5
1 Ka Elifaz tɔ'ɔŋ pian'ad la ye,“Fʋ ya'a bɔɔd, fʋn buolim si'em wʋsa, amaa anɔ'ɔnɛ na gandigi fɔ?
Maliak san'an ka fʋ ye fʋ nyɛ sʋŋir bɛɛ? Ayei!
2 Asida, sʋntɔɔg kʋʋd zɔlʋg,
ka fufum kʋʋd zi'ilim daan.
3 Mam mɛŋ nyɛ ka zɔlʋg ba'a nya'a,
ka li pʋ yuugɛ ka o yir ba'as yɔri.
4 O biis pʋ mɔr banɛ na sʋŋi baa;
ba kadi ba saria ka ba lu
ka onɛ na sʋŋi ba kae.
5 Ki kanɛ ka o kua la, nɔŋ dim na buni lii sʋ'oe,
la'am nɛ on bun sieba gɔn'ɔs sʋʋgin la,
faandib na zaŋ o mɔrim la wʋsa.
6 Namisʋg pʋ naanid teŋinɛ yit naa,
ka yɛla mɛ pʋ bun teŋin naa.
7 Saalib wʋsa du'anɛ nɛ yɛla
nwɛnɛ nyɔ'ɔsi yit bugumin si'em la.
8 Ya'a aan mam, man naan ieen Wina'am zin'ig;
man na zaŋi m yɛla wʋsa paae o tuon na.
9 Onɛ tʋm kilima banɛ ka fʋ kʋ tun'e gban'e li gbinnɛ,
ka tʋm nyalima tʋʋma hali ka sɔ' kʋ nyaŋi kaalɛ.
10 Onɛ kɛt ka saa niid teŋgbauŋ zug,
ka kɛt ka ku'om bɛ pɔɔdin.
11 Onɛ dʋ'ʋsid tadimnam saazug,
ka bɛlisid banɛ kaasid kʋʋr.
12 Onɛ san'amid zam dim gban'ar
ka ban zigid si'el wʋsa lieb zaalim.
13 O bɛnd ya'am dimnɛ gban'adi ba nɛ ba mi'ilim pʋʋgin,
ka ba bɔɔdim wʋsa lieb yɔri.
14 Hali baa li ya'a an nintaŋ ba niŋidnɛ nwɛnɛ ba bɛnɛ likin nɛ,
ka yiridi gin nintaŋ tisʋʋs wʋʋ li anɛ yʋ'ʋŋ nɛ.
15 Onɛ gur tadimnam
ka gu'udi baa yisid banɛ nɔya tɔi wʋʋ yabid la san'an,
ka faandi ba paŋ dim nu'usin basid.
16 Alazug tadimnam yʋ'ʋn mɔr ti'ir
ka banɛ tʋm dinɛ pʋ nar la pʋ lɛm mɔr nɔɔr ya'asɛ.
17 Yɛlsʋm bɛ nɛ onɛ ka Wina'am sa'al o la;
alazugɔ Wina'am ya'a tɛɛgi fʋ tʋbir
fʋn da kɛ ka li zabi fɔ.
18 Onɛ pu'alimid, onɛ mɛ lɛn ti'ebid;
onɛ tisid dɛmis, onɛ mɛ ma'ad dɛmis la.
19 O na yisif yɛltɔɔd ayuobʋ pʋʋgin;
hali baa li ya'a paaf nɔɔr ayɔpɔi, o na yisif.
20 Kɔ'ɔm ya'a li na, o na gurif ka fʋ kʋ kpii,
hali zaba pʋʋgin, o na lusif ka sʋ'ʋg kʋ kʋʋ fɔ.
21 O na gurif ka saalib nɔya kʋ niŋif si'ela.
San'auŋ ya'a paae na fʋ kʋ zɔ dabiem.
22 San'auŋ nɛ kɔ'ɔm saŋa fʋn la'adnɛ,
fʋ pʋ zɔt mɔɔgin bʋnkɔnbbɛ'ɛdɛ.
23 Kugbanɛ bɛɛ fʋ pɔɔdin la kʋ lɛn san'ami fʋ zʋʋdɛ,
ka mɔɔgin bʋnkɔnbid na bɛ nɛf nɛ sumbʋgʋsʋm.
24 Fʋ mɛŋ na baŋ ye nimma'asim bɛɛ fʋ yin,
ka fʋ bʋnkɔnbid wʋsa na bɛ, ka baa yinne kʋ kpii.
25 Gɔsima, fʋ biis na zu'oe,
ka fʋ tuŋ tiɛn wʋʋ mɔɔdi galis teŋ zug si'em la.
26 Fʋ na kʋdigi paae fʋ bɛn ka nyaan kpi,
nwɛnɛ ki ɛɛn bi'ig si'em ka ba nyaan bun la.
27 Ti kpans ya, ka baŋ ye nɛ' anɛ sida.
Dinzug, wʋm sʋ'ʋŋa ka zaŋi lii tʋm tʋʋma fʋ bɛllimin.”