimɛ yisi m dataas nu'usin,
bɛɛ, faanminim nimbɛ'ɛdnam mugusʋginɛ’?
24 Tɔ, pa'aliminim ka m na an baanlimm ka kɛlis,
yɛliminim man gbɛlig si'el.
25 Ya'a an sida, yɛlmɛŋir tɔi,
amaa ya zɛrigir la wʋsa nyɔɔd an bɔ?
26 Ya bɔɔdi yɛl ye m pian'ad la mɔri gbɛlʋŋ,
ka gɔs man yɛl si'el la wʋsa ka li an pɛbisim?
27 Ya maan kpiibis nwɛnɛ ba ka' vɔɔnrɛ
ka pʋ zɔti ba nimbaanliga.
Hali ya tun'e yii ya zua nya'aŋ ka kuos o.
28 Amaa dimi suguru ka gɔsinim.
Ya gɔs ka m anɛ onɛ na zi'eni ya tuonnɛ ma' dama'am?
29 Basimi yanamɛ yɛt si'el la.
Maligim tɛn'ɛsi sʋ'ʋŋa ka da mɔŋinim bʋʋdɛ.
30 Ya tɛn'ɛs ye m ma'adnɛɛ?
Ya gɔs ka m zi' sida nɛ ziri bakidaa?”