Elifaz pian'ʋk
4
1 Ka Elifaz onɛ an Teman nid la lɛbis ye,2 “Nid ya'a lɛbis o nɔɔrɛ, li na daami fɔɔ?
Ka anɔ'ɔnɛ na nyaŋi gban'e o mɛŋ ka da pian' si'ela?
3 Tɛnr fʋn da pa'al nidib bɛdegʋ
ka kpɛmis tadimnam si'em.
4 Fʋ sa'alʋg da sʋŋ banɛ bɔɔd liig,
ka kpɛmis banɛ giinla kɛns la.
5 Ka yɛltɔɔg yʋ'ʋn paae fʋ mɛŋ ka fʋ tadig,
li di'igif nɛ ka fʋ sʋʋnr wʋsa san'am.
6 Dinzugɔ fʋ Wina'am zɔtim la kʋ tisif kpi'euŋɔɔ?
Ka fʋ sida bɛllim la kʋ tisif ti'irɛɛ?
7 Fʋn mɛ tɛn'ɛsim gɔsɛ, nid na zi'e sida pʋʋgin ka ba'as yɔrii?
Yaanɛ ka fʋ nam mi' wʋm ye sida dim paam san'auŋɔ?
8 Mam mɛŋ kpansi gɔs
ka banɛ wʋsa kuod bɛ'ɛd ka bʋt yɛla mɛ bunnɛ bɛ'ɛd.
9 Wina'am ya'a vʋ'ʋs fɛɛn, ba san'amidnɛ;
o sʋnf ya'a duoe, ba mɛlimidnɛ.
10 Gbigim tun'e nwa'am ka nyuul hali,
amaa la'am nɛ wala o nyina kɔya.
11 Gbigimnya'aŋ pʋ nyaŋi gban'e bʋnkɔnbʋgɔ
ka li nyaŋ o, ka o biis widig yaaŋ-yaaŋ.
12 Kɛlisima, labaar kɛn man san'an na,
ka m tʋba wʋm ka li nya'amid.
13 Li kena nwɛnɛ zaansʋŋ nɛ
yʋ'ʋŋ saŋa ka nidib wʋsa gbisid.
14 Ka dabiem gba'am hali ka m kirid
ka m kɔnba dammid.
15 Ka pɛbisim nwɛ'ɛmi gaad
ka li kpɛn'ɛsim waad ka m niŋgbina wʋsa kpɛn' waki.
16 Ka li fɔn baanlimm,
amaa ka m zi' lin an si'ela.
Ka di nwɛnɛ si'el nɛ zi'e m tuon,
ka m wʋm ka li yɛt ye,
17 ‘Ninvʋsaal na tun'e an pʋpiel sɔbi gaad Wina'am?
Ninsaal na tun'e an nyain gaad onɛ maal oo?
18 Wina'am ya'a ye o mɛŋ-mɛŋ tʋmtʋmnib pʋʋg pʋ paada,
hali ka ye o maliaknam tʋm dinɛ pʋ nara,
19 ka ninsaalib banɛ ka o nɔk ya'adi maal
ka ba na tun'e san'ami ba hali gaad ban san'amid zʋnzʋnr si'em la!
20 Ba tun'e kpi bɛogʋn bɛɛ zaamnɔɔr.
Ba tun'e kpi, hali ka sɔ' ba'a kae.
21 Ba ya'a yisi ba vʋm,
ba kpiidnɛ yɔɔg-yɔɔg.’ ”