Job pian' zɛrigi o du'am dabisir
3 “Kɛl ka m du'am dabisir la ba'as yɔri,
hali nɛ yʋ'ʋŋ kanɛ ka ba yɛl ye, ‘Ba tʋk biribiŋ pʋʋg la!’
4 Kɛl ka dabiskan lieb lik
ka Wina'am onɛ bɛɛ agɔl la pʋn da tɛn'ɛsi li yɛllɛ.
Da kɛ ka nintaŋ yi daakanɛ.
5 Kɛl ka dabisir la kilim lik biridi;
kɛl ka saŋgbansabilig ligili li,
ka lik nyaŋ nintaŋ dabiskaŋa nwa ni.
6 Kɛl ka lik linɛ sɔbig biridi sʋ'oe daakan yʋ'ʋŋ la.
Da kɛ ka ba kaali li paas dabisa banɛ bɛ yʋʋm la pʋʋginɛ,
bɛɛ ba pɛ'ɛsi li nwadsi'a nii.
7 Pʋn da kɛ ka pu'a nɔk pʋʋg yʋ'ʋŋ kanɛ;
kɛl ka sɔ' da wʋm sumalisim tʋkpiidʋgɔ.
8 Kɛl ka banɛ mɔr nɔtɔɔd pɔ nɔɔri niŋ dabisir nwa,
ka teŋgban kpɛn'ɛdib bɔ bɔɔb dabisir nwa zug.
9 Kɛl ka li bɛkɛung nwadbibis lieb lik;
kɛl ka li gu'us nintaŋi gʋ'ʋŋ
ka kʋ nyɛ bɛogʋn sɔɔnrim,
10 bɔzugɔ li sʋm ye li li'inimi m ma pʋʋgin
ka o da du'am ka m nyɛ yɛltɔɔd bamaa.
11 Bɔzug kimm ka m da pʋ lɛbi m du'am daarɛ,
ka duoe na pʋ mɔr vɔɔnr nwa?
12 Bɔzug ka pu'adu'as la da du'asi m ma,
ka bɔ ka m ma da tisim bin'isim ka m mu'a?
13 Anwaa m digin nɛ baanlimm nɛ sumbʋgʋsʋm.
Anwaa m gbisidin nɛ ka vʋ'ʋsid.
14 M ya'a kpiinɛɛ m naan bɛɛn kpi'im teŋ,
ka la'as nɛ banɛ pʋn kpi la nɛ
na'anam nɛ ba na'ayikpɛm banɛ da sʋ'oe dunia
ka da mɛ teŋ titada la.
15 Anwaa m vʋ'ʋsidin nɛ ninvʋsʋma banɛ mɔr sanlima,
ka pɛ'ɛli ba ya' nɛ anzurifa la.
16 Bɔzug ka ba da pʋ pin'im
wʋʋ pu'a ɛɛn du'a bikpi'im ka ba pin' o si'em la,
bɛɛ bilia kanɛ pʋ nyɛ nɛɛsim ka lɛb si'em la?
17 Kpi'im teŋ ka bugusnam pʋ lɛn tʋm bugisim tʋʋmaa,
ka banɛ tadig nyɛt vʋ'ʋsʋm.
18 Anina mɛn ka banɛ da bɛ sanrega ni la mɔr yɔlisim ka bɛ baanlimm,
ka pʋ lɛn wʋm banɛ da mugusidi ba la tansʋg ya'asɛ.
19 Tadimnam nɛ kpi'emnam wʋsa bɛɛ anina,
ka yammis nyɛ yɔlisim ba dima nu'usin.
20 Kassa! Nɛɛsim an bɔɔ tis sʋnsa'aŋ daana?
Ka vʋm an bɔɔ tis onɛ bɛ tɔɔg pʋʋginɛ?
21 Ba ieed kum ka kum pʋ kennaa,
ba ieed kum hali nɛ nimmua
gat ban na ieed la'asʋŋ dinɛ su'a.
22 Ba mɔr sumbʋgʋsʋm bɛdegʋ
ka maan sumalisim ban paae yaʋgʋn la zug.
23 Bɔzug ka ba tisid onɛ ka' bɛog nyɔvʋrɛ;
ka Wina'am gan'al ye ba na namis hali la?
24 M sin'uŋ lieb diibi tisim,
ka m ʋʋnsʋg nwɛnɛ ku'om kpa'adnɛ.
25 Gbaagba man zɔt si'el la, linɛ paam!
Linɛ ka m sid zɔt amɛŋa mɛŋa la paam.
26 Ayei, m pʋ mɔr sumbʋgʋsʋm, li ka' m sʋ'ʋm.
M ka' vʋ'ʋsʋm, li anɛ daauŋ ma'aa.”