Job
Job nɛ o yidim yɛla
1
1 Dau sɔ' da bɛ Uz teŋin ka o yʋ'ʋr buon Job. Dau nwa da anɛ ninvʋsʋŋ ka ka' gbɛlʋŋɔ, ka mɛ an pʋʋg yinne sɔb. O da anɛ onɛ zɔt Wina'am ka kis dinɛ wʋsa an tʋʋmbɛ'ɛd. 2 Dau nwa da mɔri biribis ayɔpɔi nɛ bipumis atan', 3 ka mɔr pɛ'ɛs tusa ayɔpɔi nɛ yʋgʋma tusa atan' nɛ na'akuoda tusir, nɛ bʋmis kɔbis nu nɛ sankpan'asnam bɛdegʋ. O da anɛ nintita'ari gaad nimbanɛ bɛ ya-nya'aŋ la wʋsa. 4 O biribis la da ɛɛnti maannɛ di'ema ba yaan la ti kaligi ba ya' la wʋsa; ka buoli ba tanp la ka ba kena di ka nu nɛ ba. 5 Ba di'ema dabisa la ya'a gaad, Job na tʋm buoli ba ka maali ba nyain. O da ɛɛn tɛn'ɛs o sʋʋnrin ye, daasi'erɛɛ o biis la pa'ati tɛn'ɛs pʋtɛn'ɛbɛ'ɛd Wina'am yɛla. Dinzug, o da ɛɛn duonɛ bɛkɛungʋ maal maan linɛ nyu'od bugum o biis la yinne-yinne zug.Sʋntaana dɛŋi mak Job la yɛla
6 Daar yinne ka Wina'am biis la'as ye ba zaŋi ba mɛŋi pa'al Wina'am, ka Sʋntaana mɛ paasi ba zug. 7 Ka Zugsɔb la bu'os Sʋntaana ye, “Fʋ yi yaanɛ na?” Ka o gandig ye, “Man yinɛ teŋgbauŋʋn la na, ka bɛɛ anina giligid zin'is wʋsa.”
8 Ka Wina'am bu'os o ye, “Fʋ tiɛn m tʋmtʋm Job yɛlaa? Ninsaal ka' teŋgbauŋ nwa zugʋ nwɛnɛ o. O anɛ ninvʋsʋŋ ka ka' gbɛlʋŋɔ, ka mɛ an pʋʋg yinne sɔb. O anɛ onɛ zɔt mam Wina'am ka kis dinɛ wʋsa an tʋʋmbɛ'ɛd.”
9 Ka Sʋntaana lɛbis Wina'am ye, “Di anɛ zaalim ka Job zɔt fʋn Na'awinɛɛ? 10 Mɛ fʋ zaŋi gu'udi gu' on nɛ o yidim nɛ on mɔr si'el wʋsa? Fʋ mɛ niŋ o zug bareka ka o pɛ'ɛs nɛ niigi du'a pɛ'ɛl teŋ la wʋsa. 11 Tiɛnmi fʋ nu'ugʋ san'am o mɔrim la wʋsa ka fʋ na nyɛ ka o ki'isi fʋ, fʋ nifin.” 12 Ka Zugsɔb la yɛl Sʋntaana ye, “Tɔ, on mɔr si'el wʋsa la bɛɛ fʋ nu'ugin, amaa mid ka fʋ si'is o mɛŋ.”
13 Daar yinne ka Job biribis nɛ o bipumis mɔri ba di'ema o bikpɛɛm la yinne dit ka nuud, 14 ka sɔ' kɛn Job san'an na yɛl o ye, “Na'akuoda la bɛɛn nɛ anina kuod ka bʋmis la ɔnbid mɔɔd anina baba 15 ka Seba dim libigi ba kadi ba wʋsa keŋ. Ba kʋ tʋmtʋmnib la wʋsa, ka mam ma'aa pɔns ka kena ye m yɛlif!”
16 On nan bɛɛ anina pian'ad la ka nid yinne lɛm paae na ye, “Bugum naan agɔla li na kanb pɛ'ɛs la nɛ fʋ tʋmtʋmnib la wʋsa, ka mam ma'aa pɔns ka kena ye m yɛlif!”
17 On nan bɛɛ anina pian'ad la ka yinne mɛ zɔɔ paae na ye, “Kaldea dimi la'as taab zin'is atan' kpɛm bʋʋl na kadi fʋ yʋgʋma la wʋsa keŋ ka kʋʋ fʋ tʋmtʋmnib la wʋsa, ka mam ma'aa pɔns ka kena ye m yɛlif!”
18 On nan bɛɛ anina pian'ad la ka nid yinne lɛm paae na yɛl ye, “Fʋ na'akim nɛ fʋ bipumis la bɛ nɛ fʋ bikpɛɛm la yinne maan di'ema dit ka nuud, 19 ka sisi'etita'ar naam pipirigin na kpɛn gubil yir la ka li luu bʋʋli ba ka ba kpi, ka mam ma'aa pɔns ka kena ye m yɛlif!”
20 Ka Job duoe aans o fuud ka pʋn o zug ye o pa'al o sʋnsa'aŋi an si'em, ka vanbin teŋin sɔs Wina'am 21 yɛt ye,
“M da naani m ma pʋʋgin yinɛ zaalim na,
zaalim mɛn ka m na lɛb.
Zugsɔb la tisim, onɛ lɛn di'e ya'as;
Zugsɔb la yʋ'ʋr nar nɛ girima.”
22 La'am nɛ linɛ niŋ la wʋsa, Job da pʋ tʋm bɛ'ɛd bɛɛ nyɔl Wina'am ye o tʋm o bɛ'ɛdɛ.