Tuongatib 20

Israel dimi bɛ Zugsɔb la tuon Misipa teŋin la yɛla

1 Ani ka Israel dim wʋsa din yi Dan ti paae Beerseba teŋin nɛ Gilead sʋ'ʋlim dim da yina vuguri nwɛnɛ nid yinne nɛ la'as taaba Zugsɔb la tuon Misipa teŋin. 2 Ka tuongatib banɛ an Israel dim buudi la wʋsa zin'inɛ ba zin'isa ni Wina'am nidib la wʋsa tuon, nɛ soogianam tusa kɔbis naasi banɛ bɔb nɛ zaba sʋ'ʋs. 3 (Benjamin dim da wʋm ye Israel dim keŋ Misipa) Ani ka Israel dim la yɛl ye, “Yɛlimi ti yɛlpakir kanɛ maal la.” 4 Ala ka Levi dɔɔg nid la, pu'a kanɛ ka ba kʋ la sid la, yɛl ye, “Man nɛ m pu'abili daa ken Gibea teŋin, Benjamin sʋ'ʋlimin, ye ti gbɛn. 5 Yʋ'ʋŋʋ daa sɔb la Gibea nidib la daa kena gilig yir la, bɔɔd ye ba kʋʋm. Ba bibigi m pu'abil la digin nɛ o hali ka o ti kpi. 6 M daa nwaansi m pu'abil la pʋdigi tis zin'ikanɛ wʋsa ka Israel dim bɛ ka li aan ba ba' sʋ'ʋlim la, bɔzugɔ nidib nwa tʋm nɛ yɛlbɛ'ɛd nɛ dinɛ an nyan itʋŋ Israel teŋin. 7 Tɔ, yanam Israel dima, pian'am gban'e yanamɛ na kʋʋ li si'em.” 8 Nidib la daa duoe vuguri yɛl ye, “Ti wʋsa kʋ kulɛ. Ayei, ti nid baa yinne kʋ kulɛ! 9 Amaa nannanna tinamɛ na niŋ Gibea dim si'em nwana: Ti na tʋ'ʋsi ba nwɛnɛ bʋgʋlʋm-bʋgʋlʋm la na pa'al si'em. 10 Ti na gaans nidib piiga nidib kɔbiga wʋsa ni Israel dɔɔd la wʋsa ni, ka gaans nidib kɔbiga nidib tusir pʋʋgin, ka gaans nidib tusir nidib tusa piiga pʋʋgin ka ba kuli bɔ diibi mɔr na tis zabzabidib la ka ba keŋ Gibea Benjamin teŋin. Ba na niŋi ba dinɛ nar, yɛlpakir kanɛ ka ba maal Israel teŋin la yɛla.” 11 Alazug Israel nidib la da duoe la'as taaba maal nɔɔr yinne zab nɛ teŋ la. 12 Israel dɔɔd la wʋsa da tʋm nidib Benjamin sʋ'ʋlim tɛɛnsin la wʋsa yɛt ye, “Yɛlpakir kanɛ maali ya sʋʋgin la gbin an bɔ? 13 La'asim tʋʋmbɛ'ɛd dim banɛ bɛ Gibea nwa la ka ti kʋʋ ba ka yis bɛ'ɛd Israel dim sʋʋgin!” Amaa Benjamin dim la da pʋ kɛlisi ba taaba banɛ an Israel dim la, 14 ka yii ba tempʋʋdin la la'as taaba Gibea teŋin ye ba zab nɛ Israel dim. 15 Ka Benjamin dɔɔg dim la duoe vuguri la'as zabzabidib banɛ zabid nɛ sʋ'ʋs la tusa pisi nɛ ayuobʋ ba teŋin la, paas nidib kɔbisyɔpɔi banɛ ka ba gaŋi ba Gibea la. 16 Soogia bama nwa wʋsa sʋʋgin ninsieba da bɛɛ anina ka ba gaansi ba ka ba an gɔbʋs, hali ka ba ya'a zaŋ kugiri vɛnligi lɔb ninsaal zuobʋg yinne ba pʋ nyɛsigida. 17 Israel sʋʋgin, ya'a ka' Benjamin ni, ka nidib tusa kɔbis naasi da bɛ ani zamis sʋ'ʋs zaba sʋ'ʋŋa.

Zabaa duoe nɛ Benjamin dim la yɛla

18 Israel dim da keŋ Betel teŋin bu'os Wina'am. Ba da yɛl ye, “Ti sʋʋgin la, anɔ'ɔnamɛ na dɛŋi duoe keŋ zab nɛ Benjamin dim la yiiga?” Ka Zugsɔb la lɛbis ye, “Juda dimi na keŋ yiiga.”

19 Bɛogʋ da nie la ka Israel dim la'as taaba zin'ikanɛ pʋ lal nɛ Gibea la. 20 Ka Israel dim yina ye ba zab nɛ Benjamin nidib la ka zi'enɛ ba zaba zi'esa ni Gibea teŋin ye ba zab nɛ ba. 21 Benjamin dim la da yi Gibea na zabi kʋ Israel dim tusa pisi nɛ ayi' dabiskan la.

22 Amaa ka Israel dim kpɛ'ɛŋ taaba ka lɛn lɛbi zi'enɛ ba zi'esa ni nwɛnɛ ban daa zi'en si'em ba pin'ilʋg daar la. 23 Israel dim la da keŋ Zugsɔb la san'an nɛ kukuma hali ti paae zaam, ka bu'os Zugsɔb la ye, “Ti lɛn lɛbi zab nɛ ti ba'abiis banɛ an Benjamin nidib laa?” Ka Zugsɔb la da lɛbis ye, “Kem zabi nɛ ba!” 24 Ani ka Israel dim la lɛn li'el Benjamin dim la, dabisir kanɛ paas ayi' la daar. 25 Saŋa kaŋa, Benjamin nidib la da naam Gibea yina ye ba tʋ'ʋsi ba la, ba da lɛn kʋ nɛ Israel nidib tusa pii nɛ anii; ba wʋsa da bɔbnɛ nɛ zaba sʋ'ʋs.

26 Ani ka Israel dim la, nɛ nidib la wʋsa, keŋ Betel, zin' anina ka kum Zugsɔb la tuon. Ka lɔ nɔɔr dabiskan la ti paae zaam, ka maal maan dinɛ ka ba nyu'oe, nɛ taaba la'asʋg maana tis Zugsɔb la. 27 Ka Israel dim bu'os Zugsɔb la li yɛla (saŋkan la Wina'am Nɔnaar Daka la da bɛɛ ani 28 ka Finehas onɛ an Eleazar biig ka an Aaron yaaŋ la bɛɛ ani ka gɔsidi li tʋʋma). Israel dim da bu'os Zugsɔb la ye, “Ti lɛn lɛbi zab nɛ Benjamin nimbanɛ aan ti ba'abiis la, bɛɛ ti kɛla?” Ka Zugsɔb la lɛbis ye, “Kemi, bɛogɔ m na zaŋi ba niŋi ya nu'usin.” 29 Ani ka Israel dim zaŋ zabzabidibi niŋi ba su'asa ni gilig Gibea. 30 Ba da lɛn tʋ'ʋs Benjamin dim la dabisir kanɛ paas atan' la ni, ka zi'enɛ ba zi'esa ni tʋ'ʋs Gibea nwɛnɛ ban ɛɛnti niŋid si'em la. 31 Benjamin dim la da yina ye ba tʋ'ʋsi ba, ka yi tempʋʋg la yiŋ na ka pin'ili pu'alim Israel dim la nwɛnɛ ban ɛɛnti niŋid si'em la, alazug ba da digil nidib pistan' paalʋ ni nɛ suoya ni, suokanɛ wa'ae Betel nɛ Gibea Linɛ bɛ pɔɔdin la. 32 Benjamin nidib la yʋ'ʋn da yɛt ye, “Ti lɛn nyaŋidi ba nɛ nwɛnɛ tinam ɛɛnti nyaŋid si'em la!” Ka Israel dim mɛ yɛt ye, “Kɛlli ka ti lɛb nya'aŋ ka ba yi tempʋʋg la yiŋi keŋ suoya la ni!” 33 Israel dim la wʋsa da lɛb nya'aŋi zi'en Baal Tama teŋin, ka Israel zabzabidib banɛ su'a la zɔɔ yii ba su'asa ni na ban da bɛ si'eli gilig Gibea tempʋʋg la. 34 Ani ka Israel dim tusa piiga banɛ mi' zaba hali la da tʋ'ʋsi ba nɛ zaba Gibea teŋin. Zaba la da mu'oe nɛ hali, ka Benjamin dim pʋ baŋ ye yɛlbɛ'ɛd na paae baa. 35 Zugsɔb la da nyaŋ Benjamin dim la Israel dim tuon. Ka daakan la Israel dim la da kʋ Benjamin dim la tusa pisi nɛ anu nɛ kɔbiga, ba wʋsa da anɛ banɛ bɔb nɛ zaba sʋ'ʋs. 36 Ani ka Benjamin dim la baŋ ye ba nyaŋi ba, Israel dim la da bas suori tis Benjamin dim la, bɔzugɔ ba da ti'e nɛ zabzabidib banɛ ka ba su'a ba Gibea baba la. 37 Nidib banɛ da su'a la da zɔ tɔ'ɔtɔ kpɛn' Gibea n yadig tempʋʋgin la wʋsa ka kʋʋ ba wʋsa nɛ sʋ'ʋs. 38 Israel dim zabzabidib la da pa'al taaba zanbin ye ba kɛl ka nyɔ'ɔs tita'ar duoe tempʋʋgin la 39 ka Israel dim na fɛndigi lɛb zaba la ni na. Saŋkan la Benjamin dim la da pin'ili pu'alim Israel nidib la kʋʋ ba nwɛnɛ nidib pistan', ka yɛl ye, “Ti nyaŋi ba nwɛnɛ tinamɛ ɛɛnti nyaŋidi ba si'em la!” 40 Amaa ban ti kɛ ka nyɔ'ɔs duoe tempʋʋgin la, Benjamin dim la da gi'e nyɛ ka tempʋʋg la wʋsa ka nyɔ'ɔs duodi dʋt saŋgbana ni. 41 Ani ka Israel dim la tuligi lɛbi ba san'an na, ka dabiem kpɛn' Benjamin dim la, bɔzugɔ ba da baŋ ye yɛlpakir luu ba zugin. 42 Alazug ba da naam Israel dim la tuonnɛ zɔti kpa'ad pipirigin, amaa ba da pʋ nyaŋi zɔɔ pɔnsɛ. Ka Israel dim la yi tempʋʋdin la na kʋʋ ba anina. 43 Ba da giligi ba ka kadi ba zɔɔ nyaŋi ba Gibea teŋ nɔɔrin dinɛ bɛ teŋ la nya'aŋ la. 44 Nidib tusa pii na nii banɛ an Benjamin dim la da kpi, ba wʋsa da anɛ banɛ mi' zaba sʋ'ʋŋa. 45 Ban yʋ'ʋn da tuligi zɔti kpa'ad pipirig baba paad Rimmon tampiing la, Israel dim la da kʋ nidib tusa anu digili ba suor la nɔɔrin, ka kpɛm muki kadi ba hali ti paae Gidom n kʋ Benjamin dim la tusa ayi' paas.

46 Dabiskan la Benjamin nidib la zabzabidib tusa pisi nɛ anu da kpi, ba wʋsa da anɛ banɛ mi' zaba sʋ'ʋŋa. 47 Amaa nidib kɔbisyuobʋ da fɛndigi zɔɔ keŋ pipirigin la su'a Rimmon tampiingin la, bɛɛ anina nwadis anaasi. 48 Israel dim la da lɛb Benjamin teŋin kʋ nimbanɛ bɛ tempʋʋdin la wʋsa, la'am nɛ bʋnkɔnbid nɛ dinɛ wʋsa ka ba nif nyɛ. Ban da dɔlli yi teŋ sieba la wʋsa ba da nyu'oe ba nɛ bugum.