Sʋntaana mak Job laafi zin'igin
2
1 Daar yinne ya'as ka Wina'am biis la'as ye ba zaŋi ba mɛŋi pa'al Wina'am, ka Sʋntaana mɛ paasi dɔlli kena. 2 Ka Zugsɔb la bu'os Sʋntaana ye, “Fʋ yi yaanɛ na?” Ka Sʋntaana gandig Zugsɔb la ye, “Man yinɛ teŋgbauŋʋn la na, ka bɛɛ anina giligid zin'is wʋsa.” 3 Ka Wina'am bu'os o ye, “Fʋ tiɛn m tʋmtʋm Job yɛlaa? Ninsaal kae teŋgbauŋ nwa zugʋ nwɛn o. O anɛ ninvʋsʋŋ ka ka' gbɛlʋŋɔ, ka mɛ an pʋʋg yinne sɔb. O anɛ onɛ zɔt mam Wina'am ka kis dinɛ wʋsa an tʋʋmbɛ'ɛd. Hali baa fʋn zaŋimi tugul nɛ o ka san'am o zaalim-zaalim la, o nan kpɛn zi'enɛ o burikinnim la pʋʋgin.” 4 Ka Sʋntaana lɛbis ye, “Mɛ vʋm an si'el wʋsa, ninsaal kʋ maligim siaki zaŋ o vʋm tiak nɛ si'ela. 5 Kɛl ka tɔɔg paae o mɛŋ niŋgbina ka fʋ na nyɛ ka o ki'isif.” 6 Ka Zugsɔb la yɛl Sʋntaana ye, “Tɔ, gɔsima, m zaŋ o si'el wʋsa niŋi fʋ nu'ugin, ya'a ka' o vʋm ma'aanɛ. Da si'is o vʋm la.” 7 Ka Sʋntaana yi Wina'am tuon ka kɛ ka sankpangbiriba gban'e Job niŋgbina hali yii o nɔba ni paae o zupaasʋʋg 8 Ka Job nɔk sɛwia ɛnbisid o mɛŋ ka keŋ zin' tampʋʋr zug. 9 Ka o pu'a yɛl o ye, “Fʋ nan kpɛn zi'enɛ fʋ burikinnimin laa? Fʋ ya'a ki'is Wina'am ka kpi, di pʋ sɔn'oe yaa?” 10 Ka o lɛbis ye, “Fʋ pian'ad la nwɛnɛ pu'a kanɛ ka' ya'am nɛ. Bʋnsʋma ma'aa ka ti di'esid Zugsɔb la san'an ka lɛɛ kʋ di'e bʋmbɛ'ɛdɛ?” Yɛlbama wʋsa pʋʋgin, Job pʋ ya'ae o nɔɔri pian' Wina'am bɛ'ɛdɛ.11 Job zuanam atan' da bɛ; ba da anɛ Elifaz onɛ an Teman nid la, nɛ Bilidad onɛ an Suh nid, nɛ Zofar onɛ mɛ an Naama nid la. Ban da wʋm yɛltɔɔg dinɛ paae o la, ba da la'as taaba ye ba keŋ bɛlis o. 12 Ban da nam bɛ lalli ka nyɛ o la, ba da pʋ baŋ ye onɛ la. Ba sʋnya da san'am nɛ hali ka ba pin'ili kaasid ka aansidi ba fuud ka nɔk tampɛligim niŋi ba zut ye li pa'ali ba sʋnsa'aŋ. 13 Ka ba paae na la'am zin'in teŋin nɛ o daba ayɔpɔi nintaŋ nɛ yʋ'ʋŋ. Ka ba sɔ'ɔsɔ pʋ ya'ae o nɔɔri yɛl o si'ela bɔzugɔ ba da nyɛ ka o namisʋg la galis hali.